ຂ່າວຫຼ້າສຸດ

ເຊີນທ່ຽວງານປະເພນີແຂ່ງເຮືອຍາວ-ງານຕະຫຼາດນັດ ທີ່ສວນນໍ້າອິນແປງ

1.029 27 ກ.ຍ. 2019 ວົງຈອນກີລາ
ເຊີນທ່ຽວງານປະເພນີແຂ່ງເຮືອຍາວ-ງານຕະຫຼາດນັດ ທີ່ສວນນໍ້າອິນແປງ

    ບໍ­ລິ­ສັດ ອິນ​ແປງ ກຣຸບ ຈຳ­ກັດ ຮ່ວມ​ກັບ​ສະ­ຫະ­ພັນ​ກີ­ລາ​ເຮືອ​ຊ່ວງ ນະ­ຄອນ­ຫຼວງ​ວຽງ​ຈັນ (ນວ) ຈັດ​ງານ​ປະ­ເພ­ນີ​ແຂ່ງ­ຂັນ​ຊ່ວງ​ເຮືອ​ສູດ​ຍາວ ປະ­ເພດ 55 ສີ­ພາຍ ແລະ ງານ​ຕະ­ຫຼາດ­ນັດ (ວາງ­ສະ­ແດງ​ສິນ­ຄ້າ) ເພື່ອ​ອະ­ນຸ­ລັກ​ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ຈັດ​ຂຶ້ນ​ລະ­ຫວ່າງ​ວັນ​ທີ 28-29 ກັນ­ຍາ ນີ້ ທີ່​ສວນ​ນ້ຳ​ອິນ​ແປງ ຣີ​ເວີ​ໄຊ້ ບ້ານ​ດົງ​ໂພ​ສີ ເມືອງ​ຫາດ​ຊາຍ​ຟອງ ນວ.

    ພິ­ທີ​ຈົກ​ສະ­ຫຼາກ​ແບ່ງ​ກຸ່ມ ງານ​ແຂ່ງ­ຂັນ​ຊ່ວງ​ເຮືອ​ຄັ້ງ​ນີ້ ຈັດ​ຂຶ້ນ​ໃນ​ວັນ​ທີ 25 ກັນ­ຍາ 2019 ທີ່​ສວນ​ນ້ຳ​ອິນ​ແປງ ໂດຍ​ມີ​ທ່ານ ສຸກ​ສະ­ຫວັນ ບຸດ​ຕະ​ວົງ ຮອງ​ເຈົ້າ­ເມືອງ​ຫາດ​ຊາຍ​ຟອງ ມີ​ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພະ​ແນກ​ສຶກ​ສາ​ທິ​ການ ແລະ ກີ­ລາ ທ່ານ ພິມ​ມະ​ສອນ ຈັນ­ທະ​ວົງ ຫົວ­ໜ້າ​ຫ້ອງ­ການ​ບໍ­ລິ­ສັດ ອິນ​ແປງ ກຣຸບ ມີ​ຜູ້­ຕາງ­ໜ້າ​ຈາກ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ​ຫາດ​ຊາຍ​ຟອງ ສະ­ຫະ­ພັນ​ກີ­ລາ​ເຮືອ​ຊ່ວງ ນວ ພ້ອມ​ດ້ວຍ​ຄະ­ນະ​ຮັບ­ຜິດ­ຊອບ ຄະ­ນະ​ກຳ­ມະ­ການ​ເຕັກ­ນິກ​ຈັດ­ການ​ແຂ່ງ­ຂັນ​ຊ່ວງ​ເຮືອ ຄະ­ນະ​ເຮືອ​ຊ່ວງ ແລະ ແຂກ​ຖືກ​ເຊີນ ເຂົ້າ​ຮ່ວມ.

    ທ່ານ ສຸກ​ສະ­ຫວັນ ບຸດ​ຕະ​ວົງ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ເພື່ອ​ເປັນ​ການ​ສ້າງ​ຂະ​ບວນ​ການ​ຄຳ ນັບ​ຮັບ​ຕ້ອນ​ປີ​ທ່ອງ​ທ່ຽວ​ລາວ-ຈີນ ດຶງ​ດູດ​ເອົາ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ໃນ​ປະ­ເທດ ເວົ້າ​ລວມ ເວົ້າ​ສະ ເພາະ​ນະ­ຄອນ­ຫຼວງ​ວຽງ​ຈັນ ກໍ​ຄື ເມືອງ​ຫາດ​ຊາຍ​ຟອງ ທັງ​ເປັນ​ການ​ແລກ­ປ່ຽນ​ບົດ­ຮຽນ​ເຊິ່ງ​ກັນ​ແລະ​ກັນ ລະ­ຫວ່າງ​ບ້ານ​ຕໍ່​ບ້ານ ແລະ ສີ­ພາຍ​ດ້ວຍ​ກັນ ນອກ­ຈາກ​ນີ້ ຍັງ​ເປັນ​ການ​ຄັດ​ເລືອກ​ເອົາ​ນັກ­ກີ­ລາ​ທີ່​ມີ ຄວາມ​ສາ­ມາດ​ດີ­ເດັ່ນ ເປັນ​ຕົວ​ແທນ ນວ ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ລະ­ຫວ່າງ​ວັນ​ທີ 22 ມີ­ນາ ຫາ 1 ເມ­ສາ 2020.

    ສຳ­ລັບ​ການ​ແຂ່ງ­ຂັນ​ເຮືອ​ສູດ​ຍາວ​ຄັ້ງ​ນີ້ ຈະ​ຈັດ​ຂຶ້ນ​ວັນ​ທີ 29 ກັນ­ຍາ ມີ​ທັງ​ໝົດ 9 ລຳ ແບ່ງ​ອອກ​ເປັນ 2 ກຸ່ມ ຄື:ກຸ່ມ ກ ປະ­ກອບ​ມີ ພອນ​ພະ­ແກ້ວ 2 (ບ້ານ​ສີ​ຖານ​ໃຕ້) ສາວ​ນ້ອຍ​ພິ­ກຸນ​ທອງ 2 JDB (ນ້ອຍ​ອິດ­ທິ­ລິດ) ໄກ່​ທອງ (ບໍ​ລິ​ຄຳ​ໄຊ) ແລະ ສາວ​ນ້ອຍ​ສ້ອຍ​ສຸ­ດາ ສ່ວນ​ກຸ່ມ ຂ ຣີ​ສອດ​ປາກ​ນ້ຳ​ຄານ (ສີ­ພາຍ​ນາ­ວາ​ສັກ­ສິດ) ແຊັມ​ເກົ່າ ພອນ​ພະ­ແກ້ວ 1 (ບ້ານ​ສີ​ຖານ​ໃຕ້) ເຈົ້າ​ແມ່​ປະ​ກາຍ­ສິດ ແລະ ສາວ​ນ້ອຍ​ພິ­ກຸນ​ທອງ 1 ສ່ວນ​ລາ­ງວັນ​ຊະ­ນະ​ເລີດ ຈະ​ໄດ້​ຮັບ​ຂັນ​ໂລ້ 1 ໜ່ວຍ+ເງິນ­ສົດ 13 ລ້ານ​ກີບ ຮອງ​ຊະ­ນະ​ເລີດ ຈະ​ໄດ້​ຮັບ​ຂັນ​ໂລ້ 1 ໜ່ວຍ+ເງິນ­ສົດ 11 ລ້ານ​ກີບ ອັນ​ດັບ 3 ຈະ​ໄດ້​ຮັບ​ຂັນ​ໂລ້ 1 ໜ່ວຍ+ເງິນ­ສົດ 9 ລ້ານ​ກີບ ແລະ ອັນ​ດັບ 4 ຈະ​ໄດ້​ຮັບ​ເງິນ­ສົດ 7 ລ້ານ​ກີບ ນອກ­ຈາກ​ນີ້ ເຮືອ​ທີ່​ເຂົ້າ​ຮ່ວມ​ຍັງ​ຈະ​ໄດ້​ຮັບ​ລາງ ວັນ​ນອນ​ທ່າ ຫຼື ຄ່າ​ລາກ​ແກ່ ຈຳ­ນວນ 5 ລ້ານ​ກີບ.

ຂ່າວທີ່ກ່ຽວຂ້ອງ