ຂ່າວຫຼ້າສຸດ

ສ້າງຄວາມເຂັ້ມແຂງ ຕິດຕາມກວດກາແຜນພັດທະນາເສດຖະກິດ-ສັງຄົມ

1.057 08 ຕ.ລ. 2019 ຂ່າວໜ້າ​ໜຶ່ງ

    ວັນ​ທີ 4-5 ຕຸ­ລາ 2019 ກຳ­ມາ​ທິ​ການ​ແຜນ­ການ ການ​ເງິນ ແລະ ການ​ກວດ​ສອບ ສະ­ພາ​ແຫ່ງ​ຊາດ (ສພຊ) ໄດ້​ຈັດ​ກອງ​ປະ­ຊຸມ​ຕິດ­ຕາມ​ກວດ­ກາ ແລະ ການ​ສ້າງ​ຄວາມ​ເຂັ້ມ­ແຂງ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ ເພື່ອ​ການ​ເຊື່ອມ​ໂຍງ​ເສດ­ຖະ­ກິດ ແລະ ການ​ຄຸ້ມ​ຄອງ​ການ​ເງິນ​ພາກ​ໃຕ້​ຂອງ​ລາວ ຂຶ້ນ​ທີ່​ໂຮງ­ແຮມ​ຈຳ­ປາ​ສັກ​ແກຣນ ແຂວງ​ຈຳ­ປາ​ສັກ ເປັນ​ປະ­ທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ປະ­ທານ ຮອງ​ປະ­ທານ​ກຳ­ມາ​ທິ​ການ​ແຜນ­ການ ການ​ເງິນ ແລະ ການ​ກວດ​ສອບ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້​ເປັນ​ການ​ທົບ​ທວນ ແລະ ເສີມ​ຂະ­ຫຍາຍ​ຜົນ­ສຳ­ເລັດ​ກອງ​ປະ­ຊຸມ​ຮ່ວມ​ຄັ້ງ​ທີ 8 ຂອງ​ກຳ­ມາ​ທິ​ການ​ງົບ­ປະ­ມານ ແລະ ການ​ເງິນ​ຂອງ ສພຊ 4 ປະ­ເທດ (CLMV) ໃນ​ການ​ຕິດ­ຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ງົບ­ປະ­ມານ​ແຫ່ງ​ລັດທີ່​ຈັດ​ຂຶ້ນ​ຢູ່​ນະ­ຄອນ­ຫຼວງ​ພະ​ບາງ​ໃນ​ຄັ້ງ​ຜ່ານ​ມາ ຈຸດ­ປະ­ສົງ​ເພື່ອ​ສືບ ຕໍ່​ປຶກ­ສາ​ຫາ­ລື​ແລກ­ປ່ຽນ ແລະ ຖອດ​ຖອນ​ບົດ­ຮຽນ​ຮ່ວມ​ກັນ​ກ່ຽວ​ກັບບັນ­ຫາ​ສຳ­ຄັນ​ທີ່​ຕິດ​ພັນ​ກັບ​ການ​ພັດ​ທະ ນາ​ເສດ­ຖະ­ກິດ-ສັງ­ຄົມ ເຊິ່ງ​ໄດ້​ຍົກ​ຂຶ້ນ​ໃນ​ກອງ​ປະ­ຊຸມ​ຮ່ວມ​ກຳ­ມາ​ທິ​ການ​ງົບ­ປະ­ມານ ແລະ ການ​ເງິນ 4 ປະ­ເທດ ທີ່​ນະ­ຄອນ­ຫຼວງ​ພະ​ບາງ​ໃນ​ຄັ້ງ​ຜ່ານ​ມາ ແລກ­ປ່ຽນ​ບົດ­ຮຽນ ແລະ ປະ­ສົບ​ການ​ຮ່ວມ​ກັບ​ກຳ­ມາ​ທິ​ການ​ງົບ­ປະ­ມານ ແລະ ການ​ເງິນ 4 ປະ­ເທດ ໂດຍ​ສະ­ເພາະ ປະ­ເທດ​ກຳ­ປູ­ເຈຍ ໄທ  ແລະ ຊ່ຽວ­ຊານ​ສາ ກົນ ກ່ຽວ​ກັບ​ການ​ຕິດ­ຕາມ​ກວດ­ກາ ແລະ ການ​ສ້າງ​ຄວາມ​ເຂັ້ມ­ແຂງ​ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ​ທະ ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ ແຜນ​ເງິນ­ຕາ ການ​ກວດ​ສອບ ແລະ ກົດ­ໝາຍ​ທີ່​ຕິດ​ພັນ​ກັບ​ການ​ຈັດ​ເກັບ​ລາຍ​ຮັບ ເພື່ອ​ຮັບ​ໃຊ້​ໃນ​ການ​ເຊື່ອມ​ໂຍງ​ເສດ­ຖະ­ກິດ ການ​ພັດ­ທະ­ນາ​ສູນ​ກາງ​ການ​ເງິນ ການ​ລົງ­ທຶນ ການ​ບໍ­ລິ­ການ​ຂົນ­ສົ່ງ​ສິນ­ຄ້າ ແລະ ການ­ທ່ອງ­ທ່ຽວ​ໃນ​ເຂດ​ພັດ­ທະ­ນາ 3 ລ່ຽມ (ລາວ-ຫວຽດ ນາມ-ກຳ­ປູ­ເຈຍ) ແລະ ເຂດ 3 ລ່ຽມ​ມໍ​ລະ​ກົດ (ລາວ-ໄທ-ກຳ­ປູ­ເຈຍ).

    ຍາດ​ແຍ່ງ​ເອົາ​ບົດ­ຮຽນ ແລະ ປະ­ສົບ​ການ​ຈາກ​ອົງ​ການ­ຈັດ­ຕັ້ງ​ສາ­ກົນ (WB JICABIDV) ໃນ​ການ​ວາງ​ຍຸດ​ທະ​ສາດ​ການ​ພັດ­ທະ­ນາ​ແບບ​ຍືນ​ຍົງ ການ​ເຊື່ອມ​ໂຍງ​ເສດ­ຖະ­ກິດ ແລະ ການ​ຄຸ້ມ​ຄອງ​ການ​ເງິນ ໃນ​ພາກ​ພຶ້ນ ແລະ ສາ­ກົນ ໂດຍ​ສະ­ເພາະ ນະ­ໂຍ­ບາຍ​ເສດ­ຖະ­ກິດ​ເສລີ​ດ້ານ​ການ​ຄ້າ ແລະ ການ​ບໍ­ລິ­ການ ການ​ເງິນ-ເງິນ­ຕາ ທຶນ ເຕັກ​ໂນ​ໂລ​ຢີ ແລະ ນະ​ວັດ­ຕະ​ກຳ ແຮງ​ງານ ແລະ ການ​ຖ່າຍ​ທອດ​ຄວາມ​ຮູ້​ສຳ­ລັບ​ການ​ເຊື່ອມ​ໂຍງ​ເສດ­ຖະ­ກິດ ແລະ ການ​ເງິນ ລະ­ຫວ່າງ​ລາວ​ກັບ​ປະ­ເທດ​ໃກ້​ຄຽງ ສ້າງ​ຄວາມ​ເຂັ້ມ­ແຂງ​ດ້ານ​ນິ­ຕິ​ກຳ ການ​ຕິດ­ຕາມ​ກວດ­ກາ ແລະ ຊຸກ­ຍູ້​ການ​ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ ການ​ພັດ­ທະ­ນາ​ສູນ​ກາງ​ການ​ເງິນ ການ​ຄ້າ​ຊາຍ​ແດນ ແລະ ການ­ທ່ອງ­ທ່ຽວ​ໃນ 4 ແຂວງ​ພາກ​ໃຕ້​ຂອງ​ລາວ​ໃຫ້​ສະ­ມາ­ຊິກ ສພຊ ແລະ ສະ­ພາ​ປະ­ຊາ­ຊົນ​ຂັ້ນ​ແຂວງ ເພື່ອ​ກະ­ກຽມ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ ປະ­ຈຳ​ປີ 2019 ເພື່ອ​ລາຍ​ງານ​ຕໍ່​ກອງ​ປະ­ຊຸມ​ໃຫຍ່​ສະ­ໄໝ​ສາ­ມັນ ເທື່ອ​ທີ 8 ສະ­ພາ​ແຫ່ງ​ຊາດ ຊຸດ​ທີ VIII  ແລະ ກອງ​ປະ­ຊຸມ​ສະ­ພາ​ປະ­ຊາ­ຊົນ​ແຂວງ​ໃຫ້​ມີ​ຜົນ­ສຳ­ເລັດ.

ຂ່າວທີ່ກ່ຽວຂ້ອງ