ຂ່າວຫຼ້າສຸດ

WTO ອະນຸຍາດໃຫ້ ສ. ອາເມຣິກາ ເກັບພາສີກັບສິນຄ້າຂອງ EU

564 04 ຕ.ລ. 2019 ຂ່າວຕ່າງປະເທດ
WTO ອະນຸຍາດໃຫ້ ສ. ອາເມຣິກາ ເກັບພາສີກັບສິນຄ້າຂອງ EU

    ອົງການການຄ້າໂລກ (WTO) ໄດ້ເຫັນພ້ອມອອກມາເມື່ອວັນທີ 2 ຕຸານີ້ ກ່ຽວກັບການອະນຸຍາດໃຫ້ ສ. ອາເມຣິກາ ເກັບພາສີຕໍ່ສິນຄ້າຂອງສະຫະພາບເອີຣົບ (EU) ໃນປະລິມານທີ່ມີມູນຄ່າ 7,5 ຕື້ໂດລາສະຫະລັດ ຊຶ່ງພົວພັນເຖິງນະໂຍບາຍອູດໜູນໂດຍບໍ່ໄດ້ຮັບອະນຸຍາດ ທີ່  EU ໃຫ້ແກ່ Airbus.

    ສານກຳມະການຂອງ WTO ມີຄຳຕັດສິນອອກມາວ່າ ອາເມຣິກາ ໄດ້ຮັບຄວາມເສຍຫານເທົ່າໆກັນທີ່ເກືອບ 7,5 ຕື້ໂດລາສະຫະລັດ/ປີ ຈາກບ້ວງເງິນກູ້ພິເສດຂອງລັດຖະບານບັນດາປະເທດເອີຣົບ ທີ່ໃຫ້ແກ່ພວກເຮືອບິນ A350 ແລະ  A380 ຂອງ Airbus.

    ກ່ອນໜ້ານັ້ນ ສ. ອາເມຣິກາໄດ້ສະເໜີຂໍອະນຸຍາດເກັບພາສີເຖິງ 100% ຕໍ່ປະລິມານສິນຄ້າຂອງເອີຣົບ ໃນມູນຄ່າ 11,2 ຕື້ໂດລາສະຫະລັດ.

    ກ່ອນທີ່ລະດັບການເກັບພາສີດັ່ງກ່າວຈະໄດ້ຮັບການນຳໃຊ້ນັ້ນ ອົງການທີ່ເຮັດວຽກແກ້ໄຂການພິພາດຂອງ WTO ຕ້ອງໄດ້ຮັບຮອງບົດລາຍງານຂອງບັນດາກຳມະການຢ່າງເປັນທາງການກ່ອນ. ເອກະສານຕ່າງໆດັ່ງກ່າວ ຄາດວ່າຈະໃຊ້ເວລາ 10 ວັນ ຫາ 4 ອາທິດ.

    ລາຍການສິນຄ້າທີ່ຈະຖືກເກັບພາສີນັ້ນ ປະກອບມີບັນດາຜະລິດຕະພັນ ທີ່ມີມູນຄ່າການຄ້າປະຈຳປີເຖິງ 25 ຕື້ໂດລາສະຫະລັດ ນັບແຕ່ເຮືອບິນ ແລະ ເຄື່ອງອາໄຫຼ່ຂອງ Airbus ໄປຈົນຮອດສິນຄ້າຕ່າງໆເຊັ່ນເຫຼົ້າແວງ ເນີຍແຂງ ແລະ ສິນຄ້າຟູມເຟືອຍຕ່າງໆຈາກເອີຣົບ.

    ໃນຂະນະດຽວກັນ WTO ກໍຄາດວ່າຈະນຳເອົາຂໍ້ຕົກລົງອອກມາ ໃນຕົ້ນປີ 2020 ກ່ຽວກັບສິດການຕອບໂຕ້ຂອງ EU ທີ່ພົວພັນເຖິການອູດໜູນຂອງ ສ. ອາເມຣິກາ ທີ່ໃຫ້ແກ່ໂບອິງ.

    ຫຼ້າສຸດ ຂ່າວສານ AFP ລາຍງານວ່າ ຫຼັງຈາກມີການຕັດສິນອອກມາຈາກ WTO ຄືດັ່ງກ່າວແລ້ວ ບັນດາເຈົ້າໜ້າທີ່ອາວຸໂສດ້ານການຄ້າ ແຈ້ງໃຫ້ຮູ້ວ່າ ສ ອາເມຣິກາ ຈະປະຕິບັດພາສີຕໍ່ສິນຄ້າຂອງ EU ນັບແຕ່ວັນທີ 18 ຕຸລານີ້ເປັນຕົ້ນໄປ.

ຂ່າວທີ່ກ່ຽວຂ້ອງ