...ພາສາລາວໃນສື່ໂຄສະນາ...

4.435 30 ກ.ຍ. 2019 ນານາສາລະ

    ອີກ​ບໍ່​ດົນ​ກໍ​ຈະ​ຮອດ​ມື້­ບຸນ​ອອກ​ພັນ​ສາ ແລະ ບຸນ­ຊ່ວງ­ເຮືອ ເຊິ່ງ​ເປັນ​ບຸນ​ປະ­ເພ­ນີ​ທີ່​ຄົນ​ລາວ​ເຮົາ ສືບ​ທອດ​ປະ­ຕິ­ບັດ​ກັນ​ມາ​ຫຼາຍ​ຮ້ອຍ​ປີ​ແລ້ວ ສິ່ງ​ທີ່​ຄົນ​ລາວ​ສາ­ມາດ​ວາດ​ພາບ​ອອກ​ມື້​ບຸນ­ຊ່ວງ­ເຮືອ​ນັ້ນ ກໍ​ຈະ​ມີ​ຫ້າງ​ຮ້ານ​ຂາຍ­ເຄື່ອງ​ຂອງ​ສິນ­ຄ້າ​ຕາມ​ຖະ­ໜົນ​ແຄມ​ຂອງ ແລະ ບໍ­ລິ­ເວນ​ໃກ້​ຄຽງ ເຊິ່ງ​ລວມ​ທັງ​ຮ້ານ​ເສບ​ງັນ​ດົນ­ຕີ​ໃຫ້​ຄວາມ​ບັນ­ເທີງ​ກິນ​ດື່ມ ເຊິ່ງ​ດູດ​ເງິນ​ເຂົ້າ​ກະ­ເປົາ​ຂອງ​ໃຜ​ບາງ​ຄົນ​ຢູ່​ບໍ່​ໜ້ອຍ ແຕ່​ວ່າ ປາ­ກົດ­ການ​ບາງ​ອັນ​ທີ່​ເກີດ​ຂຶ້ນ​ຍາມ​ງານ​ບຸນ­ຊ່ວງ­ເຮືອ​ນັ້ນ ກໍ​ຄື ການ​ໂຄ­ສະ­ນາ​ສິນ­ຄ້າ​ທີ່​ນຳ​ໃຊ້​ພາ­ສາ​ລາວ ບໍ່​ໄດ້​ຮັບ​ການ​ຊີ້​ແຈງ​ຄວບ​ຄຸມ​ເທົ່າ​ທີ່​ຄວນ.

    ພວກ​ເຮົາ​ບໍ່​ຄວນ​ລືມ​ວ່າ: ບຸນ­ຊ່ວງ­ເຮືອ ເປັນ​ບຸນ​ປະ­ເພ­ນີ-ການ​ຮັກ­ສາ​ຮີດ­ຄອງ​ປະ­ເພ­ນີ​ບໍ່​ແມ່ນ​ແຕ່​ການ​ຊ່ວງ​ເຮືອ​ເທົ່າ​ນັ້ນ ແຕ່​ການ​ຮັກ­ສາ​ພາ­ສາ​ໃຫ້​ສັງ­ຄົມ​ໄດ້​ໃຊ້​ຖືກ​ລະ­ບຽບ ກໍ​ແມ່ນ​ການ​ຄຸ້ມ​ຄອງ​ຮັກ­ສາ​ເອ­ກະ­ລັກ​ທາງ​ພາ­ສາ ຄຽງ​ຄູ່​ກັບ​ຮີດ­ຄອງ​ປະ­ເພ­ນີ ການ​ໂຄ­ສະ­ນາ​ສິນ­ຄ້າ​ຕາມ​ທີ່​ທ່ານ​ຜູ້​ອ່ານ​ຫາກ​ສັງ­ເກດ​ຫຼາຍ​ປີ­ຜ່ານ­ມາ ຍາມ​ບຸນ­ຊ່ວງ­ເຮືອ ບາງ​ຄົນ​ກໍ​ອາດ​ຕັ້ງ­ໃຈ​ຢືນ​ງ່ຽງ​ຫູ​ຟັງ ແລ້ວ​ອົມ​ຍິ້ມ​ໄປ​ນຳ ເມື່ອ​ໄດ້​ຟັງ​ເຄື່ອງ​ສຽງ​ເປີດ​ດັງ​ອອກ ທັງ​ຮູບ​ແບບ​ອັດ​ສຽງ​ໄວ້ ແລະ ເວົ້າ​ສົດ ເຊິ່ງ​ອາດ​ຍັງ​ມີ​ບາງ​ຄົນ ບາງ​ຮ້ານ​ເວົ້າ​ພາ­ສາ​ລາວ ຖືກ-ຜິດ ໄປ​ນຳ​ກັນ ພ້ອມ​ນີ້ ເຄື່ອງ​ສຽງ​ທີ່​ດັງ​ສະ​ນັ່ນ​ກໍ​ຍິ່ງ​ເຮັດ​ໃຫ້​ຜູ້​ຖື​ໄມ​ໂຄ­ສະ­ນາ​ສິນ­ຄ້າ​ເປັ່ງ­ສຽງ​ດັງ​ຂຶ້ນ ຈົນ​ເອັນ​ຄໍ​ພຶງ ເພື່ອ​ໃຫ້​ສຽງ​ຂອງ​ຕົນ​ດັງ​ຖ້ວມ​ໝູ່... ຂໍ​ແລກ­ປ່ຽນ​ນຳ​ທ່ານ​ຜູ້​ອ່ານ​ປະ­ເດັນ​ເຊັ່ນ​ວ່າ: ເວ­ລາ​ເຮົາ​ສົມ­ໂພດ​ພະ ເຮົາ​ນຳ​ເອົາ​ເຄື່ອງ​ສົມ­ໂພດ​ບາງ​ປະ­ເພດ​ມາ​ຈາກ​ຕ່າງ­ປະ­ເທດ ວັດ­ຖຸ​ບາງ​ອັນ​ຂຽນ​ພາ­ສາ​ອື່ນ ແລ້ວ​ປ່ອນ​ບື­ສິມ ເຊິ່ງ​ໃນ​ທຳ­ນອງ​ດຽວ​ກັນ ຖ້າ­ວ່າ​ການ​ນຳ​ໃຊ້​ພາ­ສາ​ລາວ​ທີ່​ບໍ່​ເໝາະ​ບໍ່​ຄວນ ມັນ​ອາດ​ຂະ­ຫຍາຍ​ວົງ​ກວ້າງ​ໃນ​ປີ​ຕໍ່​ໄປ.

    ພາ­ສາ​ລາວ​ໃນ​ການ​ໂຄ­ສະ­ນາ​ສິນ­ຄ້າ​ທີ່​ສະ­ແດງ​ອອກ​ທາງ​ເຄື່ອງ​ສຽງ​ນັ້ນ ມີ​ຄວາມ​ສຳ­ຄັນ​ພໍໆກັນ​ກັບ​ການ​ຂຽນ​ໃສ່​ປ້າຍ​ໂຄ­ສະ­ນາ ບໍ່​ວ່າ​ຂຽນ​ສັ້ນໆ ຫຼື ຂຽນ​ຍາວ ຕິດ​ຕັ້ງ​ໄວ້­ໜ້າ​ຮ້ານ ເພາະ­ວ່າ ຖ້າ​ເຮົາ​ຫາກ​ຄຸ້ມ​ຄອງ-ຊີ້​ແຈງ​ໃຫ້​ເຂົາ​ເຂົ້າ­ໃຈ​ແຈ້ງ ພຽງ­ພໍ​ກໍ​ເທົ່າ​ກັບ​ເປັນ​ການ​ເຫັນ​ຄວາມ​ສຳ­ຄັນ​ຕໍ່​ການ​ນຳ​ໃຊ້​ພາ­ສາ ໃຫ້​ຖືກ​ຕາມ​ຫຼັກ​ຂອງ​ພາ­ສາ​ທີ່​ຄວນ​ຈະ​ເປັນ ອີກ​ປະ­ເດັນ​ໜຶ່ງ ທີ່​ໜີ​ບໍ່​ມົ້ມ ແກ້​ໄດ້​ຍາກ​ຄື​ເລື່ອງ​ຝາກ​ລົດ ເຖິງ​ແມ່ນ​ວ່າ​ຄະ­ນະ​ກຳ­ມະ­ການ​ໄດ້​ອອກ​ລະ­ບຽບ​ແຈ້ງ​ລາ­ຄາ​ໄວ້​ແລ້ວ ແຕ່​ຜູ້​ຮັບ​ເໝົາ​ຕໍ່​ມາ​ຜັດ​ເກັບ​ລື່ນ​ແຈ້ງ​ການ ເຊິ່ງ​ສ້າງ​ຄວາມ​ບໍ່​ພໍ­ໃຈ​ແກ່​ມວນ​ຊົນ.

    ເລື່ອງ​ຄ່າ​ປີ້​ຝາກ​ລົດ​ນີ້ ຂໍ​ໃຫ້​ແຈ້ງ​ລະ­ບຽບ​ລາ­ຄາ​ທຸກ​ປີ​ນໍ ! ເພື່ອ​ບໍ່​ໃຫ້​ທຸກ​ຝ່າຍ​ເອົາ​ປຽບ​ກັນ ກຳ­ມະ­ການ​ຄວນ​ຊີ້​ແຈງ​ຜູ້​ຮັບ​ເໝົາ​ຝາກ​ລົດ​ລະ­ອຽດ ເພາະ​ທຸກ​ປີ­ຜ່ານ­ມາ ຫຼາຍ​ຄົນ​ກໍ​ໄດ້​ຍິນ​ສຽງ​ຈົ່ມ ແຕ່​ເຮັດ​ຫຍັງ​ບໍ່​ໄດ້ ບັນ­ຫາ​ນີ້​ຂໍ​ແລກ­ປ່ຽນ​ສ້າງ​ທາງ​ອອກ​ໂປ່ງ​ໃສ​ນຳ​ກັນ​ນໍ !.

ຂ່າວທີ່ກ່ຽວຂ້ອງ