ຂ່າວຫຼ້າສຸດ

ຍີ່ປຸ່ນ-ອິນ​ໂດ​ເນ​ເຊຍ ລົງ​ນາມ​ຂໍ້​ຕົກລົງ​ກ່ຽວ​ກັບ​ການ​ກໍ່ສ້າງ​ທາງ​ລົດ​ໄຟ

172 26 ກ.ຍ. 2019 ຂ່າວຕ່າງປະເທດ
ຍີ່ປຸ່ນ-ອິນ​ໂດ​ເນ​ເຊຍ ລົງ​ນາມ​ຂໍ້​ຕົກລົງ​ກ່ຽວ​ກັບ​ການ​ກໍ່ສ້າງ​ທາງ​ລົດ​ໄຟ

     ຫຼັງ​ຈາກ​ທີ່​ໄດ້​ເຈລະຈາ​ມາ​ເປັນ​ເວລາ 2 ປີ ມາ​ໃນ​ວັນ​ທີ 24 ກັນຍາ​ນີ້ ອິນ​ໂດ​ເນ​ເຊຍ ແລະ ຍີ່ປຸ່ນ ກໍ​ໄດ້​ລົງ​ນາມ​ຂໍ້​ຕົກລົງ​ສະບັບ​ໜຶ່ງ ກ່ຽວ​ກັບ​ການ​ກໍ່ສ້າງ​ທາງ​ລົດໄຟ​ຄວາມ​ໄວ​ປານ​ກາງ ເຊື່ອມ​ຕໍ່​ນະຄອນຫຼວງ ຈາ​ກາ​ຕາ ຂອງ​ອິນ​ໂດ​ເນ​ເຊຍ ກັບ​ນະຄອນ ສຸ​ຣາ​ບາ​ຢາ ທີ່​ເປັນ​ນະຄອນ​ໃຫຍ່​ອັນ​ດັບ​ສອງ​ຂອງ​ປະເທດ​ນີ້.

    ຂໍ້​ຕົກລົງ​ດັ່ງກ່າວ ລະບຸ​ວ່າ ການ​ກໍ່ສ້າງ​ທາງ​ລົດໄຟ​ນັ້ນ ຈະ​ໄດ້​ປະຕິບັດ​ເປັນ​ສອງ​ໄລຍະ ຄື​ໄລຍະ​ທຳ​ອິດ ແມ່ນ​ເຊື່ອມ​ຕໍ່​ນະຄອນຫຼວງ ຈາ​ກາ​ຕາ ກັບ ນະຄອນ ເຊ​ມາ​ຣັງ ທີ່​ເປັນ​ເມືອງ​ເອກ​ຂອງ​ແຂວງ ຈາ​ວາ​ກາງ ໂດຍ​ມີ​ຄວາມ​ຍາວ 436​ກມ ແລະ ໄລຍະ​ທີ​ສອງ​ແມ່ນ​ເຊື່ອງ​ຕໍ່ ເຊ​ມາ​ຣັງ ກັບ ສຸ​ຣາ​ບາ​ຢາ ທີ່​ເປັນ​ເມືອງ​ເອກ​ຂອງ​ແຂວງ ຈາ​ວາ​ຕາເວັນ​ອອກ ໂດຍ​ມີ​ຄວາມ​ຍາວ  284​ກມ.

    ເຈົ້າ​ໜ້າທີ່​ອິນ​ໂດ​ເນ​ເຊຍ ແລະ  ຍີ່ປຸ່ນ ໃຫ້​ຮູ້​ວ່າ ມູນ​ຄ່າ​ການ​ລົງທຶນ​ເບື້ອງ​ຕົ້ນ​ຂອງ​ໂຄງການ​ດັ່ງກ່າວ ຄາດ​ວ່າ​ຢູ່​ທີ່​ປະມານ 60.000 tຕື້​ຣູ​ເປຍ (ເທົ່າ​ກັບ 4,2 ຕື້​ໂດ​ລາ​ສະຫະລັດ). ປະທານາທິບໍດີ​ອິນ​ໂດ​ເນ​ເຊຍ ໂຈ​ໂກ ວີ​ໂດ​ໂດ ຫັວງ​ວ່າການ​ກໍ່ສ້າງ​ທາງ​ລົດໄຟ​ສາຍ​ດັ່ງກ່າວ ຈະ​ເລີ່ມ​ຂຶ້ນ​ໃນ​ປີໜ້າ.

ໃນ​ຂະນະ​ດຽວ​ກັນ ອົງການ​ຕີ​ລາຄາ ແລະ ນຳ​ໃຊ້​ເຕັກ​ໂນ​ໂລ​ຊີ​ຂອງ​ອິນ​ໂດ​ເນ​ເຊຍ ໃຫ້ການ​ຄາດ​ຄະເນ​ວ່າ 12,4% ຈາກ​ຈຳນວນ​ຜູ້ໂດຍສານ​ທັງ​ໝົດ 8 ລ້ານ​ຄົນ ທີ່​ເດີນທາງ​ໂດຍ​ທາງ​ການບິນ ຈາກ​ຈາ​ກາ​ຕາ ໄປ​ຍັງ ສຸ​ຣາ​ບາ​ຢາ ຈະ​ຫັນ​ໄປ​ສູ່​ການ​ເດີນທາງ​ໂດຍ​ທາງ​ລົດໄຟ.

ຂ່າວທີ່ກ່ຽວຂ້ອງ