ຂ່າວຫຼ້າສຸດ

ຫຼາຍ​ແສນ​ຄົນ ​ເປັນ​ພະຍາດ​ກ່ຽວ​ກັບ​ລະບົບ​ທາງ​ເດີນ​ຫາຍ​ໃຈ ຍ້ອນ​ເກີດ​ໄຟ​ໄໝ້​ປ່າ​ໃນ​ອິນ​ໂດ​ເນ​ເຊຍ

229 26 ກ.ຍ. 2019 ຂ່າວຕ່າງປະເທດ
ຫຼາຍ​ແສນ​ຄົນ ​ເປັນ​ພະຍາດ​ກ່ຽວ​ກັບ​ລະບົບ​ທາງ​ເດີນ​ຫາຍ​ໃຈ ຍ້ອນ​ເກີດ​ໄຟ​ໄໝ້​ປ່າ​ໃນ​ອິນ​ໂດ​ເນ​ເຊຍ

    ທ່ານ ອາ​ກຸ​​ສ ວີ​ໂບ​ໂວ ໂຄສົກ​ຂອງ​ອົງການ​ບັນເທົາ​ໄພ​ທຳ​ມະ​ຊາດ​ແຫ່ງ​ຊາດ​ອິນ​ໂດ​ເນ​ເຊຍ (BNPB) ແຈ້ງ​ໃຫ້​ຮູ້​ວ່າ ລວມ​ແລ້ວ​ມີ 919.516 ຄົນ ຢູ່​ໃນ​ອິນ​ໂດ​ເນ​ເຊຍ ເປັນ​ພະຍາດ​ອັກເສບ​ລະບົບ​ທາງ​ເດີນ​ຫາຍໃຈ​ຮຸນ​ແຮງ (ISPA) ຍ້ອນ​ຖືກ​ກະທົບ​ຈາກ​ໄຟ​ໄໝ້​ປ່າ ແລະ ໄໝ້​ຖ່ານ​ຕົມ.

    ຕົວ​ເລກ​ຢ່າງ​ເປັນ​ທາງ​ການ ຂອງ​ກະຊວງ​ສາທາລະນະ​ສຸກ​ອິນ​ໂດ​ເນ​ເຊຍ ທີ່​ມີ​ອອກ​ມາ​ໃນ​ຕອນ​ແລງ​ຂອງ​ວັນ​ທີ 23 ກັນຍາ​ນີ້ ຊີ້​ໃຫ້​ເຫັນ​ວ່າ ຄົນ​ເຈັບ​ຈຳນວນ​ດັ່ງກ່າວ ເຕົ້າໂຮມ​ຢູ່​ໃນ 6 ແຂວງ ອັນ​ປະກອບ​ດ້ວຍ​ແຂວງ ສຸ​ມາ​ຕຣາ​ໃຕ້ (ເກືອບ 292.000 ຄົນ) ແຂວງ ຣີ​ອາວ (ເກືອບ 276.000 ຄົນ) ແຂວງ ກາລີ​ມັນ​ຕັນ​ຕາເວັນຕົກ (ເກືອບ 181.000 ຄົນ) ແຂວງ ກາລີ​ມັນ​ຕັນ​ໃຕ້ (67.000 ກວ່າ​ຄົນ) ແຂວງ ຈາມ​ບີ  (63.000 ກວ່າ​ຄົນ) ແລະ ແຂວງ ກາລີ​ມັນ​ຕັນ​ກາງ (40.000 ກວ່າ​ຄົນ).

    ທ່ານ ອາ​ກຸ​​ສ ເວົ້າ​ວ່າ ມາ​ຮອດ​ເວລາ​ນີ້ ລັດຖະບານ​ໄດ້​ແຈກ​ໜ້າ​ກາກ​ອະນາໄມ 73.000 ອັນ ໃຫ້​ແກ່​ປະຊາຊົນ ຢູ່​ໃນ​ບັນດາ​ແຂວງ​ທີ່​ຖືກ​ຜົນ​ກະທົບ​ຈາກ​ໄຟ​ໄໝ້​ປ່າ ແລະ ໄໝ້​ຖ່ານ​ຕົມ ພ້ອມ​ທັງ​ປະຕິບັດ​ການ​ຊ່ວຍເຫຼືອ​ດ້ານ​ການ​ແພດ​ຢູ່​ໃນ​ຫຼາຍ​ຈຸດ ໂດຍ​ໄດ້​ຈ່າຍ​ຢາ​ປົວ​ພະຍາດ ລວມ​ເຖິງ​ອາຫານ​ການ​ກິນ ໃຫ້​ແກ່​ເດັກນ້ອຍ​ເກີດ​ໃໝ່ ແລະ ແມ່ຍິງ​ຖືພາ​ມານ.

    ທາງ​ດ້ານ​ອົງການ​ສະຫະ​ປະຊາ​ຊາດ (​ສປຊ) ໄດ້​ມີ​ການ​ແຈ້ງ​ເຕືອນ​ອອກ​ມາ​ວ່າ ເຫດການ​ໄຟ​ໄໝ້​ປ່າ​ຢູ່​ໃນ​ອິນ​ໂດ​ເນ​ເຊຍ ພວມ​ເຮັດ​ໃຫ້​ເດັກນ້ອຍ​ເກືອບ 10 ລ້ານ​ຄົນ ໃນ​ປະເທດ​ດັ່ງກ່າວ ປະ​ເຊີນ​ກັບ​ຄວາມ​ສ່ຽງ​ຖືກ​ຜົນ​ກະທົບ​ຍ້ອນ​ອາກາດ​ເປັນ​ພິດ. ຄຳ​ແຈ້ງ​ເຕືອນ​ຂອງ ​ສປຊ ມີ​ອອກ​ມາ ຫຼັງ​ຈາກ​ທີ່​ບັນດາ​ນັກວິທະຍາສາດ​ປະກາດ​ຜົນ​ການ​ຄົ້ນຄວ້າ ຊີ້​ໃຫ້​ເຫັນ​ວ່າ ໄຟ​ໄໝ້​ປ່າ​ທີ່​ເກີດ​ຂຶ້ນ​ນັ້ນ ໄດ້​ເຮັດ​ໃຫ້​ເກີດ​ການ​ປ່ອຍ​ແກ​​ັສ ໃນ​ບໍ​ລິ​ມາດ​ທີ່​ໃຫຍ່​ໂຕ ພາ​ໄປ​ສູ່​ການ​ເກີດ​ປະກົດ​ການເຮືອນ​ແກ້ວ.

ຂ່າວທີ່ກ່ຽວຂ້ອງ