ຂ່າວຫຼ້າສຸດ

ການ​ພັດທະນາ​ຂອງ​ເສດ​ຖະ​ກິດ​ຈີນ ​​ໃນ​ຮອບ 70 ປີ​ຜ່ານ​ມາ

117 30 ກ.ຍ. 2019 ຂ່າວຕ່າງປະເທດ
ການ​ພັດທະນາ​ຂອງ​ເສດ​ຖະ​ກິດ​ຈີນ ​​ໃນ​ຮອບ 70 ປີ​ຜ່ານ​ມາ

   ຖ້າ​ຄິດໄລ່​ຕາມ​ລາຄາ​ທີ່​ຄົງ​ຕົວ ຍອດ​ມູນ​ຄ່າ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ຈີນ​ໃນ​ປີ 2018 ໄດ້​ເພີ່ມ​ຂຶ້ນ 174 ເທົ່າ​ເມື່ອ​ທຽບໃສ່​ປີ 1952 ຈາກ​ປະເທດ​ທີ່​ທຸກ​ຍາກ ແລະ ​ອ່ອນແອ ໄດ້​ພັດທະນາ​ໃຫ້​ກາຍເປັນ​ພື້ນຖານ​ເສດຖະກິດ​ໃຫຍ່​ອັນ​ດັບ 2 ຂອງ​ໂລກ “ຄວາມ​ມະຫັດສະຈັນ​ຈີນ” ໄດ້​ດຶງ​ດູດ​ສາຍຕາ​ຂອງ​ທົ່ວ​ໂລກ. ໃນ​ຮອບ 70 ປີຜ່ານມາ ເສດຖະກິດ​ຈີນ​ໄດ້​ເຂັ້ມແຂງ​ຂຶ້ນ​ເປັນ​ກ້າວໆ. ເມື່ອ​ປີ 1952 GDP ຂອງ​ຈີນ ມີ​ພຽງ 67,9 ຕື້​ຢວນ​ເທົ່າ​ນັ້ນ ແຕ່​ຮອດ​ປີ 2010 ໄດ້​ຫຼາຍ​ກວ່າ​ຍີ່ປຸ່ນ ແລະ ​ຄອງ​ຖານະ​ອັນ​ດັບ 2 ຂອງ​ໂລກ​ໃນ​ຫຼາຍ​ປີ​ລຽນຕິດ.

    ໃນ​ຮອບ 70 ປີ​ມາ​ນີ້ ຈີນ​ໄດ້​ເປີດ​ປະຕູ​ສູ່​ພາຍ​ນອກ ນັບ​ມື້​ນັບ​ກວ້າງ​ອອກ. ເມື່ອ​ປີ 1950 ມູນ​ຄ່າ​ການ​ຄ້າ​ກັບ​ຕ່າງປະເທດ​ຂອງ​ຈີນ ມີ​ພຽງ 1,13 ຕື້​ໂດ​ລາ​ສະຫະລັດ​ເທົ່າ​ນັ້ນ ແຕ່​ຮອດ​ປີ 2018 ຍອດ​ມູນ​ຄ່າ​ສິນຄ້າ​ຂາ​ເຂົ້າຂາ​ອອກ​ໄດ້​ບັນລຸ 4.600 ຕື້​ໂດ​ລາ​ສະຫະລັດ ເພີ່ມ​ຂຶ້ນ​ຫຼາຍ​ກວ່າ 4000 ເທົ່າ.

    ໃນ​ຮອບ 70 ປີຜ່ານມາ ການ​ພັດທະນາ​ຂອງ​ຈີນ ໄດ້​ມີ​ຄຸນ​ນະ​ພາບ​ນັບ​ມື້​ນັບ​ສູງ​ຂຶ້ນ. ເມື່ອ​ປີ 1952 ມູນ​ຄ່າ​ເພີ່ມ​ດ້ານ​ກະສິກຳ​ກວມ GDP ຂອງ​ຈີນ​ສູງ​ເຖິງ 50,5% ແຕ່​ຮອດ​ປີ 2018 ອັດຕາ​ສ່ວນ​ຂອງ​ມູນ​ຄ່າ​ເພີ່ມ​ດ້ານ​ກະສິກຳ ໄດ້​ຫຼຸດ​ລົງ​ເປັນ 7,2% ໃນ​ຂະນະ​ທີ່​ການ​ພັດທະນາ​ຂອງ​ຈີນ​ໄດ້​ຈາກ​ຮູບ​ແບບ​ຖື​ກະສິກຳ​ເປັນ​ຫຼັກ ຫັນ​ເປັນ​ຮູບ​ແບບ 3 ຂະແໜງການ​ໃຫຍ່​ປະສົມ​ປະສານ​ກັນ.

     ໃນ​ຮອບ 70 ປີ ກຳລັງ​ເສດຖະກິດ​ຂອງ​ຈີນ​ໄດ້​ເຕີບ​ໂຕ​ຂຶ້ນ​ຢ່າງ​ວ່ອງໄວ. ມາດຕາ​ສ່ວນ​ຂອງ GDP ຈີນ​ໃນ​ເສດຖະກິດ​ໂລກ​ໄດ້​ເພີ່ມ​ຈາກ 1,8% ໃນ​ປີ 1978 ຂຶ້ນ​ເປັນ​ເກືອບ 16% ໃນ​ປີ 2018. ນັບ​ແຕ່​ປີ 2006 ເປັນຕົ້ນ​ມາ ອັດຕາ​ປະກອບສ່ວນ​ຂອງ​ຈີນ ທີ່​ມີ​ຕໍ່​ການ​ເຕີບ​ໂຕ​ຂອງ​ເສດຖະກິດ​ໂລກ​ໄດ້​ຄອງ​ຖານະ​ອັນ​ດັບ 1 ຂອງ​ໂລກ ຊຶ່ງ​ເຮັດ​ໃຫ້​ຈີນ​ໄດ້​ກາຍເປັນ​ພະລັງ​ແມ່​ແຮງ​ອັນ​ດັບ 1 ຂອງ​ໂລກ​ທີ່ແທ້​ຈິງ.

     ຈີນ​ໃນ​ຍຸກ​ປະຈຸ​ບັນ ໄດ້​ກາຍເປັນ​ປະເທດ​ອຸດສາຫະກຳ​ໃຫຍ່​ອັນ​ດັບ 1 ປະເທດ​ການ​ຄ້າ​ໃຫຍ່​ອັນ​ດັບ 1 ປະເທດ​ທີ່​ມີ​ຄັງ​ສຳຮອງ​ເງິນຕາ​ຕ່າງປະເທດ​ຫຼາຍ​ທີ່​ສຸດ ແລະ ​ປະເທດ​ທີ່​ຮັບ​ເອົາ​ທຶນ​ຕ່າງປະເທດ​ຫຼາຍ​ອັນ​ດັບ 2 ຂອງ​ໂລກ.

     ທ່ານ ຕີ​ຈາ​ນີ ມູ​ຮາ​ມັດ ບານ​ເດ ປະທານ​ສະມັດຊາ​ໃຫຍ່​ສະຫະ​ປະຊາ​ຊາດ​ກ່າວ​ວ່າ ໃນ​ຮອບ 70 ປີຜ່ານມາ​ນີ້ ຈີນ​ໄດ້​ພັດທະນາ​ຕົນ​ເອງ​ຈາກ​ປະເທດ​ທີ່​ທຸກ​ຍາກ​ທີ່​ສຸດ ໃຫ້​ກາຍເປັນ​ປະເທດ​ທີ່​ປະກອບສ່ວນ​ເຂົ້າ​ໃນ​ການ​ບໍລິຫານ​ຂອງ​ໂລກ​ນັບ​ມື້​ນັບ​ຫຼາຍ ແລະ ​ມີ​ບົດບາດ​ຊຸກຍູ້​ຕໍ່​ເສດຖະກິດ​ໂລກ​ໂດຍ​ສະເພາະ​ແມ່ນ​ປະເທດ​ທີ່​ພວມ​ພັດທະນາ​ນັບ​ມື້​ນັບ​ຫຼາຍ. ນີ້​ເປັນ​ການ​ປະກອບສ່ວນ​ທີ່​ໃຫຍ່​ຫຼວງ​ທີ່​ສຸດ​ຕໍ່​ການ​ພັດທະນາ​ຂອງ​ມວນ​ມະນຸດ. ທົ່ວ​ສັງຄົມ​ຈີນ​ເຕັມ​ໄປ​ດ້ວຍ​ພະລັງ​ຊີວິດ​ຊີວາ ໂສມ​ໜ້າ​ມີ​ການ​ປ່ຽນແປງ​ໃໝ່​ເລື້ອຍໆ ການ​ພັດທະນາ​ຂອງ​ຈີນ ມີ​ອະນາຄົດ​ສົດໃສ​ທີ່​ສະຫວ່າງ​ສະໄຫວ.

    ແຫຼ່ງ​ຂ່າວ​ຂອງ​ຈີນ ກໍ​ລາຍ​ງານ​ວ່າ ຕະຫຼອດ​ໄລຍະ​ແຫ່ງ​ການ​ສະຖາປະນາ​ສາທາລະນະ​ລັດ​ປະຊາຊົນ​ຈີນ ໃກ້​ຈະ​ຄົບຮອບ 70 ປີ ເສດຖະກິດ​ຈີນ ໄດ້​ພັດທະນາ​ແບບ​ກ້າວ​ກະໂດດ​ຂັ້ນ. ເມື່ອ​ສັງເກດ​ຈາກ​ຕົວ​ເລກ​ສະຖິຕິ​ແລ້ວ​ເຫັນ​ວ່າ GDP ຂອງ​ຈີນ​ໃນ​ປີ 2018 ເພີ່ມ​ຂຶ້ນ 174 ເທົ່າ​ເມື່ອ​ທຽບໃສ່​ປີ 1952 ຊຶ່ງ​ໄດ້​ກວມ​ເກືອບ 16% ຂອງ​ເສດຖະກິດ​ໂລກ. ປະລິມານ​ການ​ຄ້າ​ກັບ​ຕ່າງປະເທດ​ຂອງ​ຈີນ​ຈາກ 1,13 ຕື້​ໂດ​ລາ​ສະຫະລັດ ໃນ​ປີ 1950 ເພີ່ມ​ຂຶ້ນ​ເປັນ 4.600 ຕື້​ໂດ​ລາ​ຫະ​ຫະ​ລັດ​ໃນ​ປີ 2018 ຊຶ່ງ​ເພີ່ມ​ຂຶ້ນ 4000 ກວ່າ​ເທົ່າ.

    ເມື່ອ​ສັງເກດ​ຈາກ​ໂຄງ​ປະກອບ​ແລ້ວ ເຫັນ​ວ່າ ໂຄງ​ປະກອບ​ດ້ານ​ການ​ຄ້າ​ກັບ​ຕ່າງປະເທດ​ຂອງ​ຈີນ​ໄດ້​ຖືກ “ຍົກ​ລະດັບ​ໃຫ້​ສູງ​ຂຶ້ນ​ດ້ວຍ​ຄຸນ​ນະ​ພາບ​ສູງ” ຈາກ “ການ​ຂາຍ​ເຂົ້າ” (ຜະລິດ​ຕະ​ພັນ​ມູນ​ຄ່າ​ຕ່ຳ) ກາຍເປັນ “ຂາຍ​ຜະລິດ​ຕະ​ພັນ​ລົດໄຟ​ຄວາມ​ໄວ​ສູງ” (ຜະລິດ​ຕະ​ພັນ​ທີ່​ມີ​ມູນ​ຄ່າ​ເພີ່ມ​ສູງ). ໂຄງ​ປະກອບ​ເສດຖະກິດ​ຈີນ ຈາກ​ການ​ຖື​ເອົາ​ວຽກ​ງານ​ກະສິກຳ​ເປັນຕົ້ນ​ຕໍ​ໃນ​ຕົ້ນ​ຊຸມ​ປີ 1950 ກາຍ​ມາ​ເປັນ​ການ​ຢຶດ​ຖື “ວຽກ​ງານ​ການ​ບໍລິການ​ເປັນຕົ້ນ​ຕໍ ແລະ  3 ອຸດສາຫະກຳ ໄດ້​ພັດທະນາ​ໄປ​ຄຽງ​ຄູ່​ກັນ” ໃນ​ປີ 2018.

    ແຫຼ່ງ​ຂ່າວ​ຂອງ​ຈີນ ເຫັນ​ວ່າ ພຽງ​ແຕ່​ໄລຍະ 70 ປີ​ເທົ່າ​ນັ້ນ ຈີນ​ຈາກ​ປະເທດ​ທີ່​ມີ​ພື້ນຖານ​ເສດຖະກິດ​ອ່ອນແອ ແລະ  ມີ​ລະດັບ​ວິທະຍາສາດ​ເຕັກ​ໂນ​ໂລ​ຊີ​ທີ່​ຫຼ້າຫຼັງ ກາຍ​ມາ​ເປັນ​ປະເທດ​ອຸດສາຫະກຳ​ໃຫຍ່​ອັນ​ດັບ 1 ປະເທດ​ການ​ຄ້າ​ສິນຄ້າ​ປະເພດ​ຈັບ​ຕ້ອງ​ໄດ້​ໃຫຍ່​ອັນ​ດັບ 1 ປະເທດ​ມີ​ຄັງ​ສຳຮອງ​ເງິນຕາ​ຕ່າງປະເທດ​ຫຼາຍ​ທີ່​ສຸດ ແລະ  ປະເທດ​ທີ່​ສາມາດ​ດຶງ​ດູດ​ການ​ລົງທຶນ​ຕ່າງປະເທດ​ຫຼາຍ​ເປັນ​ອັນ​ດັບ 2 ຂອງ​ໂລກ.

    ຈີນ​ຕັ້ງໜ້າ​ສົ່ງເສີມ​ລັດທິ​ຫຼາຍ​ຝ່າຍ ໄດ້​ສະເໜີ​ຂໍ້​ລິ​ເລີ່ມ “ໜຶ່ງ​ແລວ​ໜຶ່ງ​ເສັ້ນທາງ” ແລະ  ແນວ​ຄວາມ​ຄິດ “ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ” ຊຶ່ງ​ເປັນ​ການ​ປະກອບສ່ວນ​ອັນ​ຕັ້ງໜ້າ​ຕໍ່​ການ​ປົກຄອງ​ທົ່ວ​ໂລກ​ດ້ວຍ​ການ​ກະທຳ​ຕົວ​ຈິງ​ຂອງ​ຕົນ. ນີ້​ບໍ່​ແມ່ນ​ເລື່ອງ​ທີ່​ເກີດ​ຂຶ້ນ​ແບບ​ບັງເອີນ ຊຶ່ງ​ຕົ້ນຕໍ​ແມ່ນ​ຍ້ອນ​ວ່າ​ຈີນ​ໄດ້​ຢຶດ​ໝັ້ນ​ເສັ້ນທາງ​ສັງຄົມ​ນິຍົມ ແລະ  ຢຶດ​ໝັ້ນ​ການ​ເດີນ​ຕາມ​ເສັ້ນທາງ​ທີ່​ສອດຄ່ອງ​ກັບ​ສະພາບ​ຄວາມ​ເປັນ​ຈິງ​ແຫ່ງ​ຊາດ​ຂອງ​ຕົນ.

 

ຂ່າວທີ່ກ່ຽວຂ້ອງ