ຂ່າວຫຼ້າສຸດ

ລັດຖະບານ​ເວ​ເນ​ຊູ​ເອ​ລາ ແລະ ສ່ວນ​ໜຶ່ງ​ຂອງ​ຝ່າຍ​ຄ້ານ ລົງ​ນາມ​ຂໍ້​ຕົກລົງ

193 18 ກ.ຍ. 2019 ຂ່າວຕ່າງປະເທດ
ລັດຖະບານ​ເວ​ເນ​ຊູ​ເອ​ລາ ແລະ ສ່ວນ​ໜຶ່ງ​ຂອງ​ຝ່າຍ​ຄ້ານ ລົງ​ນາມ​ຂໍ້​ຕົກລົງ

    ລັດຖະບານ​ເວ​ເນ​ຊູ​ເອ​ລາ ແລະ ບັນດາ​ພັກ​ຝ່າຍ​ຄ້ານ​ກຸ່ມ​ໜຶ່ງ ໄດ້​ລົງ​ນາມ​ຂໍ້​ຕົກລົງ​ສະບັບ​ໜຶ່ງ ເມື່ອ​ວັນ​ທີ 16 ກັນຍາ​ນີ້ ກ່ຽວ​ກັບ​ການ​ສ້າງຕັ້ງ​ໂຕະ​ເຈລະຈາ​ແຫ່ງ​ຊາດ​ເພື່ອ​ສັນຕິພາບ ທີ່​ເປັນ​ການ ແທດເໝາະ​ກັບ​ຫຼັກການ​ກ່ຽວ​ກັບ​ອະທິປະ​ໄຕ ແລະ ສິດ​ແກ້​ໄຂ​ດ້ວຍ​ຕົນ​ເອງ ເພື່ອ​ແກ້​ໄຂ​ວິ​ກິດ​ການ ການເມືອງ ເສດຖະກິດ ແລະ ສັງຄົມ ທີ່​ແກ່ຍາວ​ຢູ່​ໃນ​ເວ​ເນ​ຊູ​ເອ​ລາ.

   ໃນ​ຈຳນວນ​ພັກ​ຝ່າຍ​ຄ້ານ ທີ່​ເຂົ້າ​ຮ່ວມ​ການ​ລົງ​ນາມ​ຂໍ້​ຕົກລົງ​ດັ່ງກ່າວ​ມີ ພັກ​ວິທີ​ການ​ແກ້​ໄຂ ໃຫ້​ແກ່​ເວ​ເນ​ຊູ​ເອ​ລາ (SpV) ພັກ​ການ​ປ່ຽນແປງ (Cambiemos) ແລະ ພັກ​ເດີນ​ໜ້າທີ່​ກ້າວໜ້າ (Avanzada Progresista) ໃນ​ຂະນະ​ທີ່​ພັກ ນ້ຳໃຈ​ປະຊາຊົນ (Voluntad Popular) ຂອງ​ທ່ານ ຈວານ ກວາຍ​ໂດ ແກນ​ນຳ​ຝ່າຍ​ຄ້ານ ຊຶ່ງ​ໄດ້​ແຕ່ງຕັ້ງ​ຕົນ​ເອງ​ເປັນ “ປະທານາທິບໍດີ​ຊົ່ວຄາວ” ນັ້ນ ໄດ້​ປະກາດ​ຍົກເລີກ​ການ​ເຈລະຈາ​ກັບ​ຝ່າຍ​ລັດຖະບານ ທີ່​ເປັນ​ການ​ເຈລະຈາ ໂດຍ​ໄດ້​ຮັບ​ການ​ອຸປະຖຳ ຂອງ​ລັດຖະບານ ນອກ​ແວ.

    ຄາດ​ວ່າ ລັດຖະບານ​ເວ​ເນ​ຊູ​ເອ​ລາ ແລະ ບັນດາ​ພັກ​ຝ່າຍ​ຄ້ານ​ທີ່​ເຂົ້າ​ຮ່ວມ​ການ​ລົງ​ນາມ ຂໍ້​ຕົກລົງ​ດັ່ງກ່າວ ຈະ​ໄດ້​ປຶກສາ​ຫາລື​ກັນ ກ່ຽວ​ກັບ​ຄວາມ​ເປັນ​ໄປ​ໄດ້​ໃນ​ການ​ກັບ​ມາ​ເຂົ້າ​ຮ່ວມ ໃນ​ການເຄື່ອນໄຫວ​ຂອງ​ສະພາ​ແຫ່ງ​ຊາດ ຂອງ​ບັນດາ​ສະມາຊິກ​ລັດ​ຖະ​ສະພາ​ຈາກ​ພັກ​ສັງຄົມ​ນິຍົມ ເອກະ​ພາບ (PSUV) ທີ່​ເປັນ​ພັກ​ກຳ​ອຳນາດ ຫຼັງ​ຈາກ​ທີ່​ໄດ້​ປະລະ​ຈາກ​ອົງການ​ນິຕິບັນຍັດ​ນີ້ ໄປ​ເປັນ​ເວລາ 3 ປີ ເພື່ອ​ສ້າງຕັ້ງ​ສະພາ​ສ້າງ​ລັດ​ຖະ​ທຳ​ມະນູນ​ແຫ່ງ​ຊາດ ປະຕິ​ຮູບ​ອົງການ​ເລືອກ​ຕັ້ງ ແຫ່ງ​ຊາດ ແລະ ປ່ອຍ​ຕົວ “ນັກໂທດ​ການເມືອງ” ໃຫ້​ເປັນ​ອິດ​ສະລະ.

    ສອງ​ຝ່າຍ​ກໍ​ໄດ້​ເຫັນ​ດີ​ເປັນ​ເອກະສັນ​ກັນ ທີ່​ຈະ​ພິຈາລະນາ​ແຜນການ​ແກ້​ໄຂ ວິ​ກິດ​ການ ມະນຸດສະທຳ​ຢູ່​ພາຍ​ໃນ​ປະເທດ ດ້ວຍ​ວິທີ​ການ​ຊຸກຍູ້​ການ​ເອົາ​ນ້ຳມັນ ແລກປ່ຽນ​ກັບ​ສະບຽງ​ອາຫານ ຢາ​ປົວ​ພະຍາດ ແລະ  ການ​ບໍລິການ. ໃນ​ຂະນະ​ດຽວ​ກັນ ຂໍ້​ຕົກລົງ​ກໍ​ໄດ້​ສະແດງ​ຄວາມ​ຄັດຄ້ານ ຕໍ່​ການ​ນຳ​ໃຊ້​ມາດ​ຕະການ​ປິດ​ລ້ອມ​ທາງ​ດ້ານ​ເສດຖະກິດ​ຕໍ່ ເວ​ເນ​ຊູ​ເອ​ລາ ທີ່​ມາ​ຈາກ​ພາຍ​ນອກ ໂດຍ​ຖື​ວ່າ​ນີ້​ເປັນ​ການ​ລະເມີດ​ກົດໝາຍ​ສາກົນ.

 

ຂ່າວທີ່ກ່ຽວຂ້ອງ