ອາເມຣິກາ ຊ່ວຍເຫຼືອສ້າງຄວາມເຂັ້ມແຂງຂະແໜງກະສິກຳ

495 08 ຕ.ລ. 2019 ຂ່າວໜ້າ​ໜຶ່ງ
ອາເມຣິກາ ຊ່ວຍເຫຼືອສ້າງຄວາມເຂັ້ມແຂງຂະແໜງກະສິກຳ

    ສະ­ຫະ­ລັດ​ອາ​ເມ​ຣິ​ກາ ສືບ­ຕໍ່​ການ​ຊ່ວຍ­ເຫຼືອ​ລາວ​ໃນ​ການ​ເສີມ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ຂະ­ແໜງ​ກະ­ສິ­ກຳ ເມື່ອ​ບໍ່​ດົນ​ມາ​ນີ້ ອາ​ເມ​ຣິ​ກາ ແລະ ລາວ ໄດ້​ລິ​ເລີ່ມ​ໂຄງ­ການ​ໃໝ່​ທີ່​ມີ​ຊື່­ວ່າ: ໂຄງ­ການ​ສົ່ງ­ເສີມ​ຈຸນ​ລະ­ວິ​ສາ​ຫະ​ກິດ​ກະ­ສິ­ກຳ​ຢູ່​ລາວ ໂດຍ​ລັດ­ຖະ­ບານ​ສະ­ຫະ­ລັດ​ອາ​ເມ​ຣິ​ກາ ຜ່ານ​ອົງ­ການ​ພັດ­ທະ­ນາ​ສາ­ກົນ​ປະ­ເທດ​ສະ­ຫະ­ລັດ​ອາ​ເມ​ຣິ​ກາ ເປັນ​ຜູ້​ໃຫ້​ທຶນ​ຊ່ວຍ­ເຫຼືອ​ລ້າ.

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ໂຄງ­ການ​ສົ່ງ­ເສີມ​ຈຸນ​ລະ­ວິ​ສາ​ຫະ​ກິດ​ກະ­ສິ­ກຳ​ຢູ່​ລາວ​ທີ່​ສະ­ໜັບ­ສະ­ໜູນ​ໂດຍ​ອົງ­ການ​ພັດ­ທະ­ນາ​ສາ­ກົນ ປະ­ເທດ​ສະ­ຫະ­ລັດ​ອາ​ເມ​ຣິ​ກາ ລະ­ຫວ່າງ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ອົງ­ການ​ເອ​ຊີ​ດີ​ໄອ/ໂວ​ກາ ຈັດ​ຂຶ້ນ​ວັນ​ທີ 4 ຕຸ­ລາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ໂດຍ​ຕາງ­ໜ້າ​ລົງ​ນາມ​ຂອງ​ທ່ານ ສີ​ປະ​ໄພ ໄຊ​ສົງ­ຄາມ ຫົວ­ໜ້າ​ກົມ​ສົ່ງ­ເສີມ​ເຕັກ­ນິກ ແລະ ປຸງ​ແຕ່ງ​ກະ­ສິ­ກຳ ແລະ ທ່ານ​ນາງ ໂຊ​ຟີ້ ວັອກ​ເກີ້ ຫົວ­ໜ້າ​ອົງ­ການ​ເອ​ຊີ​ດີ​ໄອ/ໂວ​ກາ ມີ​ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ທ່ານ ຄໍ​ລິນ ຄຼອສ໌​ບີ ອຸ­ປະ​ທູດ​ແຫ່ງ​ປະ­ເທດ​ສະ­ຫະ­ລັດ​ອາ​ເມ​ຣິ​ກາ ປະ­ຈຳ​ລາວ ພ້ອມ​ພາກ­ສ່ວນ​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

   ທ່ານ ຄໍ​ລິນ ຄຼອສ໌​ບີ ກ່າວ​ວ່າ: ການ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ຄັ້ງ​ນີ້​ໄດ້​ເນັ້ນ​ຄືນ​ເຖິງ​ຄວາມ​ໝາຍ​ໝັ້ນ​ໃນ​ການ​ຊ່ວຍ­ເຫຼືອ​ລັດ­ຖະ­ບານ​ລາວ​ໃຫ້​ບັນ­ລຸ​ເປົ້າ​ໝາຍ​ການ​ພັດ­ທະ­ນາ​ຂອງ​ຊາດ ເຊິ່ງ​ທັງ​ສອງ​ປະ­ເທດ​ຖື​ຂະ ແໜງ​ການ​ກະ­ສິ­ກຳ​ມີ​ຄວາມ​ສຳ­ຄັນ​ຕໍ່​ການ​ພັດ­ທະ­ນາ​ເສດ­ຖະ­ກິດ ແລະ ວັດ­ທະ­ນະ­ທຳ ເຊິ່ງ​ການ​ສະ­ໜັບ­ສະ­ໜູນ​ອັນ​ເປັນ​ຮູບ​ປະ​ທຳ​ແກ່​ຂະ­ແໜງ​ກະ­ສິ­ກຳ​ຂອງ​ລາວ​ຄັ້ງ​ນີ້ ຈະ​ຊຸກ­ຍູ້​ການ​ຄ້າ ແລະ ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ​ຂອງ​ລາວ ໂດຍ​ການ​ຊ່ວຍ­ເຫຼືອ​ບັນ­ດາ​ຈຸນ​ລະ­ວິ​ສາ​ຫະ​ກິດ.

   ໂຄງ­ການ​ມີ​ໄລ­ຍະ​ຈັດ​ຕັ້ງ​ປະ­ຕິ­ບັດ 5 ປີ ໂດຍ​ຈະ​ສຸມ​ໃສ່​ການ​ພັດ­ທະ­ນາ​ຈຸນ​ລະ­ວິ​ສາ​ຫະ​ກິດ​ກະ­ສິ­ກຳ​ໃຫ້​ມີ​ປະ​ສິດ­ທິ​ຜົນ ແລະ ສາ­ມາດ​ແຂ່ງ­ຂັນ​ໄດ້ ເຊິ່ງ​ຈະ​ຊ່ວຍ​ໃຫ້​ຊາວ​ກະ­ສິ­ກອນ​ສາ­ມາດ​ດຳ­ເນີນ​ງານ​ຕາມ​ຫຼັກ­ການ​ທາງ​ທຸ­ລະ​ກິດ​ໄດ້ ໂດຍ​ການ­ຈັດ­ຕັ້ງ​ປະ­ຕິ­ບັດ​ຢູ່​ໃນ​ແຂວງ​ຊຽງ​ຂວາງ ໂຄງ­ການ​ຈະ​ເຝິກ­ອົບ­ຮົມ​ໃຫ້​ຊາວ​ກະ­ສິ­ກອນ ແລະ ຈຸນ​ລະ­ວິ​ສາ​ຫະ​ກິດ​ກະ­ສິ­ກຳ ກ່ຽວ​ກັບ​ການ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ຕະ­ຫຼາດ ເພີ່ມ​ທະ­ວີ​ການ​ເຊື່ອມ​ໂຍງ​ກັບ​ຕະ­ຫຼາດ ແລະ ປັບ­ປຸງ​ການ​ເຂົ້າ​ເຖິງ​ແຫຼ່ງ​ທຶນ ສຳ­ລັບ​ໂຄງ­ການ​ມີ​ທຶນ​ຊ່ວຍ­ເຫຼືອ​ຫຼາຍ​ກວ່າ 6.937.000 ໂດ​ລາ​ສະ­ຫະ­ລັດ ຫຼື ປະ­ມານ 60,9 ຕື້​ກີບ ເປັນ​ໂຄງ­ການ​ໃໝ່​ຂອງ​ອາ​ເມ​ຣິ​ກາ​ໃນ​ບັນ­ດາ​ໂຄງ­ການ​ພັດ­ທະ­ນາ​ຂະ­ແໜງ​ກະ­ສິ­ກຳ​ຂອງ​ລາວ ປັດ­ຈຸ­ບັນ ອາ​ເມ​ຣິ​ກາ​ໄດ້​ໃຫ້­ການ​ສະ­ໜັບ­ສະ­ໜູນ​ຂະ­ແໜງ­ການ​ດັ່ງ­ກ່າວ​ໂດຍ​ຜ່ານ 2 ໂຄງ­ການ ລວມ​ມູນ​ຄ່າ 15.900.000 ໂດ​ລາ ຫຼື ປະ­ມານ 139,7 ຕື້​ກີບ.

   ນອກ​ນີ້ ສະ­ຫະ­ລັດ​ອາ​ເມ​ຣິ​ກາ​ຍັງ​ຮ່ວມ​ມື​ກັບ​ລັດ­ຖະ­ບານ ແລະ ປະ­ຊາ­ຊົນ​ລາວ​ຢູ່​ໃນ​ຫຼາຍ​ຂົງ­ເຂດ ເພື່ອ​ປັບ­ປຸງ​ວຽກ​ງານ​ການ​ສຶກ​ສາ ສົ່ງ­ເສີມ​ສຸ­ຂະ­ພາບ ແລະ ໂພ­ຊະ​ນາ​ການ ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ຄ້າ ການ​ລົງ­ທຶນ ແລະ ສ້າງ​ຄວາມ​ເຂັ້ມ­ແຂງ​ໃນ​ການ​ປະ­ຕິ­ບັດ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ