ແຫຼ່ງ​ນ້ຳ​ໃນ​ນະຄອນຫຼວງ​ຂອງ​ໂບ​ລີ​ວີ​ ພວມ​ບົກ​ແຫ້ງ​ລົງ

146 23 ກ.ຍ. 2019 ຂ່າວຕ່າງປະເທດ
ແຫຼ່ງ​ນ້ຳ​ໃນ​ນະຄອນຫຼວງ​ຂອງ​ໂບ​ລີ​ວີ​ ພວມ​ບົກ​ແຫ້ງ​ລົງ

    ແຫຼ່ງ​ນ້ຳ​ໃນ​ນະຄອນຫຼວງ ລາ​ປາ​​ສ ຂອງ​ໂບ​ລີ​ວີ ຊຶ່ງ​ເປັນ​ນະຄອນ​ທີ່​ຕັ້ງ​ຢູ່​ໃນ​ລະດັບ​ສູງ​ສຸດ​ໃນ​ໂລກ​ນັ້ນ ພວມ​ບັນ​ມື້​ນັບ​ບົກ​ແຫ້ງ​ລົງ ຍ້ອນ​ຜົນ​ກະທົບ​ປະສົມ​ກັນ ຂອງ​ສະພາບ​ນ້ຳ​ແຂງ​ລະລາຍ ກັບ​ໄພ​ແຫ້ງແລ້ງ ຊຶ່ງ​ເປັນ​ມາ​ຈາກ​ສະພາບ​ດິນ​ຟ້າ​ອາກາດ​ປ່ຽນແປງ.

    ປະຊາຊົນ 2,7 ລ້ານ​ຄົນ ຢູ່​ໃນ​ເຂດ​ຕົວ​ເມືອງ​ສູງ “ຊີ້​ຟ້າ” ດັ່ງກ່າວ ພວມ​ປະ​ເຊີນ​ກັບ​ຜົນ​ກະທົບ​ຂອງ​ສະພາບ​ດິນ​ຟ້າ​ອາກາດ​ປ່ຽນແປງ ນັ້ນ​ກໍ​ຄື​ສະພາບ​ແຫ້ງ​ແຫ້ງ​ຮ້າຍ​ແຮງ ທີ່​ແກ່ຍາວ​ເປັນ​ເວລາ​ຫຼາຍ​ເດືອນ ແຕ່​ປີ 2016-2017 ທີ່​ຖື​ວ່າ​ຂີ້ຮ້າຍ​ທີ່​ສຸດ​ຢູ່​ໃນ​ໂບ​ລີ​ວີ ພາຍ​ໃນ​ຮອບ 25 ປີຜ່ານມາ ທີ່​ໄດ້​ເຮັດ​ໃຫ້​ແຫຼ່ງ​ນ້ຳ​ຄ່ອຍໆ​ຫຼຸດ​ລົງ.

    ໃນ​ຂະນະ​ດຽວ​ກັນ ມີ​ສິ່ງ​ບົ່ງ​ບອກ​ໜຶ່ງ​ທີ່​ອາດ​ຈະ​ຂີ້ຮ້າຍ​ກວ່າ​ນັ້ນ ທີ່​ໃກ້​ຈະ​ເກີດ​ຂຶ້ນ ນັ້ນ​ກໍ​ຄື​ສາຍ​ນ້ຳ​ແຂງ Andean ທີ່​ເປັນ​ບ່ອນ​ສະໜອງ​ນ້ຳ​ໃຫ້​ແກ່​ອ່າງເກັບນ້ຳ​ຕ່າງໆ​ຢູ່​ໃນ​ນະຄອນ ລາ​ປາ​​ສ ພາຍ​ໃນ​ລະດູແລ້ງ ພວມ​ຄ່ອງໆ​ສູນຫາຍ​ໄປ​ດ້ວຍ​ຈັງຫວະ​ທີ່​ໜ້າ​ເຕືອນ​ໄພ.

    ປະທານາທິບໍດີ ເອ​ໂວ ໂມ​ຣາ​ເລ​​ສ ຜູ້ນຳ​ຂອງ​ໂບ​ລີ​ວີ ໄດ້​ປະກາດ “ພາວະ​ສຸກ​ເສີນ​ແຫ່ງ​ຊາດ” ແລະ ປະຊາຊົນ​ຫຼາຍ​ໝື່ນ​ຄົນ ຢູ່​ໃນ​ນະຄອນຫຼວງ ລາ​ປາ​​ສ ຕ້ອງ​ໄດ້​ປະຕິບັດ​ຂໍ້​ກຳນົດ​ການ​ຈຳກັດ​ໃຊ້​ນ້ຳ​ເປັນ​ເທື່ອ​ທຳ​ອິດ. ມາດ​ຕະການ​ດັ່ງກ່າວ​ໄດ້​ເປີດ​ກວ້າງ​ອອກ​ໄປ​ຍັງ​ອີກ 7 ນະຄອນ ແລະ ຢູ່​ໃນ​ເຂດ​ຊົນນະບົດ​ຂອງ​ໂບ​ລີ​ວີ.

    ເຖິງ​ຢ່າງໃດ​ກໍ​ຕາມ ປະທານາທິບໍດີ ໂມ​ຣາ​ເລ​​ສ ກໍ​ໄດ້​ປະກາດ​ໂຄງການ​ລົງທຶນ​ຂະໜາດ​ໃຫຍ່ ເພື່ອ​ຮັບປະກັນ​ໃຫ້​ແກ່​ແຫຼ່ງ​ສະໜອງ​ນ້ຳ​ໃນ​ອະນາຄົດ. ຂໍ້​ມູນ​ຈາກ​ບໍລິສັດ​ນ້ຳ​ປະປາ​ແຫ່ງ​ຊາດ EPSAS ຂອງ​ໂບ​ລີ​ວີ ໃຫ້​ຮູ້​ວ່າ ລັດຖະບານ​ໄດ້​ໃຊ້​ຈ່າຍ 64,7 ລ້ານ​ໂດ​ລາ​ສະຫະລັດ ເພື່ອ​ກໍ່ສ້າງ​ອ່າງເກັບນ້ຳ 4 ແຫ່ງ ແລະ ລະບົບ​ສະໜອງ​ນ້ຳ ຈາກ​ບຶງ​ຕ່າງໆ ຢູ່​ອ້ອມແອ້ມ​ສາຍພູ Andean.

ປຶ້ມ Atlas ກ່ຽວ​ກັບ​ສາຍ​ນ້ຳ​ແຂງ Andean ລະບຸ​ວ່າ ອົງການ​ສຶກ​ສາ ວິທະຍາສາດ ແລະ ວັດທະນະທຳ ຂອງ​ສະຫະ​ປະຊາ​ຊາດ (UNESCO) ໃຫ້​ຮູ້​ວ່າ ການ​ຮ້ອນ​ຂຶ້ນ​ໃນ​ທົ່ວ​ໂລກ ອາດ​ຈະ​ເປັນ​ສາເຫດ​ທີ່​ເຮັດ​ໃຫ້​ເນື້ອທີ່​ດິນ​ແຊ່​ແຂງ​ຕະຫຼອດ​ການ​ຢູ່​ໃນ​ໂບ​ລີ​ວີ ສູນຫາຍ​ໄປ 95% ພາຍ​ໃນ​ປີ 2050 ແລະ  99% ພາຍ​ໃນ​ປີ 2099.

ຂ່າວທີ່ກ່ຽວຂ້ອງ