ນວ ມອບເຄື່ອງຊ່ວຍເຫຼືອໃຫ້ແຂວງສະຫວັນນະເຂດ ພ້ອມເຂົ້າຮ່ວມມອບໃຫ້ 3 ເມືອງ

232 23 ກ.ຍ. 2019 ຂ່າວໜ້າ​ໜຶ່ງ
ນວ ມອບເຄື່ອງຊ່ວຍເຫຼືອໃຫ້ແຂວງສະຫວັນນະເຂດ ພ້ອມເຂົ້າຮ່ວມມອບໃຫ້ 3 ເມືອງ

    ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ຄະ­ນະ ໄດ້​ນຳ​ເອົາ​ເຄື່ອງ​ຊ່ວຍ­ເຫຼືອ​ຈາກ​ຄະ­ນະ​ພັກ ອົງ­ການ​ປົກ­ຄອງ ສະ­ພາ​ປະ­ຊາ­ຊົນ ກໍ​ຄື ຊາວ​ນະ­ຄອນ­ຫຼວງ​ວຽງ​ຈັນ ມອບ​ໃຫ້​ປະ­ຊາ­ຊົນ​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວນ​ຢູ່​ແຂວງ​ສະ­ຫວັນ​ນະ​ເຂດ ພ້ອມ​ທັງ​ເຂົ້າ​ຮ່ວມ​ພິ­ທີ​ມອບ​ຮັບ​ເຄື່ອງ​ຊ່ວຍ­ເຫຼືອ​ດັ່ງ­ກ່າວ​ໃຫ້ 3 ເມືອງ.

    ພິ­ທີ​ມອບ-ຮັບ​ເຄື່ອງ​ຊ່ວຍ­ເຫຼືອ​ດັ່ງ­ກ່າວ ຈັດ​ຂຶ້ນ​ໃນ​ວັນ​ທີ 19 ກັນ­ຍາ 2019 ທີ່​ຫ້ອງ​ວ່າ­ການ​ປົກ­ຄອງ​ແຂວງ​ສະ­ຫວັນ​ນະ​ເຂດ ໂດຍ​ການ​ກ່າວ​ມອບ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ແລະ ກ່າວ​ຮັບ​ໂດຍ​ທ່ານ ສັນ­ຕິ­ພາບ ພົມ­ວິ­ຫານ ເຈົ້າ­ແຂວງ​ສະ­ຫວັນ​ນະ​ເຂດ ເຊິ່ງ​ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ ເຄື່ອງ​ຊ່ວຍ­ເຫຼືອ​ທີ່​ນຳ­ໄປ​ມອບ​ໃນ​ຄັ້ງ​ນີ້ ປະ­ກອບ​ມີ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເຂົ້າ­ສານ ແລະ ແນວ​ພັນ​ເຂົ້າ ຄິດ​ເປັນ​ມູນ​ຄ່າ 86,6 ລ້ານ​ກີບ ພ້ອມ​ເງິນ­ສົດ 145 ລ້ານ​ກີບ.

    ສຳ­ລັບ​ນ້ຳ​ຖ້ວມ ຢູ່​ແຂວງ​ສະ­ຫວັນ​ນະ​ເຂດ ກະ­ທົບ​ຢູ່​ຫຼາຍ​ເມືອງ ໜັກ​ກວ່າ​ໝູ່​ແມ່ນ​ເມືອງ​ຈຳ​ພອນ ສອງ​ຄອນ ແລະ ຊົນ​ນະ​ບູ​ລີ ຈຳ­ນວນ​ບ້ານ​ຖືກ​ກະ­ທົບ 165 ບ້ານ ປະ­ກອບ​ມີ​ຫຼາຍ​ກວ່າ 13.736 ຄອບ­ຄົວ ປະ­ຊາ­ຊົນ​ໄດ້​ຍົກ­ຍ້າຍ​ໄປ​ຢູ່​ບ່ອນ​ລີ້​ໄພ 81 ບ້ານ ມີ 7.433 ຄອບ­ຄົວ ເນື້ອ­ທີ່​ນາ­ປີ​ຖືກ​ຖ້ວມ 49.274 ເຮັກ­ຕາ ເນື້ອ­ທີ່​ປູກ​ພືດ​ເສຍ​ຫາຍ 2.585 ເຮັກ­ຕາ ລະ­ບົບ​ຊົນ­ລະ­ປະ­ທານ​ຖືກ​ກະ­ທົບ ເຊັ່ນ: ອ່າງ­ເກັບ­ນ້ຳ 11 ແຫ່ງ ຄູ​ກັນ​ນ້ຳ 4 ແຫ່ງ ປະ­ຕູ​ນ້ຳ 12 ແຫ່ງ ແລະ ສະ­ຖາ­ນີ​ສູບ​ນ້ຳ 9 ແຫ່ງ ເສັ້ນ­ທາງ​ຖືກ​ກະ­ທົບ​ຫຼາຍ​ກວ່າ 54 ເສັ້ນ ໂຮງ­ຮຽນ​ຖືກ​ຖ້ວມ 165 ແຫ່ງ ແລະ ມີ 187 ແຫ່ງ ບໍ່​ສາ­ມາດ​ເປີດ​ສົກ­ຮຽນ​ໃໝ່​ໃນ​ວັນ​ທີ 2 ກັນ­ຍາ​ໄດ້ ສ່ວນ​ສຸກ­ສາ­ລາ​ຖືກ​ກະ­ທົບ 8 ແຫ່ງ ບໍ່​ສາ­ມາດ​ໃຫ້​ບໍ­ລິ­ການ​ປະ­ຊາ­ຊົນ​ໄດ້.

    ນອກ​ນັ້ນ ໃນ​ວັນ​ທີ 20 ກັນ­ຍາ 2019 ທ່ານ ສິນ​ລະ​ວົງ ຄຸດ​ໄພ­ທູນ ພ້ອມ​ດ້ວຍ​ຄະ­ນະ ກໍ​ໄດ້​ເຂົ້າ​ຮ່ວມ​ການ​ມອບ​ເຄື່ອງ​ຊ່ວຍ­ເຫຼືອ​ໃຫ້​ກັບ​ປະ­ຊາ­ຊົນ ​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຢູ່ 3 ເມືອງ ທີ່​ຫ້ອງ​ວ່າ­ການ​ປົກ­ຄອງ​ເມືອງ​ຈຳ​ພອນ ໂດຍ​ການ​ມອບ​ຂອງ​ທ່ານ ພອນ​ແກ້ວ ພຸດ​ທະ​ໄກ​ຍະ​ລາດ ຮອງ​ເຈົ້າ­ແຂວງ​ສະ­ຫວັນ​ນະ​ເຂດ ແລະ ຮັບ​ໂດຍ​ເຈົ້າ­ເມືອງ​ຈຳ​ພອນ ສອງ​ຄອນ ແລະ ເມືອງ​ຊົນ​ນະ​ບູ​ລີ ເຊິ່ງ​ມີ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ເຄື່ອງ​ທີ່​ນຳ­ໄປ​ມອບ​ແມ່ນ​ເຄື່ອງ​ຊ່ວຍ­ເຫຼືອ​ທີ່​ເປັນ​ຮ່ວງ​ດຽວ​ກັບ​ນະ­ຄອນ­ຫຼວງ​ວຽງ​ຈັນ​ມອບ​ໃຫ້ ເຊິ່ງ​ປະ­ກອບ​ມີ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເຂົ້າ­ສານ ແລະ ແນວ​ພັນ​ເຂົ້າ.

ຂ່າວທີ່ກ່ຽວຂ້ອງ