ຂ່າວຫຼ້າສຸດ

ສາທາ ນວ ຮຽກຮ້ອງໃຫ້ເອົາໃຈໃສ່ທຳລາຍແຫຼ່ງເພາະພັນຍຸງ

161 20 ກ.ຍ. 2019 ຂ່າວໜ້າ​ໜຶ່ງ

    ປັດ­ຈຸ­ບັນ​ສະ­ພາບ​ໄຂ້­ຍຸງ​ລາຍ​ຢູ່​ໃນ​ນະ­ຄອນ­ຫຼວງ​ວຽງ​ຈັນ (ນວ) ຍັງ​ບໍ່​ມີ​ທ່າ​ອ່ຽງ​ຈະ​ຫຼຸດ​ລົງ ເພາະ​ຍັງ​ພົບ​ກໍ­ລະ­ນີ​ຄົນ​ເຈັບ​ໄຂ້­ຍຸງ​ລາຍ​ເກີດ​ຂຶ້ນ​ໃໝ່ ໂດຍ​ສະ­ເພາະ ວັນ​ທີ 18 ກັນ­ຍາ 2019 ນວ ພົບ​ຄົນ​ເຈັບ​ໄຂ້­ຍຸງ​ລາຍ​ໃໝ່ 104 ກໍ­ລະ­ນີ.

    ອີງ​ຕາມ​ການ​ລາຍ​ງານ​ຂອງ​ພະ​ແນກ​ສາ­ທາ­ລະ­ນະ​ສຸກ ນວ  ໃນ​ວັນ​ທີ 18 ກັນ­ຍາ 2019 ວ່າ: ນັບ​ແຕ່​ຕົ້ນ​ປີ-ເຖິງ​ປັດ­ຈຸ­ບັນ ນວ ມີ​ກໍ­ລະ­ນີ​ຄົນ​ເຈັບ​ໄຂ້­ຍຸງ​ລາຍ​ສະ​ສົມ 7.842 ກໍ­ລະ­ນີ ຍິງ 4.105 ກໍ​ລະ ນີ ເສຍ​ຊີ­ວິດ 17 ຄົນ ຍິງ 9 ຄົນ ໃນ​ນີ້ ເມືອງ​ໄຊ​ທາ­ນີ 2.327 ກໍ­ລະ­ນີ ເສຍ​ຊີ­ວິດ 5 ຄົນ ໄຊ​ເສດ​ຖາ 1.596 ກໍ­ລະ­ນີ ເສຍ​ຊີ­ວິດ 4 ຄົນ ສີ​ໂຄດ​ຕະ­ບອງ 900 ກໍ­ລະ­ນີ ເສຍ​ຊີ­ວິດ 1 ຄົນ ຈັນ­ທະ​ບູ​ລີ 785 ກໍ­ລະ­ນີ ສີ​ສັດ­ຕະ​ນາກ 691 ກໍ­ລະ­ນີ ເສຍ​ຊີ­ວິດ 2 ຄົນ ຫາດ​ຊາຍ​ຟອງ 629 ກໍ­ລະ­ນີ ເສຍ​ຊີ­ວິດ 2 ຄົນ ນາ​ຊາຍ​ທອງ 346 ກໍ­ລະ­ນີ ເສຍ​ຊີ­ວິດ 2 ຄົນ ປາກ​ງື່ມ 293 ກໍ­ລະ­ນີ ສັງ​ທອງ 275 ກໍ­ລະ­ນີ ເສຍ​ຊີ­ວິດ 1 ຄົນ.

    ເພື່ອ​ເຮັດ​ໃຫ້​ກໍ­ລະ­ນີ​ໄຂ້­ຍຸງ​ລາຍ​ນັບ​ມື້​ນັບ​ຫຼຸດ​ລົງ ແລະ ໝົດ​ໄປ​ຈາກ​ນະ­ຄອນ­ຫຼວງ​ວຽງ​ຈັນ ພະ  ແນກ​ສາ­ທາ­ລະ­ນະ​ສຸກ  ນວ ຮຽກ­ຮ້ອງ​ເຖິງ​ຊາວ ນວ ກໍ​ຄື ພະ­ນັກ­ງານ​ທຸກ​ຄົນ ໃຫ້​ເອົາ­ໃຈ­ໃສ່​ທຳ­ລາຍ​ແຫຼ່ງ​ເພາະ​ພັນ​ຍຸງ​ລາຍ​ເປັນ​ປະ­ຈຳ ຈົນ​ກາຍ​ເປັນ­ຄວາມ​ລຶ້ງ​ເຄີຍ ເພື່ອ​ໃຫ້​ສາ­ມາດ​ຕັດ​ວົງ​ຈອນ​ຍຸງ​ລາຍ ໄປ​ຄຽງ​ຄູ່​ກັບ​ການ​ເອົາ­ໃຈ­ໃສ່​ປ້ອງ​ກັນ​ບໍ່​ໃຫ້​ຍຸງ​ລາຍ​ກັດ ເຊິ່ງ​ສາ­ມາດ​ເຮັດ​ໄດ້​ຫຼາຍ​ວິ­ທີ ເປັນ­ຕົ້ນ ໃສ່​ເຄື່ອງ­ນຸ່ງ​ຫົ່ມ​ທີ່​ຍາວ ທາ​ຢາ​ກັນ​ຍຸງ ນອນ​ໃນ​ມຸ້ງ ຢູ່​ບ່ອນ​ທີ່​ໂລ່ງ​ແຈ້ງ ເມື່ອ​ມີ​ອາ­ການ​ໄຂ້​ຕ້ອງ​ໄປ​ພົບ​ແພດ ຫຼີກ​ລ່ຽງ​ການ​ຊື້​ຢາ​ມາ​ກິນ​ເອງ.

ຂ່າວທີ່ກ່ຽວຂ້ອງ