ຂ່າວຫຼ້າສຸດ

ເກີດ​ເຫດການ​ແຜ່ນດິນ​ໄຫວ​ຢູ່​ໃນ​ປາ​ກິດ​ສະຖານ ​ແລະ ​ ປອກ​ໂຕ ຣີ​ໂກ

129 26 ກ.ຍ. 2019 ຂ່າວຕ່າງປະເທດ
ເກີດ​ເຫດການ​ແຜ່ນດິນ​ໄຫວ​ຢູ່​ໃນ​ປາ​ກິດ​ສະຖານ ​ແລະ ​ ປອກ​ໂຕ ຣີ​ໂກ

   ເຈົ້າ​ໜ້າທີ່​ປາ​ກິດ​ສະຖານ ແຈ້ງ​ໃຫ້​ຮູ້​ວ່າ ຈຳນວນ​ຜູ້​ເສຍ​ຊີວິດ ໄດ້​ເພີ່ມ​ຂຶ້ນ​ເປັນ 19 ຄົນ ແລະ ບາດເຈັບ​ອີກ 300 ກວ່າ​ຄົນ ຫຼັງ​ຈາກ​ເກີດ​ເຫດການ​ແຜ່ນດິນ​ໄຫວ ເມື່ອ​ວັນ​ທີ 24 ກັນຍາ​ນີ້ ໂດຍ​ແທກ​ຄວາມ​ແຮງ​ສັ່ນ​ສະເທືອນ​ໄດ້ 5,8 ອົງສາ​ຣິກ​ເຕີ ແລະ ມີ​ຈຸດ​ສູນ​ກາງ​ຢູ່​ເລິກ​ລົງ​ໄປ​ໃຕ້​ດິນ 10​ກມ ຊຶ່ງ​ເກີດ​ຂຶ້ນ​ຢູ່​ໃນ​ເຂດ ມີ​ປູ ທີ່​ຂຶ້ນ​ກັບ​ແຄວ້ນ​​ກັສ​ເມຍ ໃນ​ສ່ວນ​ທີ່​ປາ​ກິດ​ສະຖານ​ຄວບ​ຄຸມ.

    ຂ່າວ​ແຈ້ງວ່າ ອາຄານ​ຫຼາຍ​ຫຼັງ​ໄດ້​ພັງ​ຖະ​ຫຼົ່ມ​ລົງ ແລະ ຖະໜົນ​ຍາວ​ປະມານ 2​ ກມ ເກີດ​ແຕກ​ຍະ​ອອກ. ໜ່ວຍ​ງານ​ກູ້​ໄພ ໄດ້​ເຂົ້າ​ເຖິງ​ເຂດ​ທີ່​ຖືກ​ຜົນ​ກະທົບ​ຈາກ​ແຜ່ນດິນ​ໄຫວ ເພື່ອ​ນຳ​ເອົາ​ຜູ້​ໄດ້​ຮັບ​ເຄາະ​ຮ້າຍ​ອອກ​ມາ ແລະ ສົ່ງ​ຕົວ​ໄປ​ຍັງ​ໂຮງໝໍ. ເຫດການ​ແຜ່ນດິນ​ໄຫວ​ດັ່ງກ່າວ ກໍ​ເປັນ​ຜົນ​ກະທົບ​ເຖິງ​ຫຼາຍ​ເຂດ ຢູ່​ທາງ​ພາກ​ເໜືອ​ອິນ​ເດຍ ໃນ​ນັ້ນ​ມີ​ເຂດ​​ກັສ​ເມຍ ໃນ​ສ່ວນ​ທີ່​ອິນ​ເດຍ​ຄວບ​ຄຸມ ແລະ ລວມ​ເຖິງ​ລັດ​ປັນ​ຈາບ (ພາກ​ເໜືອ​ອິນ​ເດຍ).

    ໃນ​ຂະນະ​ດຽວ​ກັນ ຂ່າວສານ ຣອຍ​ເຕີ ລາຍ​ງານ ອ້າງ​ຕາມ​ຂໍ້​ມູນ​ຈາກ​ອົງການ​ສຳ​ຫຼວດ​ທໍລະນີ​ສາດ​ຂອງ ສ ອາ​ເມ​ຣິ​ກາ (USGS) ໃຫ້​ຮູ້​ວ່າ ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ​ໄດ້ 6,3 ອົງສາ​ຣິກ​ເຕີ ຊຶ່ງ​ມີ​ສູນ​ກາງ​ເລິກ​ລົງ​ໄປ​ໃຕ້​ດິນ 10​ ກມ ໄດ້​ເຮັດ​ໃຫ້​ເກີດ​ແຮງ​ສັ່ນ​ສະເທືອນ​ຢູ່​ໃນ​ເຂດ​ທາງ​ທິດເໜືອ​ເມືອງ ອີ​ຊາ​ເບ​ລາ ໃນ​ເຂດ​ແຄມ​ຝັ່ງ​ທະເລ​ຂອງ ປອກ​ໂຕ ຣີ​ໂກ ເມື່ອ​ວັນ​ທີ 24 ກັນຍາ​ນີ້ ແຕ່​ຍັງ​ບໍ່​ມີ​ລາຍ​ງານ​ເຖິງ​ຄວາມ​ເສຍ​ຫາຍ​ທາງ​ດ້ານ​ຊີວິດ​ອິນ​ຊີ ກໍ​ຄື​ວັດຖຸ​ສິ່ງ​ຂອງ.

ຂ່າວທີ່ກ່ຽວຂ້ອງ