ພະຍາດໄຂ້ຍຸງລາຍ ຍັງມີທ່າອ່ຽງເພີ່ມ ທົ່ວປະເທດ ມີຄົນເຈັບເຖິງ 31.196 ກໍລະນີ ເສຍຊີວິດ 62 ຄົນ

181 19 ກ.ຍ. 2019 ຂ່າວໜ້າ​ໜຶ່ງ
ພະຍາດໄຂ້ຍຸງລາຍ ຍັງມີທ່າອ່ຽງເພີ່ມ ທົ່ວປະເທດ ມີຄົນເຈັບເຖິງ 31.196 ກໍລະນີ ເສຍຊີວິດ 62 ຄົນ

    ໃນ​ປີ 2019 ເປັນ​ອີກ​ປີ​ໜຶ່ງ​ທີ່​ໄຂ້­ຍຸງ​ລາຍ​ໄດ້​ລະ­ບາດ​ກໍ່­ໃຫ້­ເກີດ​ຈຳ­ນວນ​ຄົນ​ເຈັບ​ເພີ່ມ​ສູງ​ຂຶ້ນ ແລະ ພົບ​ກໍ­ລະ­ນີ​ເສຍ​ຊີ­ວິດ ເນື່ອງ​ຈາກ​ປີ​ນີ້​ຝົນ­ຕົກ​ສະ­ຫຼັບ​ກັບ​ອາ­ກາດ​ຮ້ອນ ເຊິ່ງ​ເອື້ອ​ອຳ­ນວຍ​ການ​ເກີດ​ແຫຼ່ງ​ເພາະ​ພັນ​ຍຸງ​ລາຍ ພ້ອມ​ທັງ​ເຊື້ອ​ໄຂ້­ຍຸງ​ລາຍ ປີ​ນີ້​ຈະ​ສະ­ແດງ​ອາ­ການ​ຮຸນ​ແຮງ ແລະ ມີ​ໂອ­ກາດ​ເສຍ​ຊີ­ວິດ​ໄດ້.

    ອີງ​ຕາມ​ການ​ລາຍ​ງານ​ຂອງ​ສູນ​ວິ­ເຄາະ ແລະ ລະ­ບາດ​ວິ­ທະ­ຍາ ກະ­ຊວງ ສາ­ທາ­ລະ­ນະ​ສຸກ ໄດ້​ລາຍ​ງານ​ໃນ​ວັນ​ທີ 17 ກັນ­ຍາ 2019 ໃຫ້​ຮູ້​ວ່າ: ມາ​ຮອດ​ປັດ­ຈຸ­ບັນ​ໄດ້​ມີ​ກໍ­ລະ­ນີ​ຄົນ​ເຈັບ​ສະ​ສົມ​ເພີ່ມ​ຂຶ້ນ​ເປັນ 31.196 ກໍ­ລະ­ນີ ແລະ ເສຍ​ຊີ­ວິດ 62 ຄົນ​ຢູ່​ໃນ​ຂອບ​ເຂດ​ທົ່ວ​ປະ­ເທດ.

    ສຳ­ລັບ​ນະ­ຄອນ­ຫຼວງ​ວຽງ​ຈັນ ຍັງ​ຄົງ​ມີ​ອັດ­ຕາ​ການ​ຕິດ­ເຊື້ອ​ສູງ​ກວ່າ​ແຂວງ​ອື່ນໆ ມີ​ຈຳ­ນວນ​ຄົນ​ເຈັບ​ສະ​ສົມ 7.738 ກໍ­ລະ­ນີ ເສຍ​ຊີ­ວິດ 17 ຄົນ  ສະ­ຫວັນ​ນະ​ເຂດ  5.568 ກໍ­ລະ­ນີ ເສຍ​ຊີ­ວິດ 20 ຄົນ ແຂວງ​ຈຳ­ປາ​ສັກ 3.103 ກໍ­ລະ­ນີ ເສຍ​ຊີ­ວິດ 6 ຄົນ ສາ­ລະ​ວັນ  3.552 ກໍ­ລະ­ນີ ເສຍ​ຊີ­ວິດ 4 ຄົນ ຄຳ​ມ່ວນ 3.180 ກໍ­ລະ­ນີ ເສຍ​ຊີ­ວິດ 4 ຄົນ ອັດ​ຕະ​ປື 1.407 ກໍ­ລະ­ນີ ເສຍ​ຊີ­ວິດ 3 ຄົນ ແຂວງ​ວຽງ​ຈັນ 1.382 ກໍ­ລະ­ນີ ຫຼວງ​ນ້ຳ​ທາ 1.298 ກໍ­ລະ­ນີ ບໍ​ລິ​ຄຳ​ໄຊ 1.063 ກໍ­ລະ­ນີ ເສຍ​ຊີ­ວິດ 3 ຄົນ  ຫຼວງ​ພະ​ບາງ 942 ກໍ­ລະ­ນີ ເສຍ​ຊີ­ວິດ 1 ຄົນ  ໄຊ​ຍະ​ບູ​ລີ 686 ກໍ­ລະ­ນີ ເສຍ​ຊີ­ວິດ 2 ຄົນ  ເຊ​ກອງ  629 ກໍ­ລະ­ນີ ໄຊ​ສົມ­ບູນ 416 ກໍ­ລະ­ນີ ອຸ­ດົມ​ໄຊ 135 ກໍ­ລະ­ນີ  ບໍ່​ແກ້ວ 216 ກໍ­ລະ­ນີ ຊຽງ​ຂວາງ 60ກໍ­ລະ­ນີ ເສຍ​ຊີ­ວິດ 1 ຄົນ ຜົ້ງ​ສາ­ລີ 16 ກໍ­ລະ­ນີ ເສຍ​ຊີ­ວິດ 1 ຄົນ ແລະ ແຂວງ​ຫົວ­ພັນ 5 ກໍ­ລະ­ນີ.

    ເພື່ອ​ຫຼີກ​ລ່ຽງ​ການ​ເຈັບ­ເປັນ​ຍ້ອນ​ພະ­ຍາດ​ນີ້ ກະ­ຊວງ​ສາ­ທາ­ລະ­ນະ​ສຸກ​ໄດ້​ຝາກ​ເຕືອນ​ໃຫ້​ປະ­ຊາ­ຊົນ​ເອົາ­ໃຈ­ໃສ່​ປ້ອງ​ກັນ​ບໍ່​ໃຫ້​ຍຸງ​ກັດ ໂດຍ​ໃສ່​ເຄື່ອງ­ນຸ່ງ​ຫົ່ມ​ແຂນ​ຍາວ ນອນ​ໃນ​ມຸ້ງ ຫຼື ປ້ອງ​ກັນ​ດ້ວຍ​ການ​ທາ​ຢາ​ກັນ​ຍຸງ ສິ່ງ​ທີ່​ສຳ­ຄັນ​ແມ່ນ​ຕ້ອງ​ພ້ອມ​ກັນ​ທຳ­ລາຍ​ແຫຼ່ງ​ເພາະ​ພັນ​ຍຸງ​ລາຍ ຖ້າ​ຫາກ​ເປັນ­ໄຂ້​ກໍ​ຄວນ​ໄປ​ພົບ​ແພດ​ໝໍ ຫຼີກ​ລ່ຽງ​ການ​ຊື້​ຢາ​ມາ​ກິນ​ເອງ ແລະ ບໍ່​ຄວນ​ກິນ​ຢາ​ປາ​ຣາ​ເຊ​ຕາ​ໂມນ​ຫຼາຍ​ເກີນ​ກຳ­ນົດ​ແພດ​ສັ່ງ ເພາະ​ອາດ​ເຮັດ​ໃຫ້​ຕັບ​ຊຸດ­ໂຊມ​ໄດ້.

ຂ່າວທີ່ກ່ຽວຂ້ອງ