ຮອງນາຍົກ ມອບເງິນຊ່ວຍເຫຼືອໃຫ້ຜູ້ປະສົບໄພນ້ຳຖ້ວມ

199 23 ກ.ຍ. 2019 ຂ່າວໜ້າ​ໜຶ່ງ

    ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ປະ­ທານ​ອົງການ​ກວດ­ກາ​ລັດ­ຖະ­ບານ ແລະ ຫົວ­ໜ້າ​ອົງ­ການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ພ້ອມ​ຄະ­ນະ ໄປ​ຢ້ຽມ­ຢາມ ແລະ ເຮັດ​ວຽກ​ຢູ່​ບ້ານ​ແຊ​ລະ­ບຳ ເມືອງ​ຊະ­ນະ​ສົມ­ບູນ ແຂວງ​ຈຳ­ປາ​ສັກ ວັນ​ທີ 19 ກັນ­ຍາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ບຸນ​ຖອງ ດີ​ວິ​ໄຊ ເຈົ້າ­ແຂວງ​ຈຳ­ປາ​ສັກ ທ່ານ​ເຈົ້າ­ເມືອງ​ຊະ­ນະ​ສົມ­ບູນ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ​ເຈົ້າ­ເມືອງ​ຊະ­ນະ​ສົມ­ບູນ ກ່າວ​ວ່າ: ບ້ານ​ແຊ​ລະ­ບຳ ມີ 368 ຫຼັງ­ຄາ​ເຮືອນ 388 ຄອບ­ຄົວ ປະ­ຊາ­ກອນ 2.056 ຄົນ ເນື້ອ­ທີ່ 778,26 ເຮັກ­ຕາ ໃນ​ນີ້ ເນື້ອ­ທີ່​ເຮັດ​ການ​ຜະ­ລິດ 247,63 ເຮັກ­ຕາ ຖືກ​ນ້ຳ​ຖ້ວມ​ເສຍ​ຫາຍ 100% ເຮືອນ​ສູນ­ຫາຍ 19 ຫຼັງ­ຄາ ເຮືອນ​ເປ່​ເພ​ບໍ່​ສາ­ມາດ​ສ້ອມ­ແປງ​ໄດ້ 90 ຫຼັງ­ຄາ ສັດ­ລ້ຽງ​ສູນ­ຫາຍ ຄື: ງົວ 25 ໂຕ ຄວາຍ 6 ໂຕ ໝູ 26 ໂຕ ແບ້ 6 ໂຕ ສັດ​ປີກ 1.561 ໂຕ ຊົນ​ລະ ປະ­ທານ​ຖືກ​ເຊາະ​ເຈື່ອນ 500 ແມັດ ຂົວ​ຂາດ 1 ແຫ່ງ ໂຮງ­ຮຽນ​ເສຍ​ຫາຍ 3 ຫຼັງ ລວມ​ຜົນ​ເສຍ​ຫາຍ ປະ­ມານ 16 ຕື້​ກີບ ຈາກ​ນັ້ນ ທ່ານ ພູ​ວັນ ແພງ​ມະ​ເກດ ວ່າ­ການ​ຜູ້­ອຳ­ນວຍ­ການ​ເຂື່ອນ​ໄຟ­ຟ້າ​ແຊ​ລະ­ບຳ ກໍ​ໄດ້​ລາຍ​ງານ​ຜົນ​ເສຍ​ຫາຍ​ຂອງ​ເຂື່ອນ​ທີ່​ຖືກ​ນ້ຳ​ຖ້ວມ​ວ່າ: ເຂື່ອນ​ໄຟ­ຟ້າ​ແຊ​ລະ­ບຳ ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຄັ້ງ​ນີ້​ໜັກ​ສົມ­ຄວນ ເຮັດ​ໃຫ້​ໂຮງ​ຈັກ work shoft ແລະ Swichyard ຖືກ​ນ້ຳ​ຖ້ວມ ເສັ້ນ­ທາງ​ແຕ່​ທ່າ​ບັກ​ລົງ​ຮອດ​ໂຮງ​ຈັກ​ຖືກ​ຕັດ­ຂາດ ແລະ ເຊາະ​ເຈື່ອນ ຍາວ 680 ແມັດ.

    ໂອ­ກາດ​ນີ້ ທ່ານ​ຮອງ​ນາ­ຍົກ ກໍ​ໄດ້​ຮຽກ­ຮ້ອງ​ປະ­ຊາ­ຊົນ​ໃຫ້​ມີ​ຄວາມ​ສາ­ມັກ­ຄີ​ຮ່ວມ​ແຮງ​ຮ່ວມ​ໃຈ​ກັນ​ຟື້ນ​ຟູ​ສະ­ພາບ​ໃຫ້​ກັບ​ໄປ​ສູ່​ປົກ­ກະ­ຕິ​ໂດຍ​ໄວ ດ້ານ​ການ­ຈັດ­ຕັ້ງ ພັກ-ລັດ ກໍ​ຈະ​ພະ­ຍາ­ຍາມ​ທຸ້ມ­ເທ​ຊັບ​ສິນ ເທົ່າ​ທີ່​ມີ​ນັບ​ທັງ​ສ່ວນ​ທີ່​ລະ­ດົມ​ໄດ້​ຈາກ​ສັງ­ຄົມ ພ້ອມ​ກັນ​ປະ­ກອບ­ສ່ວນ​ໃນ​ການ​ຟື້ນ​ຟູ​ບັນ­ຫາ​ຕ່າງໆ ເປັນ­ຕົ້ນ ພື້ນ ຖານ​ໂຄງ​ລ່າງ ແລະ ສິ່ງ​ສາ­ທາ­ລະ­ນະ​ຂອງ​ແຕ່​ລະ​ບ້ານ​ທີ່​ເສຍ​ຫາຍ ພ້ອມ​ກັນ​ຮັກ­ສາ​ສຸ­ຂະ­ພາບ ໂດຍ​ສະ­ເພາະ ປ້ອງ​ກັນ​ພະ­ຍາດ​ລະ­ບາດ​ທີ່​ມາ​ຕາມ​ນ້ຳ ມີ​ສະ­ຕິ​ຕໍ່​ການ​ສວຍ­ໂອ­ກາດ​ຂອງ​ກຸ່ມ​ຄົນ​ບໍ່​ດີ ທີ່​ໂຄ­ສະ­ນາ​ຊວນ​ເຊື່ອ​ບິດ​ເບືອນ​ຈາກ​ຄວາມ​ເປັນ​ຈິງ ແລະ ອື່ນໆ ພ້ອມ​ນີ້ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ຍັງ​ໄດ້​ມອບ​ເງິນ 100 ລ້ານ​ກີບ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ ເຄື່ອງ­ໃຊ້​ຄົວ​ເຮືອນ 40 ລ້ານ​ກີບ ໃຫ້​ຜູ້​ປະ­ສົບ​ໄພ​ນ້ຳ​ຖ້ວມ ຕື່ມ​ອີກ.

ຂ່າວທີ່ກ່ຽວຂ້ອງ