ຂ່າວຫຼ້າສຸດ

ຜູ້ປະສົບໄພຍັງຕ້ອງການຄວາມຊ່ວຍເຫຼືອ

7.576 07 ຕ.ລ. 2019 ນານາສາລະ

    ຜູ້​ຂຽນ​ໄດ້​ມີ​ໂອ­ກາດ​ນັ່ງ​ຟັງ ພະ​ອາ­ຈານ ພວງ​ປະ­ເສີດ ພູມ​ມະ​ວົງ ເຈົ້າ​ອາ­ວາດ​ວັດ​ອົງ​ຕື້ ທີ່​ເພິ່ນ​ພ້ອມ​ດ້ວຍ​ຄະ­ນະ ໄດ້​ລົງ​ເມືອ​ແຈກ​ຂອງ​ຊ່ວຍ­ເຫຼືອ​ແກ່​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ແຂວງ​ຈຳ­ປາ​ສັກ ເມື່ອ​ອາ­ທິດ​ຜ່ານ​ມາ ເພິ່ນ​ເລົ່າ​ສູ່​ຟັງ​ວ່າ ສະ­ເພາະ​ເມືອງ​ສຸ​ຂຸ​ມາ ມີ 7 ເຂດ ແຕ່​ນ້ຳ​ຖ້ວມ​ໜັກ​ຢູ່ 5 ເຂດ ເຊິ່ງ​ຫຼາຍ​ເຂດ​ເປັນ​ພື້ນ​ທີ່​ຕ່ຳ ເວ­ລາ​ນ້ຳ​ຖ້ວມ​ຂຶ້ນ​ມາ​ກໍ​ຈະ​ເກີດ​ນ້ຳ​ຂັງ​ໄລ­ຍະ​ຍາວ​ພໍ​ສົມ­ຄວນ ເຮັດ​ໃຫ້​ປະ­ຊາ­ຊົນ​ມີ​ຜົນ​ກະ­ທົບ​ເສຍ​ຫາຍ​ຫຼາຍ!.

    ພະ​ອາ­ຈານ​ໄດ້​ເລົ່າ​ຕໍ່​ວ່າ: ເຈົ້າ­ເມືອງ​ສຸ​ຂຸ​ມາ ໄດ້​ຕິດ­ຕໍ່​ປະ­ສານ​ງານ​ກັບ​ບໍ­ລິ­ສັດ​ນ້ຳ​ດື່ມ ເພື່ອ​ໃຫ້​ເຂົາ​ໄປ​ບໍ­ລິ­ການ​ແກ່​ປະ­ຊາ­ຊົນ ເພາະ​ເວ­ລາ​ນ້ຳ​ຖ້ວມ​ຂັງ​ນັ້ນ ບັນ­ດາ​ນ້ຳ​ກັອກ​ນ້ຳ­ສ້າງ​ຕ່າງໆ​ບໍ່​ສາ­ມາດ ໃຊ້​ບໍ­ລິ­ໂພກ​ໄດ້ ພ້ອມ​ນີ້ ທາງ​ເມືອງ​ກໍ​ຈະ​ໄດ້​ໃຊ້​ງົບ­ປະ­ມານ​ລ້າງ​ນ້ຳ​ກັອກ​ນັ້ນ​ໃໝ່​ໃຫ້​ແກ່​ປະ­ຊາ­ຊົນ ບັນ­ດາ​ໄຟ­ຟ້າ ກໍ​ຕ້ອງ​ໄດ້​ກວດ​ສອບ​ໃຫ້​ລະ­ອຽດ ເພາະ​ຕ້ອງ​ຮັບ­ປະ­ກັນ​ຄວາມ​ປອດ​ໄພ ເຄື່ອງ­ໃຊ້​ໄຟ­ຟ້າ ແລະ ການ​ໃຊ້​ໄຟ​ໃນ​ຄົວ​ເຮືອນ ກໍ​ຕ້ອງ​ໄດ້​ປະ­ຢັດ ເຊິ່ງ​ຜູ້​ຈະ​ໄປ​ຊ່ວຍ­ເຫຼືອ​ກໍ​ສາ­ມາດ​ນຳ​ເອົາ​ທຽນ​ໄປ ແຈກ​ໃຫ້​ປະ­ຊາ­ຊົນ​ໄດ້ ເຊິ່ງ​ເຂົາ​ຕ້ອງ​ໄດ້​ປະ­ຢັດ​ໄຟ.

    ເມື່ອ​ເວົ້າ​ເຖິງ​ຄວາມ​ເສຍ​ຫາຍ​ດ້ານ​ອື່ນ​ຈາກ​ຜົນ​ກະ­ທົບ​ໄພ​ນ້ຳ​ຖ້ວມ​ນັ້ນ ຍັງ​ມີ​ການ​ສູນ​ເສຍ​ເຂົ້າ​ໃນ​ນາ ແລະ ບັນ­ດາ​ສັດ­ລ້ຽງ​ທີ່​ຮັບ​ໃຊ້​ເປັນ​ກຳ­ລັງ​ເສດ­ຖະ­ກິດ​ຂອງ​ຄອບ­ຄົວ ແມ່ນ​ໄດ້​ຮັບ​ຜົນ​ເສຍ​ຫາຍ ຄື: ງົວ ຄວາຍ ແລະ ບັນ­ດາ​ເປັດ ໄກ່ ສັດ­ລ້ຽງ​ອື່ນໆ​ກໍ​ຕາຍ ຫຼື ໄຫຼ​ໄປ​ນຳ​ນ້ຳ ເຊິ່ງ​ຜົນ​ເສຍ​ຫາຍ​ດັ່ງ­ກ່າວ ກໍ​ຍາກ​ຕໍ່​ການ​ປະ​ເມີນ​ມູນ​ຄ່າ ອາ­ຈານ​ເພິ່ນ​ເລົ່າ​ຕື່ມ​ວ່າ: ປະ­ຊາ­ຊົນ​ຍັງ​ຕ້ອງ­ການ​ຄວາມ​ຊ່ວຍ­ເຫຼືອ​ເປັນ​ເຂົ້າ­ສານ ອາ­ຫານ​ແຫ້ງ ນ້ຳ​ຖ້ວມ​ປີ​ນີ້ ຢູ່​ແຕ່​ລະ​ເຂດ​ຈະ​ພົບ​ບັນ­ຫາ​ຕ່າງ​ກັນ ເຊັ່ນ: ພວກ​ໃນ​ເມືອງ​ເວ­ລາ​ນ້ຳ​ລົງ​ກໍ​ສາ­ມາດ​ເຂົ້າ​ໄປ​ອະ­ນາ­ໄມ​ເຮືອນ​ເຂົ້າ​ຢູ່​ໄດ້ ແຕ່​ບາງ​ເຂດ​ຊົນ­ນະ­ບົດ​ຫຼາຍ​ຫຼັງ­ຄາ​ເຮືອນ​ເກີດ​ຄວາມ​ເປ່​ເພ​ຫັກ​ພັງ​ລົງ ນີ້​ຄື​ບາງ​ສ່ວນ​ສະ­ພາບ​ຂອງ​ບັນ­ຫາ​ຜູ້​ປະ­ສົບ​ໄພ​ນ້ຳ​ຖ້ວມ.

    ສັງ​ລວມ​ແລ້ວ ຈຶ່ງ​ເຮັດ​ໃຫ້​ພວກ​ເຮົາ​ຕ້ອງ​ໄດ້​ຄິດ​ໄຄ່​ຄວນ​ຊຸກ­ຍູ້​ການ​ຊ່ວຍ­ເຫຼືອ ເອື້ອ­ເຟື້ອ ປັດ​ໄຈ​ອາ­ຫານ ເພື່ອ​ເຫັນ­ແກ່​ພີ່­ນ້ອງ​ຮ່ວມ​ຊາດ ເຊິ່ງ​ໃນ​ອະ­ດີດ ປີ 1978 ນ້ຳ​ຖ້ວມ​ເວ­ລາ​ນັ້ນ ອຶດ​ເຂົ້າ​ກິນ ຍັງ​ຫາ​ຂຸດ​ກອຍ ຂຸດ​ມັນ​ກິນ​ໄດ້ ແຕ່​ດຽວ­ນີ້​ບໍ່​ມີ​ໃຫ້​ຂຸດ​ໄດ້​ອີກ​ແລ້ວ !.

ຂ່າວທີ່ກ່ຽວຂ້ອງ