ຂ່າວຫຼ້າສຸດ

ຊາວ​ຈີນ​ຫຼາຍ​ສິບ​ລ້ານ​ຄົນ ​ໄປ​ທ່ອງ​ທ່ຽວ​ໃນ​ໂອກາດ​ບຸນ​ໄຫວ້​ພະຈັນ

149 18 ກ.ຍ. 2019 ຂ່າວຕ່າງປະເທດ
ຊາວ​ຈີນ​ຫຼາຍ​ສິບ​ລ້ານ​ຄົນ ​ໄປ​ທ່ອງ​ທ່ຽວ​ໃນ​ໂອກາດ​ບຸນ​ໄຫວ້​ພະຈັນ

   ກະຊວງ​ວັດທະນະທຳ ແລະ ທ່ອງ​ທ່ຽວ​ຂອງ​ຈີນ ແຈ້ງ​ໃຫ້​ຮູ້​ວ່າ ລວມ​ແລ້ວ​ມີ​ນັກ​ທ່ອງ​ທ່ຽວ​ຊາວ​ຈີນ 105 ລ້ານ​ຄົນ ໄປ​ທ່ອງ​ທ່ຽວ​ຢູ່​ໃນ​ຂອບ​ເຂດ​ທົ່ວ​ປະເທດ ໃນ​ໂອກາດ​ພັກ​ບຸນ​ໄຫວ້​ພະຈັນ ຊຶ່ງ​ແກ່ຍາວ​ເປັນ​ເວລາ 3 ວັນ ນັບ​ວັນ​ທີ 13-15 ກັນຍາ.

    ກະຊວງ​ດັ່ງກ່າວ ໃຫ້ການ​ຢືນຢັນ​ວ່າ ຕົວ​ເລກ​ທີ່​ອອກ​ມາ​ຄື​ແນວ​ນັ້ນ ເປັນ​ການສະແດງ​ໃຫ້​ເຫັນ​ເຖິງ​ການ​ເພີ່ມ​ຂຶ້ນ 7,6% ເມື່ອ​ທຽບໃສ່​ໃນ​ໂອກາດ​ບຸນ​ໄຫວ້​ພະຈັນ ປີ 2018. ຊາວ​ຈີນ 105 ລ້ານ​ຄົນ ທີ່​ໄປ​ທ່ອງ​ທ່ຽວ​ນັ້ນ ໄດ້​ນຳ​ມາ​ຊຶ່ງ​ລາຍ​ຮັບ 47,28 ຕື້​ຢວນ (ເທົ່າ​ກັບ 6,7 ຕື້​ໂດ​ລາ​ສະຫະລັດ) ໃຫ້​ແກ່​ຂະແໜງ​ການທ່ອງທ່ຽວ​ຂອງ​ຈີນ ເພີ່ມ​ຂຶ້ນ 8,7% ເມື່ອ​ທຽບໃສ່​ປີ​ກາຍ. ນອກຈາກ​ນັ້ນແລ້ວ ປະລິມານ​ນັກ​ທ່ອງ​ທ່ຽວ ທີ່​ໄປ​ນຳ​ຄອບຄົວ​ໃນ​ປີ​ນີ້ ກໍ​ເພີ່ມ​ຂຶ້ນ 14% ເມື່ອ​ທຽບໃສ່​ປີ 2018.

    ກະຊວງ​ວັດທະນະທຳ ແລະ ທ່ອງ​ທ່ຽວ​ຈີນ ເນັ້ນ​ໜັກ​ວ່າ ຫຼາຍ​ເຫດການ​ໄດ້​ຊຸກຍູ້​ການ​ໂຄສະນາ​ກ່ຽວ​ກັບ​ຄຸນຄ່າ​ຂອງ​ຄອບຄົວ ນ້ຳໃຈ​ຮັກ​ຊາດ ແລະ ຮັກ​ວັດທະນະທຳ​ອັນ​ເປັນ​ມູນເຊື້ອ​ຂອງ​ຈີນ ໂດຍ​ທີ່​ບຸນ​ໄຫວ້​ພະຈັນ ມັກ​ຈະ​ຖືກ​ຖື​ວ່າ​ເປັນ​ໂອກາດ​ໃຫ້​ສະມາຊິກ​ໃນ​ຄອບຄົວ ພ້ອມ​ກັນ​ຊົມ​ດວງ​ຈັນ ແລະ ຮັບ​ປະທານ​ເຂົ້າໜົມ​ໄຫວ້​ພະຈັນ.

ຂ່າວທີ່ກ່ຽວຂ້ອງ