ຂ່າວຫຼ້າສຸດ

ຫວຽດນາມ - ກຳປູເຈຍ ລົງ​ນາມ​ເອກະສານ​ການ​ຮ່ວມ​ມື​ຫຼາຍ​ສະບັບ

257 08 ຕ.ລ. 2019 ຂ່າວຕ່າງປະເທດ
ຫວຽດນາມ - ກຳປູເຈຍ ລົງ​ນາມ​ເອກະສານ​ການ​ຮ່ວມ​ມື​ຫຼາຍ​ສະບັບ

    ທ່ານ ຮຸນ​ແຊນ ນາຍົກລັດຖະມົນຕີ​ກຳປູເຈຍ ໄດ້​ເຄື່ອນ​ໄຫວ​ຢ້ຽມຢາມ​ຫວຽດນາມ ແຕ່​ວັນ​ທີ 4-5 ຕຸລາ​ທີ່​ຜ່ານ​ມາ ຕາມ​ຄຳ​ເຊີນ​ຂອງ​ນາຍົກລັດຖະມົນຕີ​ຫວຽດນາມ ຫງວ​​ຽນ​ຊວນ​ຟຸກ. ໃນ​ໂອກາດ ດັ່ງກ່າວ ນາຍົກລັດຖະມົນຕີ​ຮຸນ​ແຊນ ໄດ້​ພົບ​ປະ​ເຈລະຈາ​ກັບ ນາຍົກລັດຖະມົນຕີ ຫງວ​​ຽນ​ຊວນ​ຟຸກ ໂດຍ​ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ​ນຳ​ກັນ​​ຢ່າງ​ເລິກເຊິ່ງ ແລະ ໄດ້​ບັນລຸ​ຄວາມ​ຮັບ​ຮູ້​ຮ່ວມ​ກັນ​ທີ່​ສຳຄັນ ກ່ຽວ​ກັບ​ການ​ພົວພັນ​ແບບ​ສອງ​ຝ່າຍ ຫວຽດນາມ - ກຳປູເຈຍ ກໍ​ຄື​ການ​ປະສານ​ສົມທົບ​ລະ​ຫວ່າ ສອງ​ປະເທດ ຢູ່​ໃນ​ບັນດາ​ເວທີ​ປາ​ໄສ​ພາກ​ພື້ນ ແລະ ສາກົນ.

    ສອງ​ຝ່າຍ​ເຫັນ​ດີ​ເປັນ​ເອກ​ສັນ​ກັນ ໃນ​ການ​ເສີມ​ຂະຫຍາຍ​ທຸກໆ​ຄວາມ​ສາມາດ​ບົ່ມ​ຊ້ອນ ເພື່ອ​ນຳ​ເອົາ​ເສດຖະກິດ ໃຫ້​ກາຍເປັນ​ຂົງເຂດ​ທີ່​ເປັນ​ເສົາຄ້ຳ ຢູ່​ໃນ​ການ​ພົວພັນ​ແບບ​ສອງ​ຝ່າຍ; ຊຸກຍູ້​ການ​ເຊື່ອມ​ຈອດ​ສອງ​ພື້ນຖານ​ເສດຖະກິດ ດ້ວຍ​ການ​ເຮັດ​ສຳເລັດ​ໂດຍ​ໄວ ໃນ​ການ​ກຳນົດ ແຜນ​ສັງ​ລວມ ກ່ຽວ​ກັບ​ການ​ເຊື່ອມ​ຈອດ​ສອງ​ພື້ນຖານ​ເສດຖະກິດ ຮອດ​ປີ 2030 ຜັນ​ຂະຫຍາຍ ປະສິດທິພາບ​ຂອງ​ບັນດາ​ສັນຍາ ແລະ ຂໍ້​ຕົກລົງ ທີ່​ໄດ້​ຮັບ​ການ​ລົງ​ນາມ ກ່ຽວ​ກັບ​ການ​ເຊື່ອມ​ຈອດ ດ້ານ​ການ​ຄົມມະນາຄົມ​ລະຫວ່າງ​ສອງ​ປະເທດ ອັນ​ປະກອບ​ດ້ວຍ​ບົດ​ບັນທຶກ​ຊ່ວຍ​ຈຳ ກ່ຽວ​ກັບ​ຍຸດ​ທະ​ສາດ​ການ​ຮ່ວມ​ມື ດ້ານ​ການ​ຄົມມະນາຄົມ​ຂົນສົ່ງ ໄລຍະ​ປີ 2018-2025 ແລະ ວິໄສ​ທັດ ຮອດ​ປີ 2030.

    ນາຍົກລັດຖະມົນຕີ ຫງວ​​ຽນ​ຊວນ​ຟຸກ ແລະ ນາຍົກລັດຖະມົນຕີ ຮຸນ​ແຊນ ຍັງ​ໄດ້​ເຂົ້າ​ຮ່ວມ​ເປັນ​ສັກຂີ​ພິຍານ ໃນ​ພິທີ​ລົງ​ນາມ ບົດ​ບັນທຶກ​ຊ່ວຍ​ຈຳ ລະຫວ່າງ​ກະຊວງ​ອຸດສາຫະກຳ ການ​ຄ້າ​ຫວຽດນາມ ກັບ​ກະຊວງ​ເສດຖະກິດ ແລະ ການ​ເງິນ​ກຳປູເຈຍ ກ່ຽວ​ກັບ​ການ​ຊຸກຍູ້ ທາງ​ດ້ານ​ການ​ຄ້າ; ບົດ​ບັນທຶກ​ຊ່ວຍ​ຈຳ ລະຫວ່າງ​ກະຊວງ​ອຸດສາຫະກຳ ການ​ຄ້າ​ຫວຽດນາມ ກັບ​ກະຊວງ​ເສດຖະກິດ ແລະ ການ​ເງິນ​ກຳປູເຈຍ ກ່ຽວ​ກັບ​ຄວາມ​ຄືບ​ໜ້າ​ໃນ​ການ​ກໍ່ສ້າງ ແລະ ແຜນການ ມອບ​ຮັບ​ໂຄງການ​ຕະຫຼາດ​ຊາຍ​ແດນ​ຕົວ​ແບບ​ຂອງ​ກຳປູເຈຍ; ບົດ​ບັນທຶກ​ຊ່ວຍ​ຈຳ​ລະຫວ່າງ​ກະຊວງ ອຸດສາຫະກຳ ການ​ຄ້າ​ຫວຽດນາມ ກັບ​ກະຊວງ​ບໍ່​ແຮ່ ແລະ ພະລັງງານ​ກຳປູເຈຍ ກ່ຽວ​ກັບ​ການ​ຮ່ວມ​ມື ໃນ​ຂົງເຂດ​ໄຟຟ້າ; ບົດ​ບັນທຶກ​ຊ່ວຍ​ຈຳ ລະຫວ່າງ​ກະຊວງ​ແຜນການ ແລະ ການ​ລົງທຶນ​ຫວຽດນາມ ກັບ​ສະພາ​ການ​ພັດທະນາ​ກຳປູເຈຍ ກ່ຽວ​ກັບ​ການ​ຮ່ວມ​ມື​ໃນ​ການ​ລົງທຶນ.

ຂ່າວທີ່ກ່ຽວຂ້ອງ