ເບິ່ງບ້ານເຂົາເອົາບົດຮຽນ 24-09-2019

1.395 24 ກ.ຍ. 2019 ຫົວຂໍ້ຂ່າວອື່ນໆ

    ສອງ​ເລື່ອງ​ໜ້າ​ສົນ­ໃຈ​ໃນ​ບົດ​ປະ­ຈຳ​ວັນ​ນີ້​ແມ່ນ ໜຶ່ງ: ກ່ຽວ​ກັບ​ບັ້ນ​ປາບ​ປາມ​ການ​ກໍ່​ການ​ຮ້າຍ​ທີ່​ມາ​ເລ​ເຊຍ ແລະ ປິດ​ທ້າຍ​ກັບ​ຂ່າວ​ທີ່​ບອກ​ວ່າ ເຟດ​ບຸກ ຈະ​ໃຊ້​ມາດ​ຕະ­ການ​ກຳ­ຈັດ​ເນື້ອ​ຂໍ້­ຄວາມ​ບໍ່​ດີ ທີ່​ກໍ່­ໃຫ້­ເກີດ​ມີ​ຄວາມ​ກຽດ​ຊັງ ແລະ ໃຊ້​ຄວາມ​ຮຸນ​ແຮງ​ອອກ​ຈາກ​ເຄືອ​ຄ່າຍ​ເຟດ​ບຸກ.

    ທີ່​ມາ​ເລ​ເຊຍ: (ວຽງ​ຈັນ​ທາມ 28 ສິງ­ຫາ 2019) ມີ​ຂ່າວ​ເດັ່ນ​ດັງ​ຈາກ​ມາ​ເລ​ເຊຍ ທີ່​ໃຫ້​ຮູ້​ວ່າ ທາງ​ການ​ຂອງ​ປະ­ເທດ​ນີ້ ສາ­ມາດ​ຈັບ​ກຸມ​ຜູ້​ທີ່​ມີ​ສ່ວນ​ພົວ­ພັນ​ກັບ​ລັດ­ທິ​ກໍ່​ການ​ຮ້າຍ ຈຳ­ນວນ 519 ຄົນ ໃນ​ນັ້ນ ມີ​ທັງ​ຊາວ​ມາ​ເລ​ເຊຍ ແລະ ຊາວ​ຕ່າງ­ປະ­ເທດ ຜູ້​ທີ່​ຖືກ​ຈັບ​ໄດ້​ທັງ​ໝົດ​ຖືກ​ຄຸມ​ຂັງ ມາ​ແຕ່​ວັນ​ທີ 31 ເດືອນ​ກໍ­ລະ­ກົດ​ປີ​ນີ້ ທ່ານ ຕັນ ສະ​ຣິ ມູ ຍິດ​ດິນ ຢາ​ຊິມ ລັດ­ຖະ­ມົນ­ຕີ​ກະ­ຊວງ​ພາຍ​ໃນ​ມາ​ເລ​ເຊຍ ໃຫ້​ລາຍ​ລະ­ອຽດ​ກ່ຽວ​ກັບ​ເລື່ອງ​ນີ້​ຕື່ມ​ວ່າ: ພວກ​ທີ່​ຖືກ​ຈັບ​ກຸມ​ທັງ​ໝົດ​ນີ້ ໄດ້​ມີ​ການ­ເຄື່ອນ­ໄຫວ​ທີ່​ຖື​ວ່າ ເປັນ​ການ​ກໍ່​ການ​ຮ້າຍ ເຊິ່ງ​ນອນ​ຢູ່​ໃນ​ຄະ­ດີ​ອາ­ຍາ ເພາະ​ເປັນ​ການ​ກະ­ທຳ​ທີ່​ມີ​ລັກ­ສະ­ນະ​ຂົ່ມ­ຂູ່ ໃນ​ຈຳ­ນວນ​ຜູ້​ຖືກ​ຈັບ​ກຸມ​ຄັ້ງ​ນີ້ ສ່ວນ​ໜຶ່ງ​ໄດ້​ຖືກ​ຕັດ­ສິນ​ຄະ­ດີ​ໄປ​ແລ້ວ ແລະ ອີກ​ສ່ວນ​ໜຶ່ງ ຍັງ​ຢູ່​ຂັ້ນ​ຖືກ​ກັກ​ຕົວ ນອກ­ຈາກ​ນັ້ນ ທາງ​ການ​ຍັງ​ໄດ້​ລຶ­ບລ້າງ​ບັນ­ຊີ​ການ​ນຳ​ໃຊ້​ສື່​ສັງ­ຄົມ ເຊັ່ນ: ເຟດ​ບຸກ ອິນ​ສະ​ຕາ​ແກຼມ ແລະ ທະ​ວິດ​ເຕີ (ທີ່​ມີ​ການ​ພົວ­ພັນ​ກັບ​ການ​ກໍ່​ການ​ຮ້າຍ) ຈຳ­ນວນ 266 ລາຍ­ການ ອີງ​ຕາມ​ທ່ານ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ໃນ​ປັດ­ຈຸ­ບັນ ມາ​ເລ​ເຊຍ ພວມ​ຢູ່​ໃນ​ໄລ­ຍະ​ສ້າງ​ແຜນ​ປະ­ຕິ­ບັດ​ງານ​ແຫ່ງ​ຊາດ ເພື່ອ​ຕໍ່­ສູ້​ຕ້ານ​ຄວາມ​ຮຸນ​ແຮງ ເພື່ອ​ໃຫ້​ສອດ­ຄ່ອງ​ກັບ​ແນວ­ທາງ​ຂອງ​ອົງ­ການ​ສະ­ຫະ​ປະ­ຊາ​ຊາດ ທີ່​ກຳ­ນົດ​ໃຫ້​ບັນ­ດາ​ປະ­ເທດ​ສະ­ມາ­ຊິກ​ຕໍ່­ສູ້​ຕ້ານ​ການ​ກໍ່​ການ​ຮ້າຍ​ສາ­ກົນ ໃນ​ທຸກ​ລະ­ດັບ ແລະ ທຸກ​ຮູບ​ແບບ.

    ທີ່​ສຳ­ນັກ­ງານ​ເຟດ​ບຸກ: ໃນ​ໄລ­ຍະ​ຫຼັງໆ​ມາ​ນີ້ ໄດ້​ມີ​ຂ່າວ​ອ່າວ​ຖີ່​ກ່ຽວ​ກັບ​ມາດ​ຕະ­ການ​ຂອງ​ເຟດ​ບຸກ (Facebook) ເພື່ອ​ປັບ­ປຸງ​ລະ­ບົບ​ການ​ໄລ​ສົດ​ຜ່ານ​ເຟດ​ບຸກ ເຊິ່ງ​ເກີດ​ມີ​ສຽງ​ວິ­ພາກ​ວິ­ຈານ​ຈາກ​ຫຼາຍ​ຝ່າຍ ຫຼາຍ​ປະ­ເທດ​ກ່ຽວ​ກັບ​ຄວາມ​ບໍ່​ສົມ​ມາ​ພາ​ຄວນ​ໃນ​ການ​ອັບ​ໂຫຼດ​ຂ່າວ-ເນື້ອ​ໃນ ທີ່​ສ້າງ​ຄວາມ​ລັງ​ກຽດ ຄຽດ​ຊັງ ການ​ຈຳ­ແນກ​ເຊື້ອ​ຊາດ ຜິວ​ພັນ ຂ່າວ​ປອມ ແລະ ການ​ກໍ່​ການ​ຮ້າຍ ເຊັ່ນ​ມີ​ຂ່າວ​ອອກ​ມາ​ໃນ​ວັນ​ທີ 15 ພຶດ­ສະ­ພາ​ປີ​ນີ້ (ລາວ​ພັດ­ທະ­ນາ 16 ພຶດ­ສະ­ພາ 2019) ວ່າ ທ່ານ ໂຣ​ເຊນ ຮອງ​ປະ­ທານ​ບໍ­ລິ­ຫານ​ເຟດ​ບຸກ ໄດ້​ອອກ​ມາ​ປະ­ກາດ​ໂປ້ງໆ​ວ່າ ຜູ້​ທີ່​ເຮັດ​ຜິດ​ລະ­ບຽບ​ສັງ­ຄົມ​ອອນ​ລາຍ ກໍ​ຄື​ອົງ​ກອນ​ທີ່​ເປັນ​ອັນ­ຕະ­ລາຍ ຈະ​ຖືກ​ຈຳ­ກັດ​ການ​ໄລ້​ສົດ​ຜ່ານ​ເຟດ​ບຸກ ສ່ວນ​ຜູ້​ມີ​ຄວາມ​ຜິດ​ຮ້າຍ​ແຮງ​ນັ້ນ ຈະ​ຖືກ​ລະ­ງັບ​ບັນ­ຊີ​ການ​ນຳ​ໃຊ້​ເຟດ​ບຸກ ຂໍ້​ຫ້າມ​ທີ່​ສຳ­ຄັນ​ສຸດ​ຂອງ​ເຟດ​ບຸກ ກໍ​ຄື ການ​ແຊ​ລິ້ງ​ຖະ­ແຫຼງ­ການ​ຈາກ​ກຸ່ມ​ກໍ່​ການ​ຮ້າຍ

    ການ​ທີ່​ເຟດ​ບຸກ​ໄດ້​ເລີ່ມ​ເອົາ​ມາດ​ຕະ­ການ​ເຂັ້ມ​ງວດ ເພື່ອ​ປ້ອງ​ກັນ​ການ​ແຊ​ພາບ​ວີ​ດີ​ໂອ​ກ່ຽວ​ກັບ​ພຶດ­ຕິ​ກຳ​ບໍ່​ເໝາະ​ສົມ ເຊັ່ນ: ຄວາມ​ຮຸນ​ແຮງ​ນັ້ນ ແມ່ນ​ຍ້ອນ​ໄດ້​ມີ​ການ​ເຜີຍ­ແຜ່​ພາບ​ສົດ​ທາງ​ເຟດ​ບຸກ ກ່ຽວ​ກັບ​ການ​ກວາດ​ຍິງ​ທີ່​ນິວ​ຊີ​ແລນ ໃນ​ສະ­ຖານ­ທີ່​ສາ­ສະ­ໜາ ເຊິ່ງ​ເຮັດ​ໃຫ້​ມີ​ຜູ້​ເສຍ​ຊີ­ວິດ ແລະ ບາດ­ເຈັບ​ຫຼາຍ​ສິບ​ຄົນ ພາບ​ວີ​ດີ​ໂອ​ດັ່ງ­ກ່າວ​ໄດ້​ສ້າງ​ຄວາມ​ສະ​ຍົດ​ສະ­ຫຍອງ ແລະ ແຕກ​ຕື່ນ ຄວາມ​ລັງ​ກຽດ ຄຽດ​ຊັງ ຂຶ້ນ​ໃນ​ສັງ­ຄົມ ການ​ເຜີຍ­ແຜ່​ພາບ ການ​ໃຊ້​ຄວາມ​ຮຸນ​ແຮງ​ຜ່ານ​ສື່​ສັງ­ຄົມ​ອອນ​ລາຍ​ນັ້ນ ໄດ້​ກາຍ­ເປັນ​ຂໍ້​ຫ້າມ​ຢູ່​ຫຼາຍໆ​ປະ­ເທດ​ມາ​ແລ້ວ.

ຂ່າວທີ່ກ່ຽວຂ້ອງ