ຂ່າວຫຼ້າສຸດ

ຫາລືປັບປຸງກົງຈັກການຈັດຕັ້ງດ່ານຊາຍແດນ

290 19 ກ.ຍ. 2019 ຂ່າວໜ້າ​ໜຶ່ງ

    ໃນ​ທ້າຍ​ເດືອນ​ສິງ­ຫາ 2019 ທີ່​ເຂດ​ເສດ­ຖະ­ກິດ​ພິ­ເສດ​ບໍ່​ເຕັນ ແຂວງ​ຫຼວງ​ນ້ຳ​ທາ ຄະ­ນະ​ສະ­ເພາະ​ກິດ ໂດຍ​ມີ​ກະ­ຊວງ​ພາຍ​ໃນ​ເປັນ​ເຈົ້າ​ການ​ປະ­ສານ​ສົມ­ທົບ​ກັບ​ບັນ­ດາ​ຂະ­ແໜງ­ການ ແລະ ອົງ­ການ​ປົກ­ຄອງ​ທ້ອງ­ຖິ່ນ ໄດ້​ຈັດ​ກອງ​ປະ­ຊຸມ​ປຶກ­ສາ​ຫາ­ລື ກ່ຽວ​ກັບ​ການ​ປັບ­ປຸງ​ກົງ­ຈັກ​ການ­ຈັດ­ຕັ້ງ ແລະ ບຸ​ຄະ­ລາ​ກອນ​ຂອງ​ບັນ­ດາ​ດ່ານ​ຊາຍ​ແດນ ແລະ ສະ­ໜາມ​ບິນ​ສາ­ກົນ ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ຄຳ​ມູນ ວິ​ພົງ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ທ່ານ ສັນ­ຕິ​ສຸກ ສິມ​ມາ­ລາ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ທ່ານ​ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ແຂວງ​ຫຼວງ​ນ້ຳ​ທາ ຕາງ­ໜ້າ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ກະ­ຊວງ​ແຜນ­ການ ແລະ ການ​ລົງ­ທຶນ ຄະ­ນະ​ດ່ານ​ສາ­ກົນ ເຈົ້າ​ໜ້າ­ທີ່​ພາ­ສີ​ປະ­ຈຳ​ດ່ານ ຍທຂ ແຂວງ ປະ­ຈຳ​ດ່ານ ສາ​ທາ​ແຂວງ ປະ­ຈຳ​ດ່ານ ແລະ ພາກ­ສ່ວນ​ທີ່​ກ່ຽວ­ຂ້ອງ​ກັບ​ດ່ານ​ຊາຍ​ແດນ ເຂົ້າ​ຮ່ວມ.

    ການ​ປັບ­ປຸງ​ກົງ­ຈັກ​ການ­ຈັດ­ຕັ້ງ ແລະ ບຸ​ຄະ­ລາ​ກອນ​ຂອງ​ບັນ­ດາ​ດ່ານ​ຊາຍ​ແດນ ແລະ ສະ­ໜາມ​ບິນ​ສາ­ກົນ​ແມ່ນ​ປະ­ຕິ­ບັດ​ຕາມ​ດຳ­ລັດ​ວ່າ​ດ້ວຍ​ດ່ານ​ຊາຍ​ແດນ ແລະ ສະ­ໜາມ​ບິນ​ສາ­ກົນ ລົງ​ວັນ​ທີ 31 ທັນ­ວາ 2018 ເພື່ອ​ແນ­ໃສ່​ກຳ­ນົດ​ຫຼັກ­ການ ລະ­ບຽບ ມາດ​ຕະ­ການ​ກ່ຽວ​ກັບ​ການ​ຄຸ້ມ​ຄອງ ແລະ ຕິດ­ຕາມ​ກວດ­ກາ​ວຽກ​ງານ​ດ່ານ​ຊາຍ​ແດນ ແລະ ສະ­ໜາມ​ບິນ ເພື່ອ​ເຮັດ​ໃຫ້​ວຽກ​ງານ​ດັ່ງ­ກ່າວ​ມີ​ປະ​ສິດ­ທິ​ຜົນ ອຳ­ນວຍ​ຄວາມ​ສະ­ດວກ​ໃນ​ການ​ບໍ­ລິ­ການ ການ​ແລກ­ປ່ຽນ​ສິນ­ຄ້າ ການ​ເຂົ້າ-ອອກ​ຂອງ​ຜູ້­ໂດຍ­ສານ​ໃຫ້​ມີ​ຄວາມ​ວ່ອງ­ໄວ ແລະ ຖືກ­ຕ້ອງ​ໂປ່ງ​ໃສ ປະ­ກອບ­ສ່ວນ​ສ້າງ​ສາຍ​ພົວ­ພັນ​ຮ່ວມ​ມື​ມິດ­ຕະ­ພາບ​ທີ່​ດີ​ກັບ​ບັນ­ດາ​ປະ­ເທດ​ທີ່​ມີ​ຊາຍ​ແດນ​ຕິດ​ຈອດ​ກັບ​ລາວ ບັນ­ດາ​ປະ­ເທດ​ໃນ​ພາກ​ພື້ນ ແລະ ສາ­ກົນ ແນ­ໃສ່​ເຮັດ​ໃຫ້­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ມີ​ການ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ແລະ ຍືນ​ຍົງ ສຳ­ລັບ​ການ­ຈັດ­ຕັ້ງ​ປະ­ຕິ­ບັດ​ກ່ຽວ​ກັບ​ການ​ປັບ­ປຸງ​ກົງ­ຈັກ​ການ­ຈັດ­ຕັ້ງ ແລະ ບຸ​ຄະ­ລາ​ກອນ​ຂອງ​ບັນ­ດາ​ດ່ານ​ຊາຍ​ແດນ ແລະ ສະ­ໜາມ​ບິນ​ສາ­ກົນ ໃຫ້​ສຳ­ເລັດ​ພາຍ​ໃນ 12 ເດືອນ ໃນ 27 ດ່ານ​ທົ່ວ​ປະ­ເທດ ພາຍ­ຫຼັງ​ດຳ­ລັດ​ໄດ້​ຮັບ­ຮອງ ແລະ ປະ­ກາດ​ໃຊ້.

    ໂອ­ກາດ​ນີ້ ທ່ານ ສົມ​ດີ ດວງ​ດີ ພ້ອມ​ດ້ວຍ​ຄະ­ນະ​ຍັງ​ໄດ້​ໄປ​ຕິດ­ຕາມ​ເບິ່ງ​ຕົວ​ຈິງ​ກ່ຽວ​ການ​ປະ­ຕິ­ບັດ​ວຽກ​ງານ​ຂອງ​ຄະ ນະ​ດ່ານ​ສາ­ກົນ​ບໍ່​ເຕັນ ແຂວງ​ຫຼວງ​ນ້ຳ​ທາ ອີກ​ດ້ວຍ.

ຂ່າວທີ່ກ່ຽວຂ້ອງ