ຂ່າວຫຼ້າສຸດ

ບໍລິສັດ ໄຟຟ້ານ້ຳເທີນ 2 ຊ່ວຍເຫຼືອຜູ້ປະສົບໄພນ້ຳຖ້ວມ 1 ຕື້ກີບ

333 20 ກ.ຍ. 2019 ຂ່າວໜ້າ​ໜຶ່ງ
ບໍລິສັດ ໄຟຟ້ານ້ຳເທີນ 2 ຊ່ວຍເຫຼືອຜູ້ປະສົບໄພນ້ຳຖ້ວມ 1 ຕື້ກີບ

    ວັນ​ທີ 17 ກັນ­ຍາ 2019 ຜ່ານ​ມາ ຢູ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ໄດ້​ມອບ​ເງິນ ແລະ ເຄື່ອງ​ບັນ­ເທົາ​ທຸກ ລວມ​ມູນ​ຄ່າ 1 ຕື້​ກີບ ເພື່ອ​ຊ່ວຍ­ເຫຼືອ​ແກ່​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ແຂວງ​ພາກ​ກາງ ແລະ ພາກ​ໃຕ້ ໃຫ້​ກຽດ​ກ່າວ​ຮັບ​ໂດຍ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ.

    ທ່ານ ຊອງ ຟີ​ລິບ ບຸຍ​ຊົງ ປະ­ທານ​ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ກ່າວ​ວ່າ: ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ຈະ​ຢູ່​ຄຽງ​ຂ້າງ​ປະ­ຊາ­ຊົນ​ລາວ​ຜູ້​ທີ່​ໄດ້​ຮັບ​ຜົນ​ກະ­ທົບ ພວກ​ເຮົາ​ຫວັງ​ຢ່າງ​ຍິ່ງ​ວ່າ­ການ​ປະ­ກອບ­ສ່ວນ​ຄັ້ງ​ນີ້​ ຈະ​ຊ່ວຍ​ໃຫ້​ບັນ­ດາ​ຊຸມ​ຊົນ​ອ້ອມ​ຂ້າງ​ໂຄງ­ການ​ສາ­ມາດ​ຟື້ນ​ຟູ​ຈາກ​ໄພ​ນ້ຳ​ຖ້ວມ​ທີ່​ຮຸນ​ແຮງ ແລະ ປະ­ກອບ­ສ່ວນ​ເຂົ້າ​ໃນ​ການ​ຟື້ນ​ຟູ​ຂົງ­ເຂດ​ດັ່ງ­ກ່າວ​ໃນ​ໄລ­ຍະ​ຍາວ.

    ການ​ຊ່ວຍ­ເຫຼືອ​ຂອງ​ບໍ­ລິ­ສັດ​ລວມ​ມູນ​ຄ່າ 1 ຕື້​ກີບ ໂດຍ​ມອບ​ໃຫ້​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໃນ​ນັ້ນ ເງິນ​ຈຳ­ນວນ 500 ລ້ານ​ກີບ ຈະ​ຖືກ​ມອບ​ໃຫ້​ແຂວງ​ຄຳ​ມ່ວນ ເຊິ່ງ​ເປັນ​ທີ່​ຕັ້ງ​ໂຄງ­ການ​ນ້ຳ​ເທີນ 2 ແລະ ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ຈະ​ເຂົ້າ​ຮ່ວມ​ການ​ຟື້ນ​ຟູ ສະ­ໜອງ​ວັດ­ຖຸ​ເຄື່ອງ­ໃຊ້​ທີ່​ຈຳ­ເປັນ​ໃຫ້​ຜູ້​ປະ­ສົບ​ໄພ.

    ທ່ານ ໂອ​ລິ​ວີ​ເຢ ດິດ​ຣີ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ກ່າວ​ວ່າ: ເນື່ອງ​ຈາ​ກວ່າ​ໂຄງ­ການ​ນີ້ ໄດ້​ດຳ­ເນີນ​ກິດ­ຈະ­ການ​ໃນ​ຂົງ­ເຂດ​ນີ້​ເປັນ​ເວ­ລາ​ດົນ​ນານ​ແລ້ວ ພວກ​ເຮົາ​ມີ​ຄວາມ​ກັງ­ວົນ​ຫຼາຍ​ຕໍ່​ຜົນ​ເສຍ​ຫາຍ​ທີ່​ເກີດ​ຂື້ນ​ຈາກ​ໄພ​ນ້ຳ​ຖ້ວມ​ຄັ້ງ​ນີ້ ເພື່ອ​ຊ່ວຍ ແລະ ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທີ່​ອາ­ໄສ​ຢູ່​ເຂດ​ລຸ່ມ​ເຮືອນ​ຈັກ­ດີ​ຂຶ້ນ ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ໄດ້​ກະ­ກຽມ​ດ້ານ​ທຶນ​ຮອດ ແລະ ວັດ­ຖຸ ເພື່ອ​ຊ່ວຍ­ເຫຼືອ​ແຂວງ​ຄຳ​ມ່ວນ ແລະ ແຂວງ​ອື່ນໆ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຄັ້ງ​ນີ້. 

    ສຳ­ລັບ​ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ແມ່ນ​ບໍ­ລິ­ສັດ​ສາ­ກົນ ເລີ່ມ​ການ​ຜະ­ລິດ​ໄຟ­ຟ້າ​ແຕ່​ປີ 2010 ເຊິ່ງ​ມີ​ຜູ້​ຖື​ຫຸ້ນ​ແມ່ນ​ລັດ­ຖະ­ບານ​ລາວ ບໍ­ລິ­ສັດ​ຈາກ​ໄທ ແລະ ຝຣັ່ງ ເຮືອນ​ຈັກ​ທີ່​ມີ​ກຳ­ລັງ​ຕິດ​ຕັ້ງ 1.070 ເມ​ກາ​ວັດ ຕັ້ງ​ຢູ່​ແຂວງ​ຄຳ​ມ່ວນ ພາກ​ກາງ­ຂອງ ສປປ ລາວ ໂຄງ­ການ​ນ້ຳ​ເທີນ 2 ເປັນ​ສ່ວນ​ໜຶ່ງ​ທີ່​ສຳ­ຄັນ​ວຽກ​ງານ​ພັດ­ທະ­ນາ​ປະ­ເທດ ເຊິ່ງ​ໄດ້​ສະ­ແດງ​ອອກ​ໃຫ້​ເຫັນ​ໂດຍ​ການ​ມີ​ສ່ວນ​ຮ່ວມ​ໃນ​ການ​ພັດ­ທະ­ນາ​ແບບ​ຍືນ​ຍົງ​ຂອງ ສປປ ລາວ ແລະ ເປັນ​ການ​ພັດ­ທະ­ນາ​ພະ­ລັງ­ງານ​ທີ່​ປ່ອຍ​ອາຍ​ກາ​ບອນ​ທີ່​ຕ່ຳ​ໃນ​ພາກ​ພື້ນ​ອາ­ຊີ​ຕາ­ເວັນ​ອອກ ໄຟ­ຟ້າ​ທີ່​ຜະ­ລິດ​ໄດ້ 95% ແມ່ນ​ສົ່ງ​ຂາຍ​ໄປ​ປະ­ເທດ​ໄທ.

ຂ່າວທີ່ກ່ຽວຂ້ອງ