ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 18-09-2019

1.114 18 ກ.ຍ. 2019 ຫົວຂໍ້ຂ່າວອື່ນໆ

    ໃນ​ບົດ​ປະ­ຈຳ​ວັນ​ນີ້​ມີ​ຂ່າວ​ຄະ­ດີ ຜົວ​ທຳ­ຮ້າຍ​ເມຍ ຢູ່​ມາ​ເລ​ເຊຍ ຍ້ອນ​ເມຍ​ບໍ່​ມີ​ເງິນ​ຊື້​ລົດ​ໃຫ້​ຂີ່ ເລື່ອງ​ກົດໝາຍ​ຫຼຸດ​ໂທດ ຄະ­ດີ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ທີ່ ຣັດ​ເຊຍ ສຸດ​ທ້າຍ​ແມ່ນ​ເລື່ອງ ຂໍ້​ຫ້າມ​ນັກ​ທ່ອງ​ທ່ຽວ​ກິນອາ­ຫານ​ຊະ­ຊາຍ​ຢູ່​ອັງ​ກໍ​ວັດ ກຳ­ປູ­ເຈຍ.

    ທີ່ ມາ​ເລ​ເຊຍ: ມີ​ຂ່າວ​ເສົ້າ​ທີ່​ເກີດ​ຂຶ້ນ​ໃນ​ຄອບ­ຄົວ​ລະຫວ່າງ​ຜົວ​ເມຍ ເຖິງ​ຂັ້ນ​ເຮັດ​ໃຫ້​ຜູ້​ເປັນ​ເມຍ​ບາດ­ເຈັບ​ສາຫັດ ຍ້ອນ​ການ​ໃຊ້​ຄວາມ​ຮຸນ​ແຮງ​ຂອງ​ຜູ້​ເປັນ​ຜົວ ຂ່າວໜັງ­ສື­ພິມ The Nation (27 ມີ­ນາ 2019) ບອກ​ວ່າ ຊາຍຄົນ​ໜຶ່ງ​ອາ­ຍຸ 26 ປີ ໄດ້​ລົງ­ມື​ຕ່ອຍ​ຕີ​ຜູ້​ເປັນ​ເມຍ ພ້ອມ​ທັງຂູ່​ວ່າ​ຊິ​ໃຊ້​ຂວານ​ສັບ​ເຫຍື່ອ​ໃຫ້​ມຸ່ນ​ອຸ້ຍ​ປຸ້ຍ ແລະ ຊິ​ເອົາໄຟ​ເຜົາ​ເຮືອນ​ໃຫ້​ເປັນ​ຂີ້​ເຖົ່າ ຖ້າ​ນາງ​ເມຍ​ບໍ່​ຍອມ​ຈົກ​ເງິນຊື້​ລົດ​ໃຫຍ່​ມາ​ໃຫ້​ເຂົາ​ຂີ່ ເມື່ອ​ທົນ​ຕໍ່​ຄວາມ​ໂຫດ­ຮ້າຍຂອງ​ຝ່າຍ​ຜົວ​ບໍ່​ໄດ້ ນາງ​ເມຍ ອາ­ຍຸ 46 ປີ ອາ­ຊີບ​ເປັນ​ຄູສອນ ຈຶ່ງ​ໄດ້​ຫອບ​ລູກ​ທັງ​ສາມ​ຄົນ​ຂອງ​ຕົນ​ໄປ​ລີ້​ຢູ່​ເຮືອນ ຂອງ​ຜູ້​ເປັນ​ອ້າຍ ຜ່ານ​ການ​ສອບ​ສວນ ທ່ານ ນາ​ຊີ ມານ ຊໍ ຫົວ­ໜ້າ​ກອງ​ບັນ­ຊາ​ການ​ຕຳ­ຫຼວດ​ປະ­ຈຳ­ເມືອງ​ບ່ອນ­ເກີດ​ເຫດ​ບອກ​ວ່າ ຜົວ​ຜູ້​ໃຊ້​ຄວາມ​ຮຸນ​ແຮງ​ຕໍ່​ເມຍ​ນັ້ນແມ່ນ​ຄົນ​ອິນ​ໂດ​ເນ​ເຊຍ ເຂົາ​ໄດ້​ລົງ­ມື​ກໍ່​ເຫດ ເມື່ອ​ເມຍບອກ​ວ່າ ບໍ່​ສາ­ມາດ​ຊື້​ລົດ​ໃຫ້​ເຂົາ​ຕາມ​ຄຳ​ຂໍ ຕຳ­ຫຼວດ​ໄດ້ຢຶດ​ຂວານ​ເປັນ​ຂອງ​ກາງ ໃນ​ຄະ­ດີ​ນີ້​ຂ່າວ​ບອກ​ວ່າ ທ້າວຜົວ​ຕົວ​ແສບ​ຄົນ​ນີ້ ຖືກ​ກວດ​ພົບ​ວ່າ ໄດ້​ເສບ​ຢາ​ເສບ​ຕິດເວ­ລາ​ກໍ່​ເຫດ ນີ້​ລະ​ນໍ​ເພິ່ນ​ວ່າ ຢາ​ເສບ​ຕິດແມ່ນ​ພິດ​ໄພອັນ​ໃຫຍ່​ຫຼວງ​ຂອງ​ສັງ­ຄົມ​ປັດ­ຈຸ­ບັນ.

    ທີ່ ສະ­ຫະ­ພັນ​ຣັດ​ເຊຍ: ກ່ອນ​ໜ້າ​ນີ້ ສອງ​ປີ​ກວ່າໆ (ວັນ​ທີ 27 ມັງ­ກອນ 2017) ສະ­ພາ​ຜູ້​ແທນ​ລາ­ສະ­ດອນ (ສະ­ພາ​ດູ​ມາ) ຂອງ​ຣັດ​ເຊຍ ໄດ້​ຮັບ­ຮອງ​ເອົາ​ກົດ­ໝາຍວ່າ​ດ້ວຍ​ການ​ຫຼຸດ­ຜ່ອນ​ໂທດ​ສຳ­ລັບ​ຜູ້​ມີ​ຄວາມ​ຜິດ ຍ້ອນໄດ້​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ຟັງ​ແລ້ວ​ເປັນ​ເລື່ອງອ່າວ​ແປກ ເພາະ​ຢູ່​ຫຼາຍໆ​ປະ­ເທດ​ໃນ​ປັດ­ຈຸ­ບັນ​ນັ້ນ​ພາກັນ​ປັບ​ຂຶ້ນ​ໂທດ​ ສຳ­ລັບ​ຜູ້​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ແຕ່​ຢູ່​ຣັດ​ເຊຍພັດ​ຫຼຸດ​ໂທດ ! ເລື່ອງ​ນີ້​ທາງ​ການ​ຣັດ​ເຊຍອ້າງ​ວ່າ “ລັດ​ບໍ່​ມີ​ສິດ​ເຂົ້າ​ໄປ​ກ້າວ​ກ່າຍ​ແຊກ​ແຊງ​ຊີ­ວິດ ໃນ​ຄອບ­ຄົວ​ຂອງ​ປະ­ຊາ­ຊົນ” ແຕ່​ສຳ­ຄັນ​ໄປ​ກວ່າ​ນັ້ນ ກໍ​ຄື ທັດ­ສະ­ນະທີ່​ວ່າ “ບໍ່​ຄວນ​ໃຫ້​ລະ­ດັບ​ການ​ແຊກ​ແຊງ​ຂອງທາງ​ການ​ເຂົ້າ​ໃນ​ບັນ­ຫາ​ຄອບ­ຄົວ​ຫຼາຍ​ເກີນ​ໄປ ເໝືອນທີ່​ເກີດ​ຂຶ້ນ​ຢູ່​ໃນ​ປະ­ເທດ​ຕາ­ເວັນ­ຕົກ ບ່ອນ​ທີ່​ເດັກໆ​ຈຳນວນ​ຫຼາຍ​ໄດ້​ສວຍ​ໃຊ້​ຂໍ້​ອ້າງ​ວ່າ ພວກ​ຕົນ​ຕົກ​ເປັນ​ເຫຍື່ອຄວາມ​ຮຸນ​ແຮງ​ຂອງ​ຄອບ­ຄົວ ໂດຍ​ພໍ່​ແມ່ ຊຶ່ງ​ຂໍ້​ອ້າງ​ດັ່ງ­ກ່າວ​ແມ່ນ​ພຽງ​ເພື່ອ​ຊອກ​ຄວາມ​ເປັນ​ອິດ­ສະ­ຫຼະ ທີ່​ເຮັດໃຫ້​ສິດ​ການ​ດູ​ແລ​ເບິ່ງ­ແຍງ​ຂອງ​ພໍ່​ແມ່ ແມ່ນ​ສູນ​ເສຍ​ໄປ” ແນວ­ໃດ​ກໍ​ດີ ກົດ­ໝາຍ​ສະ­ບັບ​ນີ້ ຍັງ​ໄດ້​ກຳ­ນົດ​ບົດ​ລົງ­ໂທດຕໍ່​ຜູ້​ໃຊ້​ຄວາມ​ຮຸນ​ແຮງ​ຄັ້ງ​ທຳ​ອິດ​ທີ່​ບໍ່​ໜັກ­ໜ່ວງ​ເກີນ​ໄປ ດ້ວຍ​ການ​ປັບ​ໃໝ​ເປັນ​ເງິນລະ­ຫວ່າງ 100-500 ໂດ​ລາສະ­ຫະ­ລັດ ບວກ​ການ​ອອກ­ແຮງ​ງານ​ໃຫ້​ສັງ­ຄົມ 60-120 ຊົ່ວ­ໂມງ ຫຼື ຖືກ​ຄຸມ​ຂັງ​ລະ­ຫວ່າງ 10-15 ວັນ ແຕ່​ຖ້າ​ການໃຊ້​ຄວາມ​ຮຸນ​ແຮງ​ໄດ້​ກໍ່­ໃຫ້­ເກີດ​ອັນ­ຕະ­ລາຍ​ກໍ​ຈະ​ໄດ້​ຮັບ​ໂທດ​ຈຳ​ຄຸກ​ສູງ​ສຸດ 2 ປີ (ແຫຼ່ງ​ຂ່າວ​ຈາກ​ໜັງ­ສື­ພິມ​ຜູ້ແທນ​ປະ­ຊາ­ຊົນ ອາ­ທິດ​ຕົ້ນ​ເດືອນກຸມ­ພາ 2017).

    ທີ່ ກຳ­ປູ­ເຈຍ: ໃນ​ເດືອນ​ສິງ­ຫາ​ຜ່ານ​ມາ ທາງ​ການ​ກຳປູ​ເຈຍ​ ໄດ້​ອອກ​ກົດ​ລະ­ບຽບ​ສະ­ບັບ​ໃໝ່ ຫ້າມ​ບັນ­ດາ​ນັກທ່ອງ​ທ່ຽວ​ກິນ​ອາ­ຫານ​ຕາມ​ເດີ່ນ​ຫຍ້າ ໃນ​ບໍ­ລິ­ເວນ​ນະຄອນ​ວັດ (ອັງ​ກໍ​ວັດ) ເພາະ​ເປັນ​ການ​ທຳ­ລາຍ​ພາບ​ພົດ ຄຸນ­ຄ່າ​ທາງ​ວັດ­ທະ­ນະ­ທຳ​ຂອງ​ສະ­ຖານ­ທີ່​ອັນ​ລື​ຊື່​ແຫ່ງດັ່ງ­ກ່າວ ນອກ­ຈາກ​ນັ້ນ ເສດ​ອາ­ຫານ​ຍັງ​ຈະ​ສົ່ງ​ຜົນ​ກະທົບ​ຕໍ່​ສິ່ງ­ແວ­ດລ້ອມ​ອີກ​ດ້ວຍ ຄຳ​ສັ່ງ​ຫ້າມ​ນີ້ ບໍ່​ພຽງ​ແຕ່ສະ­ເພາະ​ເຈາະ​ຈົງ​ໃສ່​ບັນ­ດາ​ນັກ​ທ່ອງ​ທ່ຽວ ແລະ ຜູ້​ເຂົ້າຊົມ​ທົ່ວ​ໄປ ແຕ່​ຍັງ​ກວມ​ເອົາ​ຜູ້​ຂາຍ​ອາ­ຫານ ແລະ ເຄື່ອງດື່ມ​ອີກ​ດ້ວຍ ໃນ​ເມື່ອ​ກ່ອນ​ພວກ​ປະ­ກອບ​ອາ­ຊີບ​ຂາຍອາ­ຫານ ແລະ ເຄື່ອງ​ດື່ມ ສາ­ມາດ​ຈັດ​ວາງ​ສະ­ຖານ­ທີ່​ໃຫ້ລູກ​ຄ້າ​ສາ­ມາດ​ກິນ​ອາ­ຫານ​ຕາມ​ເດີ່ນ​ຫຍ້າ​ໃນ​ພື້ນ​ທີ່​ອັງກໍ​ວັດ​ໄດ້ ຂ່າວ​ບອກ​ວ່າ ລະ­ບຽບ​ການ​ໃໝ່​ນີ້ ຈະ​ໄດ້​ໃຊ້​ເວລາ​ເຜີຍ­ແຜ່​ໃຫ້​ທຸກ​ພາກ­ສ່ວນ​ຮັບ​ຮູ້ ແລະ ເຂົ້າ­ໃຈ​ກ່ອນ ເປັນ​ເວ­ລາ 45 ວັນ ຈາກ​ນັ້ນ ຈຶ່ງ​ຈະ​ມີ​ຜົນ​ໃນ​ທາງ​ປະ­ຕິ­ບັດຕົວ​ຈິງ​ຢ່າງ​ເດັດ­ຂາດ.

ຂ່າວທີ່ກ່ຽວຂ້ອງ