ຂ່າວຫຼ້າສຸດ

ຣີສອດ-ປາກນໍ້າຄານ ຄອງຂັນຊະນະເລີດເຮືອຍາວ ສະໄໝ 2

702 01 ຕ.ລ. 2019 ວົງຈອນກີລາ
ຣີສອດ-ປາກນໍ້າຄານ ຄອງຂັນຊະນະເລີດເຮືອຍາວ ສະໄໝ 2

    ເຮືອ​ຣີ​ສອດ-ປາກ​ນ້ຳ​ຄານ (ສີ­ພາຍ​ນາ­ວາ​ສັກ­ສິດ) ບຽດ​ຊະ­ນະ​ເຮືອ​ໄກ່​ທອງ (ສີ­ພາຍ​ກອງ​ບັນ­ຊາ​ການ​ທະ­ຫານ​ແຂວງ​ບໍ​ລິ​ຄຳ​ໄຊ) ແບບ​ຫວຸດ​ຫວິດ ຄອງ​ຂັນ​ຊະ­ນະ​ເລີດ ເປັນ​ສະ­ໄໝ​ທີ 2 ຕິດ­ຕໍ່​ກັນ ໃນ​ງານ​ປະ­ເພ­ນີ​ແຂ່ງ­ຂັນ​ຊ່ວງ​ເຮືອ​ຍາວ ປະ­ເພດ 55 ສີ­ພາຍ ເພື່ອ​ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ ວັນ​ທີ 28-29 ກັນ­ຍາ 2019 ຢູ່​ສວນ​ນ້ຳ​ອິນ​ແປງ​ຣີ​ເວີ​ໄຊ້ ບ້ານ​ດົງ​ໂພ​ສີ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ (ນວ).

    ການ​ແຂ່ງ­ຂັນ​ຄັ້ງ​ນີ້ ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ປີ​ທ່ອງ​ທ່ຽວ ລາວ-ຈີນ ດຶງ​ດູດ​ເອົາ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ໃນ​ປະ­ເທດ ເວົ້າ​ສະ­ເພາະ ນວ ກໍ​ຄື​ເມືອງ​ຫາດ​ຊາຍ​ຟອງ ທັງ​ເປັນ​ການ​ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ ລະ­ຫວ່າງ​ບ້ານ​ຕໍ່​ບ້ານ ແລະ ສີ­ພາຍ​ດ້ວຍ​ກັນ ນອກ​ນີ້​ຍັງ​ເປັນ​ການ​ຄັດ​ເລືອກ​ເອົາ​ນັກ­ກີ­ລາ​ທີ່​ມີ​ຄວາມ​ສາ­ມາດ​ເປັນ​ຕົວ​ແທນ ນວ ເຂົ້າ​ຮ່ວມ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຢູ່​ແຂວງ​ຊຽງ​ຂວາງ ວັນ​ທີ 22 ມີ­ນາ-1 ເມ­ສາ 2020.

    ການ​ແຂ່ງ­ຂັນ​ຄັ້ງ​ນີ້ ມີ​ເຮືອ​ເຂົ້າ​ຮ່ວມ 9 ລຳ ແບ່ງ​ເປັນ 2 ກຸ່ມ ຜ່ານ​ການ​ແຂ່ງ­ຂັນ​ຊະ­ນະ​ເລີດ​ແມ່ນ​ເຮືອ​ຣີ​ສອດ-ປາກ​ນ້ຳ​ຄານ ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 13 ລ້ານ​ກີບ ອັນ​ດັບ 2 ເຮືອ​ໄກ່​ທອງ ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 11 ລ້ານ​ກີບ ອັນ​ດັບ 3 ເຮືອ​ທະ­ນາ­ຄານ​ຮ່ວມ​ພັດ­ທະ­ນາ​ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 9 ລ້ານ​ກີບ ອັນ​ດັບ 4 ເຮືອ​ສາວ ນ້ອຍ​ພິ­ກຸນ​ທອງ ໄດ້​ຮັບ​ເງິນ​ລາ­ງວັນ 7 ລ້ານ​ກີບ ນອກ​ນີ້​ເຮືອ​ທີ່​ເຂົ້າ​ຮ່ວມ​ຍັງ​ໄດ້​ຮັບ​ລາ­ງວັນ​ຄ່າ​ລາກ​ແກ່​ລຳ​ລະ 5 ລ້ານ​ກີບ.

    ຕາງ­ໜ້າ​ທ່ານ ຄຳ​ແກ່ງ ດວງ​ພະ­ຈັນ ຮອງ​ເຈົ້າ­ເມືອງ​ຫາດ​ຊາຍ​ຟອງ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ທ່ານ ສອນ​ເພັດ ເມືອງ​ວົງ ປະ­ທານ​ສະ­ຫະ­ພັນ​ກີ­ລາ​ເຮືອ​ຊ່ວງ ນວ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ