...ຢາເສຍສາວ...

5.122 27 ກ.ຍ. 2019 ນານາສາລະ

    ຄົນ​ລາວ​ເຮົາ​ມີ​ພາ­ສິດ​ບົດ​ໜຶ່ງ​ສອນ​ວ່າ: ແມງ​ເມົ່າ​ບິນ​ເຂົ້າ​ກອງ​ໄຟ ເຊິ່ງ​ກິນ​ຄວາມ​ໝາຍ​ເລິກ​ພໍ​ສົມ­ຄວນ ເຖິງ​ແມ່ນ​ວ່າ​ຈະ​ເປັນ​ປະ­ໂຫຍກ​ສັ້ນໆ ແມງ​ເມົ່າ​ນັ້ນ​ອອກ​ຈາກ​ຮູ ເຄີຍ​ຢູ່​ທີ່​ມືດ​ມາ​ກ່ອນ ເມື່ອ​ເຖິງ​ເວ­ລາ​ອອກ​ຈາກ​ຮູ​ຂຶ້ນ​ມາ​ມືນ​ຕາ​ເບິ່ງ​ໂລກ​ແຈ້ງ​ພົບ​ກັບ​ແສງ​ໄຟ ກໍ​ຫຼົງ​ຄິດ​ໄປ​ວ່າ​ມັນ​ປອດ​ໄພ ເລີຍ​ບິນ​ເຂົ້າ​ໃກ້​ກອງ​ໄຟ ເພື່ອ​ຊື່ນ​ຊົມ​ແສງ​ສະ­ຫວ່າງ ເຊິ່ງ​ມັນ​ສະ­ທ້ອນ​ຫຼາຍ​ມິ​ຕິ​ໃຫ້​ທຸກ​ຄົນ​ໄດ້​ຄິດ​ນຳ​ກັນ ຍົກ​ຕົວ­ຢ່າງ: ບາງ​ສັງ­ຄົມ​ໃນ​ໂລກ ກໍ​ຫຼົງ​ເຫີ່​ສິດ­ທິ​ສະ­ເໝີ­ພາບ ຈົນ​ຫຼົງ​ລືມ​ຮາກ​ເຫງົ້າ​ຮີດ­ຄອງ​ປະ­ເພ­ນີ​ດີ­ງາມ​ແຕ່​ເກົ່າ​ຫຼັງ​ກໍ​ມີ.

    ໂລກ​ນີ້​ຍັງ​ມີ​ອາ­ຫານ​ໃຈ ແລະ ອາ­ຫານ​ຫຼາຍ​ປະ­ເພດ ທີ່​ມັນ​ສາ­ມາດ​ຫຼອກ​ລໍ້​ໃຫ້​ຄົນ­ຮູ້​ບໍ່​ທັນ​ເກມ​ຄົນ​ສະ­ຫຼາດ​ແກມ​ໂກງ ເຊີດ​ຊູ​ໂຄ­ສະ­ນາ​ມາ​ລວງ​ໃຫ້​ຄົນ​ຫຼົງ​ເຫີ່ ເຊິ່ງ​ສາ­ມາດ​ສະ­ທ້ອນ​ໃຫ້​ຄິດ​ໄດ້​ວ່າ ຖ້າ​ວັດ­ທະ­ນະ­ທຳ​ພາຍ​ໃນ​ບໍ່​ເຂັ້ມ­ແຂງ ແລະ ຄົນ​ຂາດ​ຫຼັກ​ຄິດ​ແລ້ວ ກໍ​ຈະ​ຫຼົງ​ເອີ​ນໍ​ກັບ​ຄົນ​ຊາດ​ອື່ນ​ໄປ​ທຸກ​ເລື່ອງ ທັງໆ​ທີ່​ບາງ​ສັງ­ຄົມ​ທີ່​ເຊື່ອ​ວ່າ​ມັນ​ຈະ­ເລີນ​ໃນ​ໂລກ ເຂົາ​ກໍ​ເຖິງ​ຈຸດ​ແຕກ​ແຍກ ສະ​ຖາ​ບັນ​ຄອບ­ຄົວ​ກໍ​ວຸ້ນ­ວາຍ​ສັບ­ສົນ ກົດ­ໝາຍ​ນັ້ນ ແນ່­ນອນ​ມັນ​ຄວບ​ຄຸມ​ພຶດ­ຕິ​ກຳ ແຕ່​ສິນ​ລະ​ທຳ ແລະ ຮີດ­ຄອງ​ປະ­ເພ­ນີ​ນັ້ນ ມັນ​ສາ­ມາດ​ປຸງ​ແຕ່ງ​ໃຫ້​ຄົນ​ປະ­ພຶດ​ດີ­ງາມ​ໄດ້.

    ຂ່າວ​ດັງ​ເລື່ອງ​ການ​ວາງ­ຢາ ຫຼື ຢາ​ເສຍ​ສາວ​ຕາມ​ຮ້ານ​ບັນ­ເທີງ​ຕ່າງໆ ເປັນ​ທີ່​ສົນ­ໃຈ​ຂອງ​ສັງ­ຄົມ ເພາະ​ຜູ້​ຕົກ​ເປັນ​ເຫຍື່ອ​ອາດ​ເສຍ­ໂຕ ເສຍ​ຊັບ ຫຼື ບາງ​ກໍ­ລະ­ນີ​ຮຸນ​ແຮງ​ເຖິງ​ຂັ້ນ​ເສຍ​ຊີ­ວິດ​ກໍ​ມີ ຢາ​ເສຍ​ສາວ ຫຼື ເສຍ​ໜຸ່ມ​ນີ້ ມີ​ຊື່​ທາງ​ການ​ວ່າ GHB=gamma-Hydroxybutyric ເຊິ່ງ​ມີ​ທັງ​ຊະ­ນິດ​ເມັດ ແລະ ຜົງ ຫຼື ນ້ຳ ມີ​ລົດ​ຊາດ​ເຄັມ ສາ­ມາດ​ກົມ​ກືນ​ກັບ​ເຄື່ອງ​ດື່ມ ແຕ່​ສຳ­ລັບ​ຕະ­ຫຼາດ​ມືດ​ຈະ​ເອີ້ນ​ວ່າ Liquiol E ຫຼື Liquid X ຜູ້​ຖືກ​ວາງ­ຢາ​ຈະ​ມີ​ອາ­ການ​ຕ່າງ​ກັນ ຂຶ້ນ​ກັບ​ປະ­ລິ­ມານ​ໜ້ອຍ​ຫຼາຍ ອາ­ການ​ຜູ້​ຖືກ​ວາງ­ຢາ​ຈະ​ມຶນ​ງົງ ປຸ້ນ­ທ້ອງ ຮາກ ຫຼື ມີ​ຄວາມ​ສະ­ໜຸກ​ເພີດ­ເພີນ... ເຂົ້າ­ໃຈ​ວ່າ​ຄົງ​ບໍ່​ຕ້ອງ​ອະ­ທິ­ບາຍ​ກຸ່ມ​ເປົ້າ​ໝາຍ​ຍາກ ເພາະ​ເຫຍື່ອ​ຕ້ອງ​ມີ​ລັກ­ສະ­ນະ​ໜ້າ​ຕາ​ດີ ຖາ­ນະ​ດີ ຫຼື ເວົ້າ​ສັ້ນ​ໄດ້​ວ່າ ເປົ້າ​ໝາຍ​ທີ່​ຫວັງ​ຜົນ.

    ເຫັນ​ວ່າ​ຂ່າວ​ຢາ​ເສຍ​ສາວ​ຫາງ​ສຽງ​ບາງ​ບ່ອນ ກໍ​ແນະ­ນຳ​ໃຫ້​ຜູ້​ທ່ຽວ​ມ່ວນ­ຊື່ນ​ລະ­ວັງ​ເລື່ອງ​ການ​ຕຳ​ຈອກ ສ່ວນ​ຕົວ​ຄິດ​ວ່າ ວິ­ທີ​ໄດ້­ຜົນ​ແທ້​ຍ່ອມ​ຕ້ອງ​ອາ­ໄສ​ການ­ຈັດ­ຕັ້ງ​ເຂັ້ມ​ງວດ​ກັບ​ສະ­ຖານ​ບັນ­ເທີງ ມີ​ລະ­ບຽບ​ເຄັ່ງ​ຄັດ (ປັບ​ໃໝ​ໃສ່​ໂທດ​ຄົນ​ຜິດ) ຢ່າ​ລືມ​ວ່າ​ເລື່ອງ​ບັນ­ເທີງ​ມ່ວນ­ຊື່ນ​ມີ​ທຸກ​ສັງ­ຄົມ ແຕ່​ເຮັດ​ແນວ­ໃດ​ຈະ​ບໍ່​ໃຫ້​ພວກ​ກຸ່ມ​ຄົນ​ບໍ່​ດີ​ກໍ່​ເຫດ ຄວາມ​ຈິງ​ສຳ­ລັບ​ສັງ­ຄົມ​ໃດ​ໜຶ່ງ​ທີ່​ກຳ­ລັງ​ພັດ­ທະ­ນາ ກໍ​ຍ່ອມ​ມີ​ຫຼາຍ​ແນວ​ໜ້າ​ເປັນ​ຫ່ວງ ບໍ່​ຄວນ​ເອົາ​ຢ່າງ​ແມງ​ເມົ່າ​ກັບ​ກອງ​ໄຟ.

ຂ່າວທີ່ກ່ຽວຂ້ອງ