ລາວ-ອັງກິດ ເພີ່ມທະວີການຮ່ວມມືສອງຝ່າຍ

202 18 ກ.ຍ. 2019 ຂ່າວໜ້າ​ໜຶ່ງ

    ທ່ານ​ນາງ Heather Wheeler ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ສະ­ຫະ​ລາ­ຊະ​ອາ­ນາ­ຈັກ​ອັງ­ກິດ ແລະ ອຽກ​ລັງ​ເໜືອ ພ້ອມ​ຄະ­ນະ ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ແຕ່​ວັນ​ທີ 16-17 ກັນ­ຍາ ນີ້ ເຊິ່ງ​ເປັນ​ຂີດ​ໝາຍ​ສຳ­ຄັນ​ໃນ​ການ​ເສີມ​ຂະ­ຫຍາຍ​ສາຍ​ພົວ­ພັນ ແລະ ການ​ຮ່ວມ​ມື ລະ­ຫວ່າງ​ສອງ​ປະ­ເທດ ລາວ-ອັງ­ກິດ ໃຫ້​ມີ​ບາດ­ກ້າວ​ໃໝ່.

    ວັນ​ທີ 16 ກັນ­ຍາ 2019 ທ່ານ​ນາງ Heather Wheeler ແລະ ຄະ­ນະ ໄດ້​ພົບ​ປະ​ກັບ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ສປປ ລາວ ຢູ່​ກະ­ຊວງ​ດັ່ງ­ກ່າວ ໃນ​ນີ້ ສອງ​ຝ່າຍ​ໄດ້​ປຶກ­ສາ​ຫາ­ລື​ກ່ຽວ​ກັບ​ວິ­ທີ​ທາງ​ຊຸກ­ຍູ້-ສົ່ງ­ເສີມ ການ​ພົວ­ພັນ​ຮ່ວມ​ມື​ທີ່​ດີ​ໃນ​ປັດ­ຈຸ­ບັນ​ໃຫ້​ເຂັ້ມ­ແຂງ ແລະ ຂະ­ຫຍາຍ­ຕົວ​ຍິ່ງໆ​ຂຶ້ນ​ໃນ­ຕໍ່­ໜ້າ ທັງ​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ພ້ອມ​ທັງ​ໄດ້​ແລກ­ປ່ຽນ​ທັດ­ສະ­ນະ​ຕໍ່​ສະ­ພາບ​ການ​ພາກ​ພື້ນ ແລະ ສາ­ກົນ​ທີ່​ພົ້ນ​ເດັ່ນ ທີ່​ສອງ​ຝ່າຍ​ມີ​ຄວາມ​ສົນ­ໃຈ ແລະ ຜົນ​ປະ­ໂຫຍດ​ຮ່ວມ​ກັນ

    ລາວ ແລະ ອັງ­ກິດ ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ແຕ່​ປີ 1955 ເປັນ­ຕົ້ນ​ມາ ອັງ­ກິດ​ໄດ້​ໃຫ້­ການ​ຊ່ວຍ­ເຫຼືອ ສປປ ລາວ ໂດຍ​ຜ່ານ​ຂອບ​ສອງ​ຝ່າຍ ແລະ ຫຼາຍ​ຝ່າຍ ສຳ­ລັບ​ຂະ­ແໜງ­ການ​ສາ­ທາ­ລະ­ນະ​ສຸກ ຜ່ານ​ອົງ­ການ Wellcome Trust Oxford University ມູນ​ຄ່າ 1,3 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 11 ຕື້​ກີບ ແລະ ຊ່ວຍ​ຕິດ​ຕັ້ງ​ອຸ­ປະ­ກອນ ແລະ ຄົ້ນ­ຄວ້າ​ພະ­ຍາດ​ໃຫ້​ໂຮງ­ໝໍ​ມະ­ໂຫ­ສົດ 4 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 35 ຕື້​ກີບ ທຶນ​ການ​ສຶກ​ສາ​ຜ່ານ​ໂຄງ­ການ Chevening ສົກ​ປີ 2019-2020 ຈຳ­ນວນ 8 ທຶນ ການ​ຊ່ວຍ­ເຫຼືອ​ຂະ­ແໜງ ການ​ເກັບ​ກູ້​ລະ­ເບີດ​ບໍ່​ທັນ​ແຕກ ນັບ​ແຕ່​ປີ 1996 ຈົນ​ເຖິງ​ປັດ­ຈຸ­ບັນ ມູນ​ຄ່າ 12 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 105 ຕື້​ກີບ ເຊິ່ງ​ສ່ວນ​ໃຫຍ່​ແມ່ນ​ມອບ​ໃຫ້​ອົງ​ການ­ຈັດ­ຕັ້ງ​ສາ­ກົນ ທີ່​ບໍ່​ສັງ­ກັດ​ລັດ­ຖະ­ບານ ເຊັ່ນ: ອົງ­ການ MAG ແລະ Halo Trust ເປັນ​ຜູ້​ຈັດ​ຕັ້ງ​ປະ­ຕິ­ບັດ​ຕົວ​ຈິງ.

ຂ່າວທີ່ກ່ຽວຂ້ອງ