ຂ່າວຫຼ້າສຸດ

ແລ່ນຊຸບເປີມິນິມາຣາທອນ ຈະຈັດຂຶ້ນວັນທີ 27 ຕຸລານີ້

865 03 ຕ.ລ. 2019 ວົງຈອນກີລາ
ແລ່ນຊຸບເປີມິນິມາຣາທອນ ຈະຈັດຂຶ້ນວັນທີ 27 ຕຸລານີ້

    ວາ­ລະ­ສານ​ຂວັນ​ໃຈ​ອອນ​ລາຍ ແລະ ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ຮ່ວມ​ກັບ​ສະ­ຫະ­ພັນ​ກີ­ລາ​ແລ່ນ-ລານ​ແຫ່ງ​ຊາດ​ລາວ ຈັດ​ພິ­ທີ​ຖະ­ແຫຼງ​ຂ່າວ​ແລ່ນ​ຊຸບ​ເປີ​ມິ​ນິ​ມາ​ຣາ​ທອນ (Run For Her 2019) ຂຶ້ນ​ວັນ​ທີ 2 ຕຸ­ລາ 2019 ຢູ່​ໂຮງ­ແຮມ​ຄາວ​ພລາ​ຊາ ໂດຍ​ມີ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ທ່ານ​ນາງ ຈັນ­ທະ​ຈອນ ວົງ​ໄຊ ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ທ່ານ​ນາງ ເກດ​ສະ­ຫວັນ ປັນ­ຍາ​ທິບ ຮອງ​ຜູ້­ອຳ­ນວຍ­ການ​ສ້າງ​ວາ­ລະ­ສານ​ຂວັນ​ໃຈ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຈັນ​ດີ ພົມ​ມະ​ບຸດ ປະ­ທານ​ສະ­ຫະ­ພັນ​ກີ­ລາ​ແລ່ນ-ລານ​ແຫ່ງ​ຊາດ ກ່າວ​ວ່າ: ຈຸດ­ປະ­ສົງ​ເພື່ອ​ປູກ​ຈິດ​ສຳ­ນຶກ​ໃຫ້​ຄົນ​ໃນ​ສັງ­ຄົມ​ເຫັນ​ໄດ້​ຄວາມ​ສຳ­ຄັນ ແລະ ຮ່ວມ​ກັນ​ຢຸດ­ຕິ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກ­ນ້ອຍ ທັງ​ເປັນ​ການ​ເປີດ​ໂອ­ກາດ​ໃຫ້​ນັກ­ກີ­ລາ​ຮຸ່ນ​ສືບ​ທອດ ໄດ້​ພັດ­ທະ­ນາ​ການ​ແລ່ນ​ຂອງ​ຕົນ ໃຫ້​ມີ​ບາດ­ກ້າວ​ຂະ­ຫຍາຍ­ຕົວ ພ້ອມ​ນີ້​ຍັງ​ເປັນ​ການ​ສົ່ງ­ເສີມ​ໃຫ້​ຄົນ​ລາວ ຫັນ​ມາ​ອອກ­ກຳ­ລັງ​ກາຍ ຫຼິ້ນ​ກີ­ລາ ເພື່ອ​ສຸ­ຂະ­ພາບ​ນັບ​ມື້​ຫຼາຍ​ຂຶ້ນ.

    Run For Her 2019 ຈະ​ຈັດ​ຂຶ້ນ​ວັນ​ທີ 27 ຕຸ­ລາ 2019 ຢູ່​ເດີ່ນ​ສະ­ໜາມ​ຫຼວງ (ເດີ່ນ​ພະ​ທາດ­ຫຼວງ) ໂດຍ​ແບ່ງ​ເປັນ 3 ປະ­ເພດ ຄື: ຊຸບ​ເປີ​ມິ​ນິ​ມາ​ຣາ​ທອນ 15 ກິ­ໂລ­ແມັດ ຊາຍ-ຍິງ ຮຸ່ນ​ອາ­ຍຸ 16-29 ປີ 30-39 ປີ 40-49 ປີ ແລະ 50 ປີ​ຂຶ້ນ​ໄປ ຄ່າ​ລົງ­ທະ­ບຽນ 150.000 ກີບ ຈະ​ໄດ້​ຮັບ​ເສື້ອ-ຫຼຽນ (ອັນ​ດັບ 1-5 ຈະ​ໄດ້​ຮັບ​ເງິນ​ລາ­ງວັນ) ມິ​ນິ​ມາ​ຣາ ທອນ 10 ກິ­ໂລ­ແມັດ ຊາຍ-ຍິງ ຮຸ່ນ​ອາ­ຍຸ 16-29 ປີ 30-39 ປີ 40-49 ປີ ແລະ 50 ປີ​ຂຶ້ນ​ໄປ ຄ່າ​ລົງ­ທະ­ບຽນ 120.000 ກີບ ຈະ​ໄດ້​ຮັບ​ເສື້ອ-ຫຼຽນ (ອັນ​ດັບ 1-5 ຈະ​ໄດ້​ຮັບ​ເງິນ​ລາ­ງວັນ) ຍ່າງ​ເພື່ອ​ສຸ­ຂະ­ພາບ 5 ກິ­ໂລ­ແມັດ ບໍ່​ຈຳ­ກັດ​ອາ­ຍຸ ຄ່າ​ລົງ­ທະ­ບຽນ 100.000 ກີບ ຈະ​ໄດ້​ຮັບ​ເສື້ອ.

ຂ່າວທີ່ກ່ຽວຂ້ອງ