ຂ່າວຫຼ້າສຸດ

NASA ​ເຊັນ​ສັນຍາ​ກັບ Lockheed Martin ​ໃນ​ການ​ຜະລິດ​ຍານ​ອາ​ວະ​ກາດ

104 30 ກ.ຍ. 2019 ຂ່າວຕ່າງປະເທດ
NASA ​ເຊັນ​ສັນຍາ​ກັບ Lockheed Martin ​ໃນ​ການ​ຜະລິດ​ຍານ​ອາ​ວະ​ກາດ

    ເພື່ອ​ຫັນ​ສູ່​ການ​ປະຕິບັດ​ແຜນການ ນຳ​ເອົາ​ນັກ​ບິນ​ອາ​ວະ​ກາດ ກັບ​ໄປ​ສຳ​ຫຼວດ​ດວງ​ຈັນ ໃນ​ປີ 2024 ນັ້ນ ອົງການ​ການບິນ​ອາ​ວະ​ກາດ ສ ອາ​ເມ​ຣິ​ກາ (NASA) ຈຶ່ງ​ໄດ້​ລົງ​ນາມ​ສັນຍາ​ມູນ​ຄ່າ 2,7 ຕື້​ໂດ​ລາ​ສະຫະລັດ ໃນ​ການ​ຈ້າງ​ບໍລິສັດ ລັອກ​ຮິດ ມາ​ຕິນ (Lockheed Martin) ຜະລິດ​ຍານ​ກະສວຍ Orion ຈຳນວນ 3 ລຳ ເພື່ອ​ຂຶ້ນ​ໄປ​ລົງ​ຈອດ​ທີ່​ດວງ​ຈັນ.

    ແຈ້ງ​ການ​ຂອງ NASA ທີ່​ມີ​ອອກ​ມາ​ເມື່ອ​ວັນ​ທີ 23 ກັນຍາ​ທີ່​ຜ່ານ​ມາ ໃຫ້​ຮູ້​ວ່າ ຍານ​ກະສວຍ​ດັ່ງກ່າວ​ແຕ່​ລະ​ລຳ ຄາດ​ວ່າ​ມີ​ຄວາມ​ສາມາດ​ນຳ​ເອົາ​ນັກ​ບິນ​ອາ​ວະ​ກາດ 4 ຄົນ ບິນ​ຂຶ້ນ​ສູ່​ຮ່ວງ​ອາ​ວະ​ກາດ. ເພື່ອ​ຮັບ​ໃຊ້​ໃຫ້​ແກ່​ການ​ສຳ​ຫຼວດ​ດວງ​ຈັນ​ນັ້ນ NASA ຄາດ​ວ່າ​ຈະ​ສັ່ງ​ຈອງ​ຍານ​ກະສວຍ​ອື່ນໆ​ຕື່ມ​ອີກ 3 ລຳ ກັບ Lockheed Martin ໃນ​ສັນຍາ​ມູນ​ຄ່າ 1,9 ຕື້​ໂດ​ລາ​ສະຫະລັດ ໃນ​ສົກ​ການ​ເງິນ 2022. ໃນ​ຂະນະ​ດຽວ​ກັນ NASA ກໍ​ວາງ​ຄາດໝາຍ​ທີ່​ມີ​ຄວາມ​ຫວັງ​ຫຼາຍ​ກວ່າ​ນັ້ນ ກໍ​ຄື​ຍານ​ກະສວຍ​ຕື່ມ​ອີກ 6 ລຳ.

    ຍານ​ກະສວຍ Orion ມີໜ້າ​ທີ່​ນຳ​ເອົາ​ພວກ​ນັກ​ບິນ​ອາ​ວະ​ກາດ ຂຶ້ນ​ເມືອ​ຍັງ​ດວງ​ຈັນ ແລະ​ກັບ​ຄືນ​ສູ່​ໂລກ ກໍ​ຄື​ມີ​ຄວາມ​ສາມາດ​ພໍ​ໃນ​ການບິນ​ໄປ​ຍັງ​ດາວ​ອັງຄານ ແລະ​ໄກ​ກວ່າ​ນັ້ນ. ຫ້ອງ​ຮັບ​ໃຊ້​ຂອງ​ຍານ Orion ຈະ​ເປັນ​ເຂດ​ສຳຄັນ​ເພື່ອ​ຮັກສາ​ການ​ມີ​ຊີວິດ​ໃຫ້​ແກ່​ບັນດາ​ນັກ​ບິນ​ອາ​ວະ​ກາດ ໃນ​ເວລາ​ທີ່​ພວມ​ປະຕິບັດ​ພາລະກິດ​ຢູ່​ໃນ​ຮ່ວງ​ອາ​ວະ​ກາດ. ຍານ​ກະສວຍ Orion ໄດ້​ຮັບ​ການ​ອອກ​ແບບ ເພື່ອ​ນຳ​ກັບ​ມາ​ໃຊ້​ອີກ​ຢ່າງ​ໜ້ອຍ 1 ເທື່ອ.

     ເມື່ອ​ເດືອນ​ກໍລະກົດ ປີ 1969 ນັກ​ບິນ​ອາ​ວະ​ກາດ​ຂອງ ສ ອາ​ເມ​ຣິ​ກາ ທີ່​ມີ​ຊື່ວ່າ ເນ​ອິນ ອາມ​​ສ​ຕຣອງ ພ້ອມ​ດ້ວຍ​ຍານ​ກະສວຍ Apollo 11 ໄດ້​ບັນທຶກ​ຊື່​ສຽງ​ໄວ້​ໃນ​ເຫດການ​ປະຫວັດສາດ ເມື່ອ​ເຂົາ​ກາຍເປັນ​ມະນຸດ​ຄົນ​ທຳ​ອິດ​ຂອງ​ໂລກ ຂຶ້ນ​ໄປ​ຢຽບ​ດວງ​ຈັນ. ພາຍ​ໃນ​ເວລາ 3 ປີ ຄື​ແຕ່​ປີ 1969-1972 ສ ອາ​ເມ​ຣິ​ກາ ໄດ້​ສົ່ງ​ຍານ​ອາ​ວະ​ກາດ​ທີ່​ມີ​ມະນຸດ​ຂັບ​ຂີ່ ຂຶ້ນ​ໄປ​ຍັງ​ດວງ​ຈັນ 6 ເທື່ອ. ມາ​ຮອດ​ເວລາ​ນີ້ ມີ​ພຽງ​ຣັດ​ເຊຍ ແລະ​ຈີນ ທີ່​ມີ​ການ​ຂຶ້ນ​ໄປ​ຍັງ​ດວງ​ຈັນ ແຕ່​ວ່າ​ຕ່າງ​ກໍ​ເປັນ​ການ​ໃຊ້​ອຸປະກອນ​ເຄື່ອນ​ຕົວ​ດ້ວຍ​ມັນ​ເອງ ໂດຍ​ບໍ່​ມີ​ຄົນ​ຂັບ​ຂີ່.

ຂ່າວທີ່ກ່ຽວຂ້ອງ