ຂ່າວຫຼ້າສຸດ

ປະກາດສ້າງຕັ້ງສະມາຄົມມັນຕົ້ນລາວ ຢ່າງເປັນທາງການ

219 20 ກ.ຍ. 2019 ຂ່າວໜ້າ​ໜຶ່ງ
ປະກາດສ້າງຕັ້ງສະມາຄົມມັນຕົ້ນລາວ ຢ່າງເປັນທາງການ

    ພິ­ທີ​ປະ­ກາດ​ສ້າງ­ຕັ້ງ​ສະ­ມາ­ຄົມ​ມັນ­ຕົ້ນ​ລາວ ຈັດ​ຂຶ້ນ​ຢ່າງ​ເປັນ​ທາງ​ການ ວັນ​ທີ 19 ກັນ­ຍາ 2019 ຢູ່​ໂຮງ­ແຮມ​ລາວ​ພລາ​ຊາ ໂດຍ​ມີ​ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດ­ຖະ­ມົນ­ຕີ ກະ­ຊວງ​ກະ­ສິ­ກຳ ແລະ ປ່າ­ໄມ້ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກະ­ຊວງ ພະ­ແນກ­ການ​ກ່ຽວ­ຂ້ອງ ຄະ­ນະ​ບໍ­ລິ­ຫານ ສະ­ມາ­ຊິກ​ສະ­ມາ­ຄົມ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ​ນາງ ອິນ​ແປງ ຊາ​ມຸນ­ຕີ ປະ­ທານ​ບໍ­ລິ­ສັດ​ປາກ​ຊ່ອງ​ພັດ­ທະ­ນາ​ຂາ​ເຂົ້າ-ຂາ​ອອກ ຈຳ­ກັດ​ຜູ້​ດຽວ ຫົວ­ໜ້າ​ຄະ­ນະ​ຂົນ­ຂວາຍ​ການ​ສ້າງ­ຕັ້ງ​ສະ­ມາ­ຄົມ​ມັນ­ຕົ້ນ​ລາວ ກ່າວ​ວ່າ: ທຸ­ລະ​ກິດ​ມັນ­ຕົ້ນ​ລາວ ໄດ້​ເກີດ​ຂຶ້ນ​ມາ​ແຕ່​ປີ 2005 ຢູ່​ແຂວງ​ວຽງ​ຈັນ ໄຊ​ສົມ­ບູນ ບໍ​ລິ​ຄຳ​ໄຊ ສາ­ລະ​ວັນ ເຊ​ກອງ ອັດ​ຕະ​ປື ແລະ ຈຳ­ປາ​ສັກ ໄລ­ຍະ​ນັ້ນ​ທຸ­ລະ​ກິດ​ຂະ­ຫຍາຍ­ຕົວ​ດີ​ສົມ­ຄວນ ຈາກ​ນັ້ນ ກໍ​ໄດ້​ຫຼຸດ​ລົງ ໃນ​ທີ່​ສຸດ​ກໍ​ເກີດ​ວິ​ກິດ ເຮັດ​ໃຫ້​ບໍ­ລິ­ສັດ​ຈຳ­ນວນ​ໜຶ່ງ​ລົ້ມ​ລະ­ລາຍ ຊາວ​ສວນ​ປູກ​ມັນ­ຕົ້ນ​ຕິດ​ໜີ້​ທະ­ນາ­ຄານ ແລະ ເອ­ກະ​ຊົນ ເຊິ່ງ​ສ້າງ​ບັນ­ຫາ​ໃຫ້​ລັດ­ຖະ­ບານ​ພໍ​ສົມ­ຄວນ ມາ​ຮອດ​ປີ 2012 ລັດ­ຖະ­ບານ​ໄດ້​ປັບ­ປຸງ​ນະ­ໂຍ­ບາຍ​ສົ່ງ­ເສີມ​ພາກ​ກະ­ສິ­ກຳ​ຄືນ­ໃໝ່ ໂດຍ​ສະ­ເພາະ ໄດ້​ມີ​ການ​ເຮັດ​ສັນ­ຍາ​ສອງ​ສົ້ນ​ຕາມ​ຫຼັກ­ການ 2+3 ຢ່າງ​ຮັດ­ກຸມ ຈຶ່ງ​ເຮັດ​ໃຫ້​ຫົວ­ໜ່ວຍ​ທຸ­ລະ​ກິດ​ຈຳ­ນວນ​ໜຶ່ງ​ຢູ່​ພາກ​ກາງ ແລະ ພາກ​ໃຕ້​ຂອງ​ລາວ​ຄ່ອຍ​ຟື້ນ​ໂຕ​ຂຶ້ນ​ມາ​ດ້ວຍ​ທ່າ­ແຮງ​ພາຍ​ໃນ ແລະ ຈາກ​ການ​ໃຫ້​ໂອ­ກາດ​ທາງ​ການ​ຕະ­ຫຼາດ​ຂອງ​ພາກ​ທຸ­ລະ​ກິດ​ຕ່າງ­ປະ­ເທດ ເຊັ່ນ: ສະ­ມາ­ຄົມ​ການ​ຄ້າ​ມັນ­ຕົ້ນ​ພາກ​ຕາ­ເວັນ​ອອກ​ສ່ຽງ​ເໜືອ ແລະ ກຸ່ມ​ບໍ­ລິ­ສັດ​ອຸ­ບົນ-ໄບ​ໂອ-ເອ​ເທ​ນອນ.

    ປີ 2014 ຫົວ­ໜ່ວຍ​ທຸ­ລະ​ກິດ​ມັນ­ຕົ້ນ 12 ບໍ­ລິ­ສັດ ໄດ້​ຮ່ວມ​ມື​ກັບ​ກຸ່ມ​ບ້ານ ຄອບ­ຄົວ ປະ­ຊາ­ຊົນ​ທີ່​ປູກ​ມັນ­ຕົ້ນ​ຢູ່​ແລ້ວ ເພື່ອ​ຂົນ­ຂວາຍ​ເຂົາ­ເຈົ້າ​ມາ​ຮ່ວມ​ໂຄງ­ການ ແລະ ສົ່ງ­ເສີມ​ຜະ­ລິດ​ເປັນ​ສິນ­ຄ້າ​ສົ່ງ​ອອກ​ຢູ່​ແຂວງ ຈຳ­ປາ​ສັກ ເຊ​ກອງ ແລະ ສາ­ລະ​ວັນ ກວມ​ເອົາ 7 ເມືອງ 86 ບ້ານ 6.586 ຄອບ­ຄົວ ເນື້ອ­ທີ່ 14.732 ເຮັກ­ຕາ ສັງ​ລວມ​ແລ້ວ​ນັບ​ແຕ່​ໄດ້​ດຳ­ເນີນ​ໂຄງ­ການ​ມາ ບໍ­ລິ­ສັດ​ທີ່​ເປັນ​ສະ­ມາ­ຊິກ​ຂອງ​ສະ­ມາ­ຄົມ​ໄດ້​ສົ່ງ​ອອກ​ວັດ­ຖຸ​ດິບ​ຂາຍ​ໄປ​ປະ­ເທດ​ໄທ​ປະ­ມານ 550.000 ໂຕນ ໃນ​ນີ້ ມັນ​ແຫ້ງ 350.000 ໂຕນ ຫົວ​ມັນ​ສົດ 200.000 ໂຕນ​ຕໍ່​ປີ ໂດຍ​ມີ​ການ​ຄ້ຳ­ປະ­ກັນ​ລາ­ຄາ​ມັນ​ແຫ້ງ 1.000 ກີບ​ຕໍ່​ກິ​ໂລ ຫົວ​ມັນ​ສົດ 600 ກີບ​ຕໍ່​ກິ​ໂລ ສ້າງ​ລາຍ​ຮັບ​ຈາກ​ມັນ​ແຫ້ງ 350 ຕື້​ກີບ ຫົວ​ມັນ​ສົດ 120 ຕື້​ກີບ ເຮັດ​ໃຫ້​ຫົວ­ໜ່ວຍ​ທຸ­ລະ​ກິດ​ມັນ­ຕົ້ນ​ມີ​ລາຍ​ຮັບ​ໝັ້ນ­ຄົງ ຊາວ​ສວນ​ມີ​ລາຍ​ຮັບ​ອັນ​ແນ່­ນອນ ແນວ­ທາງ​ນະ­ໂຍ­ບາຍ​ຂອງ​ພັກ ທິດ​ຊີ້​ນຳ​ຂອງ​ທ່ານ​ນາ ຍົກ​ລັດ­ຖະ­ມົນ­ຕີ ກ່ຽວ​ກັບ​ການ​ມີ​ສ່ວນ​ຮ່ວມ​ຂອງ​ພາກ​ທຸ­ລະ​ກິດ ເພື່ອ​ແກ້​ໄຂ​ຄວາມ­ທຸກ​ຍາກ​ປາ­ກົດ​ເປັນ​ຈິງ.

    ຄະ­ນະ​ຂົນ­ຂວາຍ​ສ້າງ­ຕັ້ງ​ສະ­ມາ­ຄົມ​ມັນ­ຕົ້ນ​ລາວ ໄດ້​ສ້າງ­ຕັ້ງ​ຂຶ້ນ​ວັນ​ທີ 4 ເມ­ສາ 2019 ປະ­ກອບ​ມີ 4 ທ່ານ ມີ​ຈຸດ­ປະ­ສົງ​ເພື່ອ​ສ້າງ​ກຳ­ລັງ​ຄວາມ​ສາ­ມັກ­ຄີ​ພາຍ​ໃນ ສ້າງ​ໂອ­ກາດ​ໃຫ້​ຫົວ­ໜ່ວຍ​ທຸ­ລະ​ກິດ ສ້າງ​ທ່າ­ແຮງ​ຮັບ​ມື​ກັບ​ການ​ແຂ່ງ­ຂັນ​ໃນ​ເສດ­ຖະ­ກິດ​ທີ່​ມີ​ການ​ປ່ຽນ­ແປງ ແລະ ຕອບ​ສະ­ໜອງ​ຕາມ​ແນວ­ທາງ​ນະ­ໂຍ­ບາຍ​ຂອງ​ລັດ­ຖະ­ບານ​ໃນ​ການ​ມີ​ສ່ວນ​ຮ່ວມ​ຂອງ​ພາກ​ທຸ­ລະ​ກິດ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃຫ້​ເປັນ​ຮູບ​ປະ​ທຳ ຈາກ​ນັ້ນ ຄະ­ນະ​ຂົນ­ຂວາຍ​ກະ­ກຽມ​ທຸກ​ເງື່ອນ­ໄຂ​ເພື່ອ​ສ້າງ­ຕັ້ງ​ສະ­ມາ­ຄົມ ປັດ­ຈຸ­ບັນ​ມີ​ຄວາມ​ພ້ອມ​ເພື່ອ​ສ້າງ­ຕັ້ງ​ສະ­ມາ­ຄົມ​ມັນ­ຕົ້ນ​ລາວ ໂດຍ​ມີ​ສະ­ມາ­ຊິກ​ທີ່​ເປັນ​ບຸກ­ຄົນ 379 ຄອບ­ຄົວ (ຈາກ 7 ເມືອງ) ນິ­ຕິ​ບຸກ ຄົນ 13 ຫົວ­ໜ່ວຍ ຄະ­ນະ​ບໍ­ລິ­ຫານ​ງານ​ສະ­ມາ­ຄົມ 10 ທ່ານ.

    ສຳ­ລັບ​ສະ­ມາ­ຄົມ​ມັນ­ຕົ້ນ​ລາວ ປະ­ກອບ​ມີ 7 ທ່ານ ຄື: ທ່ານ​ນາງ ອິນ​ແປງ ຊາ​ມຸນ­ຕີ ເປັນ​ປະ­ທານ ທ່ານ ສີ­ສະ​ຫວັດ ໂຄດ​ສີ​ເມືອງ ແລະ ທ່ານ ແກ້ວ​ລຳ​ພອນ ແສງ​ສຸ​ລິ​ເດດ ເປັນ​ຮອງ​ປະ­ທານ ທ່ານ ຄຳ​ໄໝ ສຸກ​ປະ­ເສີດ ທ່ານ ບຸນ​ເຖິງ ເທບ​ສຸ­ວັນ ທ່ານ ຄຳ​ເພັດ ພອນ​ປະ­ເສີດ ແລະ ທ່ານ ຂັນ​ທະ​ວົງ ດາ­ລາ​ວົງ ເປັນ​ຄະ­ນະ ທ່ານ ຄຳ​ມະ­ນີ ວົງ​ຊາ­ຕີ ເປັນ​ປະ­ທານ​ກວດ­ກາ ແລະ ທ່ານ ສົມ​ໄຊ ທະ­ນູ­ສິນ ເປັນ​ຮອງ.

ຂ່າວທີ່ກ່ຽວຂ້ອງ