ຂ່າວຫຼ້າສຸດ

ນະຄອນຫຼວງ ມອບເຄື່ອງຊ່ວຍເຫຼືອ ຜູ້ຖືກກະທົບຈາກໄພນ້ຳຖ້ວມ ຢູ່ແຂວງຄຳມ່ວນ

222 20 ກ.ຍ. 2019 ຂ່າວໜ້າ​ໜຶ່ງ
ນະຄອນຫຼວງ ມອບເຄື່ອງຊ່ວຍເຫຼືອ ຜູ້ຖືກກະທົບຈາກໄພນ້ຳຖ້ວມ ຢູ່ແຂວງຄຳມ່ວນ

    ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ຄະ­ນະ ໄດ້​ນຳ​ເອົາ​ເຄື່ອງ​ອຸ­ປະ­ໂພກ-ບໍ­ລິ­ໂພກ ຈາກ​ຄະ­ນະ​ພັກ ອົງ­ການ​ປົກ­ຄອງ ສະ­ພາ​ປະ­ຊາ­ຊົນ ແລະ ປະ­ຊາ­ຊົນ​ຊາວ​ນະ­ຄອນ­ຫຼວງ​ວຽງ​ຈັນ ມອບ​ໃຫ້​ປະ­ຊາ­ຊົນ​ຜູ້​ຖືກ​ກະ­ທົບ​ຈາກ​ໄພ​ນ້ຳ​ຖ້ວມ​ຢູ່​ແຂວງ​ຄຳ​ມ່ວນ.

    ເຄື່ອງ​ທີ່​ນຳ​ມາ​ມອບ​ໃນ​ຄັ້ງ​ນີ້ ປະ­ກອບ​ມີ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເຂົ້າ­ສານ ແລະ ແນວ​ພັນ​ເຂົ້າ ເປັນ​ມູນ​ຄ່າ 33,7 ລ້ານ​ກີບ ພ້ອມ​ເງິນ­ສົດ​ຈຳ­ນວນ 40 ລ້ານ​ກີບ ເພື່ອ​ປະ­ກອບ­ສ່ວນ​ແບ່ງ​ເບົາ​ຄວາມ​ຫຍຸ້ງ­ຍາກ​ຂອງ​ປະ­ຊາ­ຊົນ​ຊາວ​ແຂວງ​ຄຳ​ມ່ວນ​ຜູ້​ຖືກ​ກະ­ທົບ​ຈາກ​ໄພ​ນ້ຳ​ຖ້ວມ​ຄັ້ງ​ນີ້.

     ພິ­ທີ​ມອບ-ຮັບ​ເຄື່ອງ​ຊ່ວຍ­ເຫຼືອ​ດັ່ງ­ກ່າວ​ຈັດ​ຂຶ້ນ​ໃນ​ວັນ​ທີ 19 ກັນ­ຍາ 2019 ໂດຍ​ການ​ກ່າວ​ມອບ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ແລະ ກ່າວ​ຮັບ​ໂດຍ​ທ່ານ ໂອ​ໄດ ສຸ­ດາ​ພອນ ເຈົ້າ­ແຂວງ​ຄຳ​ມ່ວນ ໂດຍ​ມີ​ພາກ­ສ່ວນ​ກ່ຽວ­ຂ້ອງ​ຂອງ​ທັງ​ສອງ​ຝ່າຍ​ເຂົ້າ​ຮ່ວມ.

    ສຳ­ລັບ​ສະ­ພາບ​ນ້ຳ​ຖ້ວມ​ຢູ່​ແຂວງ​ຄຳ​ມ່ວນ ໃນ​ຕົ້ນ​ເດືອນ​ກັນ­ຍາ​ທີ່​ຜ່ານ​ມາ ໄດ້​ສົ່ງ​ຜົນ​ກະ­ທົບ​ເຖິງ 6 ເມືອງ ຄື: ເມືອງ​ໜອງ​ບົກ ເຊ​ບັ້ງ­ໄຟ ມະ­ຫາ​ໄຊ ຍົມ​ມະ​ລາດ ບົວ­ລະ­ພາ ແລະ ເມືອງ​ໄຊ​ບົວ­ທອງ ມີ​ບ້ານ​ໄດ້​ຮັບ​ຜົນ​ກະ­ທົບ 231 ບ້ານ ປະ­ຊາ­ຊົນ​ຖືກ​ກະ­ທົບ 16.670 ຄອບ­ຄົວ ມີ 69.844 ຄົນ ໄດ້​ຍົກ­ຍ້າຍ​ໄປ​ຢູ່​ຈຸດ​ຫຼົບ​ໄພ-ເຮືອນ​ພີ່­ນ້ອງ 36 ບ້ານ ມີ 1.325 ຄອບ­ຄົວ ມີ 5.589 ຄົນ ນອກ​ນີ້ ຍັງ​ສົ່ງ​ຜົນ​ກະ­ທົບ​ໃສ່​ເນື້ອ­ທີ່​ນາ 18.861 ເຮັກ­ຕາ ເທົ່າ​ກັບ 22,25% ຂອງ​ເນື້ອ­ທີ່ 83.528 ເຮັກ­ຕາ ເນື້ອ­ທີ່​ປູກ​ພືດ​ກະ­ທົບ 808 ເຮັກ­ຕາ ເທົ່າ​ກັບ 12,13% ຂອງ​ເນື້ອ­ທີ່ 6.660 ເຮັກ­ຕາ ລະ­ບົບ​ຊົນ­ລະ­ປະ­ທານ​ຖືກ​ກະ­ທົບ 51 ແຫ່ງ ມີ​ຄວາມ​ຍາວ 125.203 ແມັດ ສັດ­ລ້ຽງ ໜອງ​ປາ​ໄດ້​ຮັບ​ຄວາມ​ເສຍ​ຫາຍ ເສັ້ນ­ທາງ​ຄົມ­ມະ­ນາ­ຄົມ​ຖືກ​ຖ້ວມ 31 ເສັ້ນ ມີ​ຄວາມ​ຍາວ 77.660 ແມັດ ໂຮງ­ຮຽນ​ຖືກ​ນ້ຳ​ຖ້ວມ 154 ແຫ່ງ ສົ່ງ​ຜົນ​ໃຫ້​ໂຈະ​ການ​ຮຽນ​ຊົ່ວ­ຄາວ ສຸກ­ສາ­ລາ​ຖືກ​ນ້ຳ​ຖ້ວມ 6 ແຫ່ງ ບໍ່​ສາ­ມາດ​ເປີດ​ໃຫ້​ບໍ­ລິ­ການ​ໄດ້ ພ້ອມ​ນັ້ນ ລະ­ບົບ​ສາ​ທາ​ລະ​ນຸ​ປະ​ໂພ​ກໍ​ໄດ້​ຮັບ​ຄວາມ​ເສຍ​ຫາຍ​ສົມ­ຄວນ.

ຂ່າວທີ່ກ່ຽວຂ້ອງ