ຂ່າວຫຼ້າສຸດ

ປະດັບຫຼຽນກາມິດຕະພາບ ໃຫ້ທູດສະຫະພັນຣັດເຊຍ

258 20 ກ.ຍ. 2019 ຂ່າວໜ້າ​ໜຶ່ງ
ປະດັບຫຼຽນກາມິດຕະພາບ ໃຫ້ທູດສະຫະພັນຣັດເຊຍ

    ພິ­ທີ​ປະ­ດັບ​ຫຼຽນ​ກາ​ມິດ­ຕະ­ພາບ​ໃຫ້​ທ່ານ ມີ​ຄາ​ອິນ ບາ​ຣານ​ນົບ ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ ແຫ່ງ ສະ­ຫະ­ພັນ​ຣັດ​ເຊຍ ປະ­ຈຳ ສປປ ລາວ ຈັດ​ຂຶ້ນ​ວັນ​ທີ 19 ກັນ­ຍາ 2019 ຢູ່​ກະ­ຊວງ​ການ​ຕ່າງ­ປະ­ເທດ ໃນ​ໂອ­ກາດ​ທ່ານ​ສຳ­ເລັດ​ການ​ປະ­ຕິ­ບັດ​ໜ້າ­ທີ່​ການ​ທູດ​ຢູ່ ສປປ ລາວ ເຊິ່ງ​ຕາງ­ໜ້າ​ໃຫ້​ລັດ­ຖະ­ບານ ສປປ ລາວ ປະ­ດັບ​ຫຼຽນ​ໂດຍ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ມີ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ໄລ­ຍະ​ເວ­ລາ 5 ປີ­ຜ່ານ­ມາ ທ່ານ​ເອກ​ອັກ​ຄະ​ລັດ​ຖະ​ທູດ​ຣັດ​ເຊຍ ໄດ້​ປະ­ກອບ­ສ່ວນ​ຢ່າງ​ຕັ້ງ­ໜ້າ​ໃນ​ການ​ເສີມ​ຂະ ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື ລະ­ຫວ່າງ ສປປ ລາວ ແລະ ສະ­ຫະ­ພັນ​ຣັດ​ເຊຍ ດ້ວຍ​ການ​ເອົາ­ໃຈ­ໃສ່​ປະ­ສານ​ງານ ຊຸກ­ຍູ້​ການ​ແລກ­ປ່ຽນ​ການ​ຢ້ຽມ­ຢາມ​ຂອງ​ຄະ­ນະ​ຜູ້​ແທນ​ຂັ້ນ​ສູງ​ລະ­ດັບ​ຕ່າງໆ ນັບ​ແຕ່​ລະ­ດັບ​ການ​ນຳ​ຂອງ​ພັກ ແລະ ລັດ ຈົນ​ເຖິງ​ອົງ​ການ­ຈັດ­ຕັ້ງ​ມະ­ຫາ­ຊົນ ຊຸກ­ຍູ້​ການ​ນຳ​ຣັດ​ເຊຍ ອະ­ນຸ­ມັດ​ເຄື່ອງ​ຊ່ວຍ­ເຫຼືອ​ບັນ ເທົາ​ທຸກ​ໃຫ້​ປະ­ຊາ­ຊົນ​ລາວ ທີ່​ໄດ້​ຮັບ​ຜົນ​ກະ­ທົບ​ຈາກ​ເຫດ­ການ​ໄພ​ນ້ຳ​ຖ້ວມ ຢູ່​ແຂວງ​ອັດ​ຕະ​ປື ປີ 2018 ມູນ​ຄ່າ 330.000 ໂດ​ລາ​ສະ­ຫະ­ລັດ ຫຼື ປະ­ມານ 2,9 ຕື້​ກີບ ນອກ​ນີ້ ພາຍ​ໃຕ້​ການ​ນຳ­ພາ​ຂອງ​ທ່ານ​ເອກ​ອັກ​ຄະ​ລັດ​ຖະ​ທູດ​ສະ­ຖານ­ທູດ​ຣັດ​ເຊຍ ປະ­ຈຳ ສປປ ລາວ ໄດ້​ປະ­ກອບ­ສ່ວນ​ເຂົ້າ​ຮ່ວມ​ກິດ­ຈະ­ກຳ​ຕ່າງໆ​ຂອງ​ສອງ​ປະ­ເທດ ທີ່​ຈັດ​ຂຶ້ນ​ແຕ່​ລະ​ປີ ເຮັດ​ໃຫ້­ການ​ພົວ­ພັນ​ຮ່ວມ​ມື​ສອງ​ຝ່າຍ​ມີ​ບາດ­ກ້າວ​ຂະ­ຫຍາຍ­ຕົວ​ຫຼາຍ​ຂຶ້ນ ເຊັ່ນ: ຂະ­ແໜງ­ການ​ສຶກ​ສາ ການ​ລົງ­ທຶນ ການ​ທະ­ຫານ ການ­ທ່ອງ­ທ່ຽວ ແລະ ອື່ນໆ.

    ເພື່ອ​ເປັນ​ການ​ຍ້ອງ­ຍໍ​ສັນ­ລະ­ເສີນ ແລະ ຊົມ­ເຊີຍ​ຄຸນ­ງາມ­ຄວາມ­ດີ ກໍ​ຄື ຜົນ­ງານ​ຂອງ​ທ່ານ​ທູດ​ດັ່ງ­ກ່າວ ນາ­ຍົກ­ລັດ­ຖະ­ມົນ­ຕີ ສປປ ລາວ ຈຶ່ງ​ໄດ້​ຕົກ­ລົງ​ປະ­ດັບ​ຫຼຽນ​ກາ​ມິດ­ຕະ­ພາບ​ໃຫ້​ທ່ານ ມີ​ຄາ​ອິນ ບາ​ຣານ​ນົບ ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ ແຫ່ງ ສະ­ຫະ­ພັນ​ຣັດ​ເຊຍ ປະ­ຈຳ ສປປ ລາວ.

ຂ່າວທີ່ກ່ຽວຂ້ອງ