ຂ່າວຫຼ້າສຸດ

ອາ​ຣາ​ບີ ຊາ​ອຸ​ດິດ ຈະ​ເຊີນ​ຊ່ຽວຊານ​ສາກົນ​ເຂົ້າ​ຮ່ວມ ສືບສວນ​ສອບ​ສວນ​ເຫດການ​ໂຈມ​ຕີ​ພື້ນຖານ​ຜະລິດ​ນ້ຳມັນ

201 18 ກ.ຍ. 2019 ຂ່າວຕ່າງປະເທດ
ອາ​ຣາ​ບີ ຊາ​ອຸ​ດິດ ຈະ​ເຊີນ​ຊ່ຽວຊານ​ສາກົນ​ເຂົ້າ​ຮ່ວມ ສືບສວນ​ສອບ​ສວນ​ເຫດການ​ໂຈມ​ຕີ​ພື້ນຖານ​ຜະລິດ​ນ້ຳມັນ

    ກະຊວງ​ການ​ຕ່າງປະເທດ ອາ​ຣາ​ບີ ຊາ​ອຸ​ດິດ ແຈ້ງ​ໃຫ້​ຮູ້ເມື່ອ​ວັນ​ທີ 16 ກັນຍາ​ນີ້​ວ່າ ຈະ​ເຊື່ອ​ເຊີນ​ບັນດາ​ຊ່ຽວຊານ​ສາກົນ ໃນ​ນັ້ນ​ມີ​ບັນດາ​ຊ່ຽວຊານ​ຂອງ​ສະຫະ​ປະຊາ​ຊາດ (​ສປຊ) ເຂົ້າ​ຮ່ວມ ການ​ສືບສວນ​ສອບ​ສວນ ເຫດການ​ໂຈມ​ຕີ​ບັນດາ​ພື້ນຖານ​ການ​ຜະລິດ​ນ້ຳມັນ​ຂອງ​ອາ​ຣາ​ບີ ຊາ​ອຸ​ດິດ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 14 ກັນຍາ​ທີ່​ຜ່ານ​ມາ.

    ແຈ້ງ​ການ​ຂອງ​ກະຊວງ​ການ​ຕ່າງປະເທດ ອາ​ຣາ​ບີ ຊາ​ອຸ​ດິດ ລະບຸ​ວ່າ ເຫດການ​ໂຈມ​ຕີ​ດັ່ງກ່າວ ໄດ້​ເຮັດ​ໃຫ້​ເກີດ​ຄວາມ​ເສຍ​ຫາຍ ໃຫ້​ແກ່​ໂຮງງານ​ປຸງ​ແຕ່ງ​ນ້ຳມັນ​ດິບ​ເພື່ອ​ການ​ສົ່ງ​ອອກ​ຂອງ​ອາ​ຣາ​ບີ ຊາ​ອຸ​ດິດ ທີ່​ມີ​ຂະໜາດ​ໃຫຍ່​ສຸດ​ໃນ​ໂລກ ແລະ​ເຮັດ​ໃຫ້​ປະລິມານ​ການ​ຜະລິດ​ນ້ຳມັນ​ຂອງ​ປະເທດ​ນີ້ ຫຼຸດ​ລົງ​ເຄິ່ງ​ໜຶ່ງ. 

    ແຫຼ່ງ​ຂ່າວ​ທີ່​ໜ້າ​ເຊື່ອ​ຖື ລາຍ​ງານ​ເມື່ອ​ວັນ​ທີ 15 ກັນຍາ​ນີ້​ວ່າ ການເຄື່ອນໄຫວ ສົ່ງ​ອອກ​ນ້ຳມັນ ຂອງ​ອາ​ຣາ​ບີ ຊາ​ອຸ​ດິດ ຈະ​ກັບເຂົ້າ​ສູ່​ຄວາມ​ເປັນ​ປົກກະຕິ​ພາຍ​ໃນ​ອາທິດ​ນີ້ ໃນ​ເມື່ອ​ວ່າ​ທາງ​ການ​ອາ​ຣາ​ບີ ຊາ​ອຸ​ດິດ ໃຫ້​ນຳ​ໃຊ້​ແຫຼ່ງ​ນ້ຳມັນ​ຈາກ​ບັນດາ​ພື້ນຖານ​ທີ່​ສະ​ສົມ​ໄວ້

   ໃນ​ຂະນະ​ດຽວ​ກັນ ແຫຼ່ງ​ຂ່າວ​ທາງ​ດ້ານ​ການ​ຄ້າ ທີ່​ມີ​ອອກ​ມາ​ເມື່ອ​ວັນ​ທີ 16 ກັນຍາ​ນີ້ ໃຫ້​ຮູ້​ວ່າ ຫຼັງ​ເຫດການ​ໂຈມ​ຕີ​ພື້ນຖານ​ການ​ຜະລິດ​ນ້ຳມັນ​ດັ່ງກ່າວ ອາ​ຣາ​ບີ ຊາ​ອຸ​ດິດ ໄດ້​ປິດ​ທໍ່​ສົ່ງ​ນ້ຳມັນ​ດິບ ໄປ​ຍັງ​ບາ​ເຣນ. ທໍ່​ສົ່ງ​ນ້ຳມັນ​ສາຍ​ນີ້ ມີ​ກຳລັງ​ການ​ຂົນສົ່ງ​ນ້ຳມັນ​ປະເພດ​ນ້ຳ​ເບົາ ອາ​ຣັບ ໄດ້ 220.000-230.000 ບາ​ເຣນ/ວັນ ຊຶ່ງ​ເປັນ​ຂອງ​ກຸ່ມ​ບໍລິສັດ​ນ້ຳມັນ​ແຫ່ງ​ລັດ Saudi Aramco ຂອງ​ອາ​ຣາ​ບີ ຊາ​ອຸ​ດິດ ໄປ​ໃຫ້​ລັດ​ວິ​ສາ​ຫະ​ກິດ Bapco ຂອງ​ບາ​ເຣນ.

ຂ່າວທີ່ກ່ຽວຂ້ອງ