ໂຄງການກໍ່ສ້າງເຂື່ອນໄຟຟ້ານ້ຳອູ ມີຄວາມຄືບໜ້າ 70%

670 08 ຕ.ລ. 2019 ຂ່າວໜ້າ​ໜຶ່ງ
ໂຄງການກໍ່ສ້າງເຂື່ອນໄຟຟ້ານ້ຳອູ ມີຄວາມຄືບໜ້າ 70%

    ກອງ​ປະ­ຊຸມ​ຄະ­ນະ​ກຳ­ມະ­ການ​ຊີ້​ນຳ​ຮ່ວມ​ໂຄງ­ການ​ເຂື່ອນ​ໄຟ­ຟ້າ​ນ້ຳ​ອູ 1 ນ້ຳ​ອູ 3 ນ້ຳ​ອູ 4 ແລະ ນ້ຳ​ອູ7  ຄັ້ງ​ທີ III ຈັດ​ຂຶ້ນ​ວັນ​ທີ 7 ຕຸ­ລາ 2019 ຢູ່​ແຂວງ​ຫຼວງ​ພະ​ບາງ ເປັນ​ປະ­ທານ​ຂອງ​ທ່ານ  ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ມີ​ທ່ານ ບຸນ​ປອນ ສີ​ສຸ​ລາດ ປະ­ທານ​ກຳ­ມາ​ທິ​ການ​ເສດ­ຖະ­ກິດ ເຕັກ​ໂນ​ໂລ​ຊີ ແລະ ສິ່ງ­ແວ­ດລ້ອມ ສະ­ພາ​ແຫ່ງ​ຊາດ ພ້ອມ​ດ້ວຍ​ຮອງ​ເຈົ້າ­ແຂວງ​ຫຼວງ​ພະ​ບາງ ແຂວງ​ຜົ້ງ​ສາ­ລີ ຕາງ­ໜ້າ​ຈາກ​ກະ­ຊວງ​ທີ່​ກ່ຽວ­ຂ້ອງ ແລະ ຄະ­ນະ​ຊີ້​ນຳ​ເຂົ້າ​ຮ່ວມ.

    ທ່ານ ຄຳ​ມະ­ນີ ອິນ​ທິ​ລາດ ກ່າວ​ວ່າ: ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ​ອູ 1 ນ້ຳ​ອູ 3 ນ້ຳ​ອູ 4 ແລະ ນ້ຳ​ອູ 7 ເປັນ​ໂຄງ­ການ​ໄລ­ຍະ​ທີ II ທີ່​ສືບ­ຕໍ່​ໂຄງ­ການ​ເຂື່ອນ​ນ້ຳ​ອູ 2 ນ້ຳ​ອູ 5 ແລະ ນ້ຳ​ອູ 6 ທີ່​ກໍ່­ສ້າງ​ສຳ­ເລັດ ແລະ ດຳ­ເນີນ​ການ​ຜະ­ລິດ​ໄຟ­ຟ້າ​ແຕ່​ຕົ້ນ​ປີ 2016 ຄຽງ​ຄູ່​ກັນ​ນີ້ ໂຄງ­ການ​ເຂື່ອນ​ໄຟ­ຟ້າ​ນ້ຳ​ອູ ໄລ­ຍະ​ທີ II ໄດ້​ມີ​ການ​ກະ­ກຽມ​ຄວາມ​ພ້ອມ​ທາງ​ດ້ານ​ເອ­ກະ­ສານ ສັນ­ຍາ​ນອນ​ຢູ່​ໃນ​ແຜນ​ພັດ­ທະ­ນາ​ພະ­ລັງ­ງານ​ໄຟ­ຟ້າ​ຂອງ​ລາວ ຮອດ​ປີ 2020 ໃຫ້​ບັນ­ລຸ​ເປົ້າ​ໝາຍ​ການ​ຜະ­ລິດ​ໄຟ­ຟ້າ​ໄດ້​ເຖິງ 60 ກວ່າ​ແຫ່ງ ປັດ­ຈຸ­ບັນ ໄດ້​ກໍ່­ສ້າງ​ສຳ­ເລັດ 38 ແຫ່ງ ດ້ວຍ​ການ​ລົງ­ທຶນ 10 ກວ່າ​ຕື້​ໂດ​ລາ​ສະ­ຫະ­ລັດ ຫຼື ປະ­ມານ 88.000 ຕື້​ກີບ ມີ​ກຳ­ລັງ​ຕິດ​ຕັ້ງ 6.265 ເມ​ກາ​ວັດ ໃນ​ນີ້ ມີ​ເຂື່ອນ​ໄຟ­ຟ້າ​ນ້ຳ​ງື່ມ 2 ເທີນ​ຫີນ​ບູນ​ພາກ​ຂະ­ຫຍາຍ ນ້ຳ​ງຽບ 2 ນ້ຳ​ອູ 2 ນ້ຳ​ອູ 5 ນ້ຳ​ອູ 6 ນ້ຳ​ຄານ 2 ແລະ ໂຮງ­ງານ​ໄຟ­ຟ້າ​ຄວາມ​ຮ້ອນ​ຫົງ​ສາ​ລິກ​ໄນ​ເປັນ­ຕົ້ນ ນອກ​ນີ້ ໂຄງ­ການ​ທີ່​ກຳ­ລັງ​ກໍ່­ສ້າງ ເປັນ­ຕົ້ນ ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ ໄຊ​ຍະ​ບູ​ລີ ດອນ​ສະ​ໂຮງ ນ້ຳ​ງື່ມ 3 ນ້ຳ​ງຽບ 1 ເຊ​ປຽນ-ເຊ​ນ້ຳ​ນ້ອຍ ແລະ ລວມ​ທັງ​ໂຄງ­ການ​ເຂື່ອນ​ໄຟ­ຟ້າ​ນ້ຳ​ອູ ໄລ­ຍະ​ທີ II ມີ​ລະ­ບົບ​ສາຍ​ສົ່ງ​ແຮງ​ສູງ 5.200 ກິ­ໂລ­ແມັດ ແຮງ​ກາງ 26.000 ກິ­ໂລ­ແມັດ ແລະ ແຮງ​ຕ່ຳ 17.560 ກິ­ໂລ­ແມັດ ມີ​ສະ­ຖາ­ນີ 53 ສະ­ຖາ­ນີ​ຈ່າຍ​ໄຟ­ຟ້າ ໂດຍ​ມີ​ເປົ້າ​ໝາຍ​ເພື່ອ​ຕອບ​ສະ­ໜອງ​ໃຫ້­ການ​ຊົມ­ໃຊ້​ຢູ່​ພາຍ​ໃນ​ປະ­ເທດ​ໄດ້​ຢ່າງ​ທົ່ວ​ເຖິງ ແລະ ພຽງ­ພໍ​ກັບ​ຄວາມ​ຕ້ອງ­ການ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລາວ ໂດຍ​ສະ­ເພາະ ການ​ພັດ­ທະ­ນາ​ຂະ­ແໜງ​ອຸດ­ສາ­ຫະ­ກຳ​ພະ­ລັງ­ງານ ແລະ ບໍ່​ແຮ່​ໃຫ້​ຂະ­ຫຍາຍ­ຕົວ​ຕາມ​ແນວ­ທາງ​ຫັນ​ເປັນ​ອຸດ­ສາ­ຫະ­ກຳ ແລະ ທັນ​ສະ­ໄໝ ຕາມ​ທິດ​ສັງ­ຄົມ​ນິ­ຍົມ​ຢູ່​ໃນ​ປະ­ເທດ​ເຮົາ.

    ການ​ພັດ­ທະ­ນາ​ໂຄງ­ການ​ເຂື່ອນ​ໄຟ­ຟ້າ​ນ້ຳ​ອູ​ຢູ່​ໃນ​ໄລ­ຍະ​ທີ II ນີ້ ໄດ້​ມີ​ສັນ­ຍາ​ສຳ​ປະ­ທານ ໂດຍ​ກວມ​ເອົາ 4 ເຂື່ອນ ຄື: ນ້ຳ​ອູ 1 ນ້ຳ​ອູ 3 ນ້ຳ​ອູ 4 ແລະ ນ້ຳ​ອູ 7 ທີ່​ເຊັນ​ບົດ​ບັນ­ທຶກ​ວັນ​ທີ 31 ສິງ­ຫາ 2015 ລະ­ຫວ່າງ​ລັດ­ຖະ­ບານ​ລາວ​ກັບ​ບໍ­ລິ­ສັດ​ໄຟ­ຟ້າ​ນ້ຳ​ອູ ຈຳ­ກັດ ໂດຍ​ມີ​ກຳ­ລັງ​ຕິດ​ຕັ້ງ​ທັງ​ໝົດ 4 ເຂື່ອນ 732 ເມ​ກາ​ວັດ ສາ­ມາດ​ຜະ­ລິດ​ພະ­ລັງ­ງານ​ໄຟ­ຟ້າ​ໄດ້​ສະ­ເລ່ຍ 2.874 Gwhຕໍ່​ປີ ມູນ​ຄ່າ​ການ​ກໍ່­ສ້າງ​ໂຄງ­ການ 1.712 ລ້ານ​ໂດ​ລາ ຫຼື ປະ­ມານ 15.080 ຕື້​ກີບ  ມີ​ອາ­ຍຸ​ສຳ​ປະ­ທານ 29 ປີ ນັບ​ຈາກ​ມື້​ຂາຍ​ໄຟ­ຟ້າ​ຢ່າງ​ເປັນ​ທາງ​ການ ໃນ​ລາ­ຄາ​ໄຟ­ຟ້າ​ສະ­ເລ່ຍ​ຕະ­ຫຼອດ​ອາ­ຍຸ​ສຳ​ປະ­ທານ 6.65 UScent ຕໍ່ kwh ແລະ ຈະ​ຂາຍ​ໄຟ­ຟ້າ​ໃນ​ປີ 2020.

    ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ​ອູ 1 ນ້ຳ​ອູ 3  ນ້ຳ​ອູ 4 ແລະ ນ້ຳ​ອູ 7 ໄດ້​ເລີ່ມ​ລົງ­ມື​ກໍ່­ສ້າງ​ໃນ​ເດືອນ​ເມ­ສາ 2016 ມາ​ຮອດ​ປັດ­ຈຸ­ບັນ​ມີ​ຄວາມ​ຄືບ​ໜ້າ​ໂດຍ​ລວມ ຄື: ເຂື່ອນ​ໄຟ­ຟ້າ​ນ້ຳ​ອູ 1 ສຳ­ເລັດ​ໜ້າ​ວຽກ 71,07% ນ້ຳ​ອູ 3 ສຳ­ເລັດ 59,83% ນ້ຳ​ອູ 4 ສຳ­ເລັດ 71,93% ແລະ ນ້ຳ​ອູ 7 ສຳ­ເລັດ 72%.

ຂ່າວທີ່ກ່ຽວຂ້ອງ