ຂ່າວຫຼ້າສຸດ

ປູເປ້ ເຊັນສັນຍາຮ່ວມສະໂມສອນ SUCY EN BRIE

1.161 26 ກ.ຍ. 2019 ວົງຈອນກີລາ
ປູເປ້ ເຊັນສັນຍາຮ່ວມສະໂມສອນ SUCY EN BRIE

    ພິ­ທີ​ເຊັນ​ສັນ­ຍາ​ລະ­ຫວ່າງ​ສະ­ໂມ­ສອນ​ເທັນ​ນິດ SUCY EN BRIE ແລະ ນາງ ອາ​ລິ​ຍາ ວົງ​ດາ­ລາ ຫຼື “ປູ​ເປ້” ນັກ­ກີ­ລາ​ເທັນ​ນິ​ສ​ດາວ​ຮຸ່ງ​ອາ­ຍຸ 14 ປີ ໜຶ່ງ​ດຽວ​ຈາກ​ລາວ​ໄດ້​ມີ​ຂຶ້ນ​ວັນ​ທີ 21 ກັນ­ຍາ 2019 ທີ່​ສະ­ໂມ­ສອນ​ດັ່ງ­ກ່າວ ນະ­ຄອນ­ຫຼວງ​ປາ​ຣີດ ປະ­ເທດ​ຝຣັ່ງ ມີ​ທ່ານ ບຸນ​ທົງ ຈັນ­ທະ​ປະ­ເສີດ ຮອງ​ເອກ​ອັກ​ຄະ​ລັດ​ຖະ​ທູດ​ລາວ​ປະ­ຈຳ​ປະ­ເທດ​ຝຣັ່ງ ພ້ອມ​ດ້ວຍ​ພັນ​ລະ​ຍາ ຜູ້­ຕາງ­ໜ້າ​ສະ­ໂມ­ສອນ ຄະ­ນະ​ນຳ ຄູ​ເຝິກ ຜູ້​ປົກ­ຄອງ​ນັກ­ກີ­ລາ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພູ­ເຂົາ​ທອງ ພົມ​ມະ​ວົງ ຜູ້​ປົກ­ຄອງ ແລະ ຜູ້​ຈັດ­ການ​ສ່ວນ​ຕົວ​ຂອງ​ນາງ ອາ​ລິ​ຍາ ວົງ​ດາ­ລາ ເຜີຍ​ຕໍ່​ນັກ​ຂ່າວ​ວັນ​ທີ 24 ກັນ­ຍາ 2019 ວ່າ: ປູ​ເປ້​ໄດ້​ຕົກ­ລົງ​ເຊັນ​ສັນ­ຍາ​ເປັນ​ນັກ​ເທັນ​ນິ​ສ​ຂອງ​ສະ­ໂມ­ສອນ SUCY EN BRIE ໃນ​ປະ­ເທດ​ຝຣັ່ງ​ເປັນ​ທີ່​ຮຽບ​ຮ້ອຍ​ແລ້ວ ໂດຍ​ເນື້ອ​ໃນ​ຂອງ​ສັນ­ຍາ ລະ­ບຸ​ວ່າ​ສະ­ໂມ­ສອນ​ຈະ​ຊ່ວຍ­ເຫຼືອ​ດ້ານ​ຄ່າ​ເດີນ­ທາງ​ໄປ-ກັບ ເພື່ອ​ໃຫ້​ປູ​ເປ້​ມາ​ຮ່ວມ​ແຂ່ງ­ຂັນ​ລາຍ­ການ​ຕ່າງໆ​ທີ່​ປະ­ເທດ​ຝຣັ່ງ​ລະ­ຫວ່າງ​ເດືອນ​ເມ­ສາ​ຫາ​ກໍ­ລະ­ກົດ 2020 ແລະ ໃນ​ເດືອນ​ກໍ­ລະ­ກົດ​ຫາ​ສິງ­ຫາ 2020 ແມ່ນ​ເຂົ້າ​ສູນ​ເຝິກ­ຊ້ອມ​ໄປ​ພ້ອມ​ກັນ ໂດຍ​ມີ​ທ່ານ ໂຈ​ນາ​ທານ ຄູ​ເຝິກ​ມື​ອາ­ຊີບ​ຂອງ​ສະ­ໂມ­ສອນ​ເປັນ​ຜູ້​ຊ່ວຍ​ແນະ­ນຳ ແລະ ເຝິກ­ແອບ​ຕາມ​ຫຼັກ­ສູດ​ນາ­ນາ​ຊາດ ສ່ວນ​ເລື່ອງ​ເງິນ​ລາ­ງວັນ​ທີ່​ໄດ້​ຈາກ​ການ​ແຂ່ງ­ຂັນ​ທາງ​ສະ­ໂມ­ສອນ​ແມ່ນ​ມອບ​ໃຫ້ “ປູ​ເປ້” ທັງ​ໝົດ.

    ສຳ­ລັບ ປູ​ເປ້ ໃນ​ກ່ອນ​ໜ້າ​ນີ້​ໄດ້​ເດີນ­ທາງ​ມາ​ເຝິກ­ຊ້ອມ ແລະ ແຂ່ງ­ຂັນ​ລາຍ­ການ​ຕ່າງໆ​ເຖິງ 6 ລາຍ­ການ​ຢູ່​ປະ­ເທດ​ຝຣັ່ງ ໃນ​ວັນ​ທີ 18 ສິງ­ຫາ ຫາ 23 ກັນ­ຍາ 2019 ໃນ​ນີ້​ສາ­ມາດ​ຄວ້າ​ແຊັມ​ມາ​ຄອງ​ໄດ້​ເຖິງ 3 ລາຍ­ການ​ຄື: ລາຍ­ການ Tennis pro Cup ລາຍ­ການ Tennis Club Tournament Loupian TC 34 ແລະ ລາຍ­ການ TEYRAN TOURNOI OPEN 2019 ນອກ​ນັ້ນ​ຍັງ​ສາ­ມາດ​ຜ່ານ​ເຂົ້າ​ສູ່​ຮອບ​ຮອງ​ຊະ­ນະ​ເລີດ ຫຼື ຮອບ 4 ສຸດ​ທ້າຍ​ໄດ້​ອີກ 3 ລາຍ­ການ ປະ­ກອບ​ມີ: ລາຍ­ການ Montpelier ASPTT Tennis TOURNOI Open 2019 ລາຍ­ການ Tournoi TC JACOU 2019 ແລະ ລາຍ­ການ TMC les raquette de la d໙pທche 2019 ຈົນ​ສ້າງ​ຄວາມ​ສົນ­ໃຈ​ໃຫ້​ຫຼາຍ​ສະ­ໂມ­ສອນ​ໃນ​ຝຣັ່ງ ແລະ ໃນ​ທີ່​ສຸດ​ກໍ​ຕັດ­ສິນ​ໃຈ​ເຊັນ​ສັນ­ຍາ​ກັບ ສະ­ໂມ­ສອນ SUCY EN BRIE ເປັນ​ທີ່​ຮຽບ​ຮ້ອຍ​ແລ້ວ.

ຂ່າວທີ່ກ່ຽວຂ້ອງ