ຂ່າວຫຼ້າສຸດ

ຣັດ​ເຊຍ ໃຫ້​ຄວາມ​ຊ່ວຍເຫຼືອ​ກູ​ບາ ແລະ ເວ​ເນ​ຊູ​ເອ​ລາ ໃນ​ດ້ານ​ພະລັງງານ

322 08 ຕ.ລ. 2019 ຂ່າວຕ່າງປະເທດ
ຣັດ​ເຊຍ ໃຫ້​ຄວາມ​ຊ່ວຍເຫຼືອ​ກູ​ບາ ແລະ ເວ​ເນ​ຊູ​ເອ​ລາ ໃນ​ດ້ານ​ພະລັງງານ

    ນາຍົກລັດຖະມົນຕີ​ຣັດ​ເຊຍ ດີ​ມີ​ຕຣີ ເມດ​ເວ​ເດບ ກ່າວ​ຢູ່​ໃນ​ຂອບ​ການ​ຢ້ຽມຢາມ​ກູ​ບາ ເມື່ອ​ວັນ​ທີ 5 ຕຸລາ​ນີ້​ວ່າ ຣັດ​ເຊຍ​ໃຫ້​ສັນຍາ​ທີ່​ຈະ​ໃຫ້​ຄວາມ​ຊ່ວຍເຫຼືອ​ກູ​ບາ ໃນ​ການ​ພັດທະນາ ຂົງເຂດ​ພະລັງງານ ທ່າມກາງ​ທີ່​ກູ​ບາ​ພວມ​ປະ​ເຊີນ​ກັບ​ສະພາບ​ຂາດແຄນ​ພະລັງງານ​ຢ່າງ​ໜັກ ຍ້ອນ​ຄຳ​ສັ່ງ​ປິດ​ລ້ອມ​ທີ່​ເຂັ້ນ​ງວດ​ກວ່າ​ເກົ່າ​ຈາກ ສ ອາ​ເມ​ຣິ​ກາ. ນາຍົກລັດຖະມົນຕີ ເມດ​ເວ​ເດບ ໃຫ້​ສຳພາດ​ຜ່ານ​ໂທລະພາບ​ຊ່ອງ Rossiya 1 TV ວ່າ​ຈະ​ຊອກ​ຫາ​ວິທີ​ອື່ນ ເພື່ອ​ຊ່ວຍເຫຼືອ​ກູ​ບາ ໃຫ້​ມີ​ບັນດາ​ຜະລິດ​ຕະ​ພັນ​ນ້ຳມັນ ໂດຍ​ຣັດ​ເຊຍ ແລະ ກູ​ບາ​ໄດ້​ປຶກສາ​ຫາລື​ກ່ຽວ​ກັບ​ບັນຫາ​ນີ້ ແລະ ເຫັນ​ດີ​ເປັນ​ເອກະສັນ​ກັນ​ວ່າ ຈະ​ວາງ​ແຜນການ​ດຳເນີນ​ງານ​ອອກ​ມາ ເພື່ອ​ຮັບ​ປະ​ກັບ​ແຫຼ່ງ​ສະໜອງ ພະລັງງານ​ໃຫ້​ແກ່​ກູ​ບາ ເຊັ່ນ​ແຫຼ່ງ​ພະລັງງານ​ແບບ​ດັ້ງເດີມ ຮີ​ໂດຣ​ກາກ​ບອນ (hydrocarbon) ແລະ ອາດ​ຈະ​ເປັນ​ທິດ​ທາງ​ອື່ນໆ​ທີ່​ມີ​ພ້ອມ​ແລ້ວ.

    ໃນ​ຂອບ​ຂອງ​ການ​ຢ້ຽມຢາມ​ກູ​ບາ ໃນ​ເທື່ອ​ນີ້ ຂອງ​ນາຍົກລັດຖະມົນຕີ ເມດ​ເວ​ເດບ ຕົວ​ແທນ​ຂອງ​ສອງ​ປະເທດ ໄດ້​ລົງ​ນາມ​ຂໍ້​ຕົກລົງ​ການ​ຮ່ວມ​ມື 8 ສະບັບ ໃນ​ຂົງເຂດ​ຄົມມະນາຄົມ ວິທະຍາສາດ-ເຕັກນິກ ອຸດສາຫະກຳ ແລະ ດ່ານ​ພາສີ​ອາກອນ.

    ໃນ​ຂະນະ​ດຽວ​ກັນ ປະທານາທິບໍດີ​ເວ​ເນ​ຊູ​ເອ​​ລ​ລາ ນີ​ໂກ​ລາ​​ສ ມາ​ດູ​ໂຣ ກ່າວ​ຕໍ່​ຜູ້​ສື່​ຂ່າວ ຫຼັງ​ຈາກ​ການ​ພົບ​ປະ​ກັບ​ທ່ານ ຢູ​ຣີ ໂບ​ຣິ​ຊອບ ຮອງ​ນາຍົກລັດຖະມົນຕີ​ຣັດ​ເຊຍ ທີ່ຢູ່​ລະຫວ່າງ​ການ ຢ້ຽມຢາມ​ເວ​ເນ​ຊູ​ເອ​ລາ ເມື່ອ​ວັນ​ທີ 5 ຕຸລາ​ນີ້​ວ່າ ເວ​ເນ​ຊູ​ເອ​ລາ ແລະ ຣັດ​ເຊຍ ໄດ້​ຕໍ່​ກຳນົດ​ສັນຍາ “ການ​ຊ່ວຍເຫຼືອ ແລະ ທີ່​ປຶກສາ” ໃນ​ຂົງເຂດ​ການ​ທະຫານ ແລະ ພະລັງງານ. ເຖິງ​ວ່າ​ບໍ່​ໄດ້​ເວົ້າ​ຢ່າງ​ລະອຽດ​ກໍ​ຕາມ ແຕ່​ປະທານາທິບໍດີ ມາ​ດູ​ໂຣ ໄດ້​ເນັ້ນ​ໜັກ​ວ່າ ການເຄື່ອນໄຫວ​ນີ້​ມີ​ຄວາມ​ໝາຍ​ກັບ​ການ “ການ​ເຂົ້າ​ຮ່ວມ​ຂອງ​ບັນດາ​ວິ​ສາ​ຫະ​ກິດ​ຂອງ​ຣັດ​ເຊຍ ໃນ​ທຸກໆ​ຂົງເຂດ​ການ​ຜະລິດ​ຍຸດ​ທະ​ສາດ” ຂອງ​ເວ​ເນ​ຊູ​ເອ​ລາ ເຊັ່ນ ນ້ຳມັນ​ດິບ ແກ​​ັສ ແລະ ພາກ​ກະສິກຳ. ໃນ​ຂະນະ​ດຽວ​ກັນ ການ​ຮ່ວມ​ມື​ທາງ​ດ້ານ​ເຕັກນິກ-ການ​ທະຫານ ແບບ​ສອງ​​ຝ່່າຍ ກໍ​ພວມ “ຄືບ​ໜ້າ​ຢ່າງ​ສົມ​ບູບ​ແບບ​ຕາມ​ຂະ​ບວນ​ການ”.

ຂ່າວທີ່ກ່ຽວຂ້ອງ