ຂ່າວຫຼ້າສຸດ

ເສດຖະກິດ​ ສ ອາ​ເມ​ຣິ​ກາ ​ເສຍ​ຫາຍ​ຫຼາຍ​ຮ້ອຍ​ຕື້​ໂດ​ລາ ຍ້ອນ​ຄວາມ​ຮຸນ​ແຮງ​ຈາກ​ການ​ໃຊ້​ອາວຸດ​ປືນ

178 23 ກ.ຍ. 2019 ຂ່າວຕ່າງປະເທດ
ເສດຖະກິດ​ ສ ອາ​ເມ​ຣິ​ກາ ​ເສຍ​ຫາຍ​ຫຼາຍ​ຮ້ອຍ​ຕື້​ໂດ​ລາ ຍ້ອນ​ຄວາມ​ຮຸນ​ແຮງ​ຈາກ​ການ​ໃຊ້​ອາວຸດ​ປືນ

    ບັນດາ​ເຫດການ​ຮຸນ​ແຮງ ທີ່​ໃຊ້​ອາວຸດ​ປືນ​ຢູ່​ໃນ ສ ອາ​ເມ​ຣິ​ກາ ໄດ້​ເຮັດ​ໃຫ້​ເກີດ​ຄວາມ​ເສຍ​ຫາຍ​ເປັນ​ມູນ​ຄ່າ​ເຖິງ 229 ຕື້​ໂດ​ລາ​ສະຫະລັດ ໃນ​ແຕ່​ລະ​ປີ ຊຶ່ງ​ເປັນ​ຕົວ​ເລກ​ເທົ່າ​ກັບ 1,4% ຂອງ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ ສ ອາ​ເມ​ຣິ​ກາ. ຄວາມ​ເສຍ​ຫາຍ​ເຫຼົ່ານັ້ນ ປະກອບ​ມີ​ລາຍ​ຮັບ​ທີ່​ເສຍ​ໄປ ການ​ສູນ​ເສຍ​ລາຍ​ຮັບ​ຂອງ​ຜູ້​ໃຊ້​ແຮງ​ງານ (ເຈົ້າ​ຂອງ​ທຸລະ​ກິດ) ຄ່າ​ໃຊ້​ຈ່າຍ​ໃຫ້​ແກ່​ການເຄື່ອນໄຫວ​ຂອງ​ຕຳຫຼວດ ແລະ ກອງ​ກຳລັງ​ສືບສວນ​ສອບ​ສວນ​ຜູ້​ຕ້ອງ​ຫາ ລວມ​ເຖິງ​ຄ່າ​ໃຊ້​ຈ່າຍ​ໃຫ້​ແກ່​ການ​ປິ່ນປົວ​ດ້ານ​ການ​ແພດ.

    ບົດ​ລາຍ​ງານ ທີ່​ໄດ້​ຮັບ​ການ​ປະຕິບັດ​ຕາມ​ການ​ສະເໜີ​ຂອງ​ບັນດາ​ສະມາຊິກ​ລັດ​ຖະ​ສະພາ ຈາກ​ພັກ​ເດ​ໂມ​ແກຣດ ຂອງ ສ ອາ​ເມ​ຣິ​ກາ ຊຶ່ງ​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 18 ກັນຍາ​ທີ່​ຜ່ານ​ມາ ໃຫ້​ຮູ້​ວ່າ ບັນດາ​ລັດ​ທີ່​ຜະລິດ​ກະສິກຳ ຄື​ລັດ ມີ​ຊີ​ຊິບ​ປີ ແລະ ລັດ ອາ​ລາ​ບາ​ມາ ມີຄ່າ​ໃຊ້​ຈ່າຍ​ໃຫ້​ແກ່​ການ​ແກ້​ໄຂ​ບັນດາ​ເຫດການ​ຮຸນ​ແຮງ​ດ້ວຍ​ການ​ໃຊ້​ອາວຸດ​ປືນ ແມ່ນ​ຢູ່​ໃນ​ລະດັບ​ສູງ​ສຸດ ເມື່ອ​ໄລ່​ຕາມ​ຂະໜາດ​ຂອງ​ພື້ນຖານ​ເສດຖະກິດ​ຂອງ​ສອງ​ລັດ​ດັ່ງກ່າວ. ໃນ​ຂະນະ​ດຽວ​ກັນ ບັນດາ​ລັດ​ທີ່​ມີ​ອັດຕາ​ສ່ວນ​ສູງ​ໃນ​ການ​ຄອບ​ຄອງ​ອາວຸດ​ປືນ ເຊັ່ນ​ລັດ ອາ​ລາ​​ສ​ກາ ຫຼື​ລັດ ອາ​ຄັນ​ຊາ​​ສ ຕ່າງ​ກໍ​ເປັນ​ລັດ​ທີ່​ມີ​ອັດຕາ​ສ່ວນ​ຂ້າ​ໂຕ​ຕາຍ​ສູງ​ສຸດ ດ້ວຍ​ການ​ໃຊ້​ອາວຸດ​ປືນ ໃນ​ຂະນະ​ທີ່​ເດັກນ້ອຍ ແລະ ຜູ້​ທີ່​ຍັງ​ບໍ່​ເຖິງ​ອາຍຸ​ກະສຽນ ຕ່າງ​ກໍ​ເປັນ​ເປົ້າ​ໝາຍ​ທີ່​ມີ​ຄວາມ​ສ່ຽງ​ບາດເຈັບ ຫຼື​ເສຍ​ຊີວິດ​ສູງ​ກວ່າ ເມື່ອ​ທຽບໃສ່​ປະເທດ​ພັດທະນາ​ອື່ນໆ.

    ບົດ​ລາຍ​ງານ​ດັ່ງກ່າວ ໄດ້​ໃຊ້​ຂໍ້​ມູນ​ຈາກ​ສູນ​ກົດໝາຍ Gifford ກ່ຽວ​ກັບ​ການ​ສະກັດ​ກັ້ນ​ຄວາມ​ຮຸນ​ແຮງ​ດ້ວຍ​ການ​ໃຊ້​ອາວຸດ​ປືນ ແລະ ສູນ​ຄວບ​ຄຸມພະ​ຍາດ​ຂອງ ສ ອາ​ເມ​ຣິ​ກາ ເພື່ອ​ວິໄຈ​ເຖິງ​ຄ່າ​ໃຊ້​ຈ່າຍ ໃນ​ການ​ແກ້​ໄຂ​ເຫດການ​ຮຸນ​ແຮງ ທີ່​ມີ​ການ​ໃຊ້​ອາວຸດ​ປືນ ຢູ່​ໃນ​ລັດ​ຕ່າງໆ​ຂອງ ສ ອາ​ເມ​ຣິ​ກາ.

    ຕົວ​ເລກ​ສະຖິຕິ​ໃຫ້​ຮູ້​ວ່າ ນັບ​ແຕ່​ຕົ້ນ​ປີ​ນີ້​ເປັນຕົ້ນ​ມາ ຢູ່​ໃນ ສ ອາ​ເມ​ຣິ​ກາ ໄດ້​ເກີດ​ເຫດການ​ຮຸນ​ແຮງ​ທີ່​ມີ​ການ​ໃຊ້​ອາວຸດ​ປືນ ເກີດ​ຂຶ້ນ 40.331 ລາຍ ໂດຍ​ມີ​ຜູ້​ເສຍ​ຊີວິດ 10.681 ຄົນ.

ຂ່າວທີ່ກ່ຽວຂ້ອງ