ອາເມຣິກາ ໃຫ້ການຊ່ວຍເຫຼືອຜູ້ປະສົບໄພນ້ຳຖ້ວມ

274 17 ກ.ຍ. 2019 ຂ່າວໜ້າ​ໜຶ່ງ
ອາເມຣິກາ ໃຫ້ການຊ່ວຍເຫຼືອຜູ້ປະສົບໄພນ້ຳຖ້ວມ

    ໃນ​ວັນ​ທີ 13 ກັນ­ຍາ 2019 ທີ່​ນະ­ຄອນ­ຫຼວງ​ວຽງ​ຈັນ ທ່ານ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ ສະ­ຫະ­ລັດ​ອາ​ເມ​ຣິ​ກາ ປະ­ຈຳ ສປປ ລາວ ໄດ້​ປະ­ກາດ​ແຈ້ງ​ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ພາກ​ໃຕ້​ຂອງ ສປປ ລາວ ເປັນ​ມູນ​ຄ່າ​ຈຳ­ນວນ 100.000 ໂດ​ລາ​ສະ­ຫະ­ລັດ ຫຼື ປະ­ມານ 800 ລ້ານ​ກວ່າ​ກີບ ໃນ​ນີ້ ປະ­ຊາ­ຊົນ​ສະ­ຫະ­ລັດ​ອາ​ເມ​ຣິ​ກາ​ທຸກ​ຄົນ​ມີ​ຄວາມ​ເປັນ​ຫ່ວງ​ເປັນ​ໃຍ ແລະ ພ້ອມ​ທີ່​ຈະ​ຊ່ວຍ­ເຫຼືອ​ປະ­ຊາ­ຊົນ​ລາວ ໂດຍ​ສະ­ເພາະ ໃນ​ໄລ­ຍະ​ທີ່​ປະ­ສົບ​ໄພ​ດັ່ງ­ກ່າວ.

    ໂດຍ​ຜ່ານ​ອົງ­ການ​ພັດ­ທະ­ນາ​ສາ­ກົນ ຂອງ​ສະ­ຫະ­ລັດ​ອາ​ເມ​ຣິ​ກາ (USAID) ການ​ຊ່ວຍ­ເຫຼືອ​ໄດ້​ແບ່ງ​ອອກ​ເປັນ​ແຕ່​ລະ​ໄລ­ຍະ ເຊິ່ງ​ໃນ​ຂະ­ນະ​ນີ້ ແມ່ນ​ກຳ­ລັງ​ດຳ­ເນີນ​ການ​ຈັດ​ຊື້​ອາ­ຫານ ແລະ ເຄື່ອງ​ສຸ​ຂະ​ອະ​ນາ ໄມ ເພື່ອ​ຈັດ​ສົ່ງ​ໃຫ້​ຜູ້​ປະ­ສົບ​ໄພ​ໃຫ້​ທ່ວງ​ທັນ.

    ເຄື່ອງ​ຊ່ວຍ­ເຫຼືອ​ດັ່ງ­ກ່າວ​ຈະ​ນຳ­ໄປ​ມອບ​ໃຫ້​ຄອບ­ຄົວ​ຂອງ​ຜູ້​ຖືກ​ກະ­ທົບ​ຈາກ​ນ້ຳ​ຖ້ວມ​ທີ່​ຍ້າຍ​ມາ​ອາ­ໄສ ໃນ​ບ່ອນ​ພັກ​ເຊົາ​ຊົ່ວ­ຄາວ ອາ­ໄສ​ກັບ​ຍາດ­ຕິ​ພີ່­ນ້ອງ ແລະ ຜູ້​ທີ່​ຍັງ​ຕິດ​ຄ້າງ​ຢູ່​ໃນ​ເຂດ​ນ້ຳ​ຖ້ວມ ນອກ­ຈາກ​ນີ້ ສະ­ຫະ­ລັດ​ອາ​ເມ​ຣິ​ກາ ຍັງ​ໄດ້​ສົ່ງ​ທິມ​ງານ​ຜູ້​ຊ່ຽວ­ຊານ ເພື່ອ​ເຮັດ​ວຽກ​ຮ່ວມ​ກັບ​ລັດ­ຖະ­ບານ ສປປ ລາວ ໃນ​ການ​ປະ​ເມີນ​ສະ­ຖາ­ນະ​ການ ແລະ ຄວາມ​ຕ້ອງ­ການ​ຊ່ວຍ­ເຫຼືອ​ໃນ​ຂົງ­ເຂດ​ປະ­ສົບ​ໄພ ໃນ​ຕົ້ນ​ອາ­ທິດ​ທີ່​ຜ່ານ​ມາ​ໂດຍ​ຜ່ານ​ອົງ­ການ Norwegian People’s Aid ລັດ­ຖະ­ບານ​ສະ­ຫະ­ລັດ ໄດ້​ນຳ​ໃຊ້​ກອງ​ທຶນ​ເກັບ​ກູ້​ລະ­ເບີດ​ບໍ່​ທີ່​ທັນ​ແຕກ (UXO funding) ເພື່ອ​ຊ່ວຍ­ເຫຼືອ ແຈກ​ຢາຍ​ນ້ຳ​ດື່ມ ອາ­ຫານ ແລະ ເຄື່ອງ­ໃຊ້​ສອຍ​ທີ່​ຈຳ­ເປັນ​ໃຫ້​ແກ່​ປະ­ຊາ­ຊົນ​ທີ່​ປະ­ສົບ​ໄພ​ນ້ຳ​ຖ້ວມ ຢູ່​ແຂວງ​ສາ­ລະ​ວັນ.

    ຫ້ອງ­ການ​ຊ່ວຍ­ເຫຼືອ​ໄພ​ພິ­ພັດ​ສາ­ກົນ (OFDA) ຂອງ USAID ເຮັດ​ໜ້າ­ທີ່​ເປັນ​ສູນ​ກາງ​ໃນ​ການ​ປະ ສານ​ງານ​ວຽກ​ງານ​ຊ່ວຍ­ເຫຼືອ​ເຫດ­ການ​ໄພ­ພິ­ບັດ​ທົ່ວ​ໂລກ ເຊິ່ງ​ຜ່ານ​ມາ ສະ­ຫະ­ລັດ​ອາ​ເມ​ຣິ​ກາ​ກໍ​ເຄີຍ​ໃຫ້ ການ​ຊ່ວຍ­ເຫຼືອ​ກໍ­ລະ­ນີ​ນ້ຳ​ຖ້ວມ​ຢູ່​ແຂວງ​ອັດ​ຕະ​ປື ໃນ​ເດືອນ​ກໍ­ລະ­ກົດ​ປີ​ທີ່​ຜ່ານ​ມາ (ຜ່ານ​ອົງ­ການ UNICEF ແລະ IOM)  ແລະ ໃນ​ເດືອນ ມີ­ນາ 2019 ກໍ​ໄດ້​ປະ­ກອບ​ທຶນ​ຕື່ມ​ໃນ​ການ​ຫຼຸດ­ຜ່ອນ​ຄວາມ​ສ່ຽງ ແລະ ຟື້ນ​ຟູ​ໄລ­ຍະ​ຍາວ ນອກ­ຈາກ​ນີ້ ກໍ​ຍັງ​ໃຫ້­ການ​ຊ່ວຍ­ເຫຼືອ​ໂຄງ­ການ​ອາ­ຫານ​ເດັກ ໃນ​ໂຮງ­ຮຽນ​ທີ່​ເຄີຍ​ຖືກ​ນ້ຳ​ຖ້ວມ ໂດຍ​ຜ່ານ​ໂຄງ­ການ​ຂອງ​ອົງ­ການ​ອາ­ຫານ​ໂລກ World Food Program (WFP) ແລະ ອົງ­ການ Catholic Relief Services (CRS) ໃນ ສປປ ລາວ ສະ­ຫະ­ລັດ​ອາ​ເມ​ຣິ​ກາ ໃຫ້­ການ​ສະ­ໜັບ­ສະ­ໜູນ​ຫຼາຍ​ຂົງ­ເຂດ ບໍ່​ວ່າ​ຈະ​ເປັນ​ສຶກ​ສາ ສາ­ທາ­ລະ­ນະ​ສຸກ ຊ່ວຍ­ເຫຼືອ​ຜູ້​ທຸກ​ຍາກ ແລະ ດ້ອຍ​ໂອ­ກາດ ສົ່ງ­ເສີມ​ການ​ຄ້າ ແລະ ເສດ­ຖະ­ກິດ ແລະ ປົກ​ປັກ​ຮັກ­ສາ​ສິ່ງ­ແວ­ດລ້ອມ.

ຂ່າວທີ່ກ່ຽວຂ້ອງ