ເຊີນຮ່ວມງານວາງສະແດງວິທະຍາສາດ ແລະ ເຕັກໂນໂລຊີ 11-16 ຕຸລາ ນີ້

192 17 ກ.ຍ. 2019 ຂ່າວໜ້າ​ໜຶ່ງ

    ວັນ​ທີ 13 ກັນ­ຍາ 2019 ຢູ່​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ (ກວ​ຕ) ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ຖະ­ແຫຼງ​ຂ່າວ​ກ່ຽວ​ກັບ​ງານ​ວາງ­ສະ­ແດງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ແລະ ການ​ຮ່ວມ​ມື​ພັດ­ທະ­ນາ​ອຸດ­ສາ­ຫະ­ກຳ​ເຕັກ​ໂນ​ໂລ​ຊີ​ລະ­ດັບ​ສູງ ລາວ-ຈີນ 2019 ໂດຍ​ມີ​ທ່ານ​ຮອງ​ລັດ­ຖະ­ມົນ­ຕີ ກວ​ຕ ບັນ­ດາ​ກົມ ພະ­ແນກ­ການ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບໍ່​ວຽງ​ຄຳ ວົງ​ດາ­ລາ ກ່າວ​ວ່າ: ເພື່ອ​ປະ­ກອບ­ສ່ວນ​ສ້າງ​ຂະ​ບວນ​ການ​ກຽມ​ສະ­ຫຼອງ​ວັນ​ວິ­ທະ­ຍາ­ສາດ​ແຫ່ງ​ຊາດ ແລະ ວັນ​ປະ­ກາດ​ເອ­ກະ­ລາດ ວັນ​ທີ 12 ຕຸ­ລາ ກວ​ຕ ຈະ​ຈັດ​ງານ​ວາງ­ສະ­ແດງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ແລະ ການ​ຮ່ວມ​ມື​ພັດ­ທະ­ນາ​ອຸດ­ສາ­ຫະ­ກຳ​ເຕັກ​ໂນ​ໂລ​ຊີ​ລະ­ດັບ​ສູງ ລາວ-ຈີນ 2019 ແຕ່​ວັນ​ທີ 11-16 ຕຸ­ລາ 2019 ຢູ່​ຫໍ​ປະ­ຊຸມ​ແຫ່ງ​ຊາດ ນອກ­ຈາກ​ກາ­ນວາງ­ສະ­ແດງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ແລ້ວ ຍັງ​ມີ​ສຳ​ມະ​ນາ​ກ່ຽວ​ກັບ​ການ​ຮ່ວມ​ມື​ພັດ­ທະ­ນາ​ອຸດ­ສາ­ຫະ­ກຳ​ເຕັກ​ໂນ​ໂລ​ຊີ​ລະ­ດັບ​ສູງ ລາວ-ຈີນ ກອງ​ປະ­ຊຸມ​ວິ​ທະ ຍາ​ສາດ​ເຕັກ​ໂນ​ໂນ​ຊີ​ທົ່ວ​ປະ­ເທດ ຄັ້ງ​ທີ 3 ແລະ ອີກ​ຫຼາຍ​ຫົວ­ຂໍ້​ກອງ​ປະ­ຊຸມ​ທີ່​ສຳ­ຄັນ ນອກ​ນີ້ ຍັງ​ຈະ​ຈັດ​ແຂ່ງ­ຂັນ​ແນວ​ຄວາມ​ຄິດ​ສ້າງ­ສັນ​ສິ່ງ​ປະ­ດິດ​ສ້າງ​ສຳ­ລັບ​ໄວ​ໜຸ່ມ ນັກ­ຮຽນ-ນັກ​ສຶກ​ສາ ເຊິ່ງ​ງານ​ຄັ້ງ​ນີ້​ເປັນ​ການ​ຮ່ວມ​ມື ລະ­ຫວ່າງ ກວ​ຕ ແລະ ຫ້ອງ­ການ​ຜູ້­ຕາງ­ໜ້າ​ສະ­ພາ​ສົ່ງ­ເສີມ​ການ​ຄ້າ​ສາ­ກົນ ສປ ຈີນ ຂະ­ແໜງ​ອຸດ­ສາ­ຫະ­ກຳ​ກໍ່­ສ້າງ ປະ­ຈຳ ສປປ ລາວ ບໍ­ລິ­ສັດ​ທີ່​ປຶກ­ສາ​ການ​ລົງ­ທຶນ ແລະ ກໍ່­ສ້າງ​ເຂື່ອນ​ໄຟ­ຟ້າ​ຈຳ­ກັດ​ຜູ້​ດຽວ ແລະ ບໍ­ລິ­ສັດ​ພັດ­ທະ­ນາ​ວິ­ທະ­ຍາ­ສາດ ເຕັກ­ນິກ​ປັກ​ກິ່ງ​ເຈີ່ນ​ຕີ ຜູ້​ປະ­ກອບ​ການ​ທຸ­ລະ​ກິດ ບໍ­ລິ­ສັດ ແລະ ຫ້າງ​ຮ້ານ​ຕ່າງໆ​ພາຍ​ໃນ ແລະ ຕ່າງ­ປະ­ເທດ.

    ງານ​ຄັ້ງ​ນີ້​ມີ​ຄວາມ​ໝາຍ​ສຳ­ຄັນ​ຫຼາຍ ເພາະ​ເປັນ​ເຫດ­ການ​ປະ­ຫວັດ­ສາດ​ຂອງ​ການ​ຮ່ວມ​ມື ແລກ­ປ່ຽນ ແລະ ເລືອກ­ເຟັ້ນ​ເອົາ​ເຕັກ​ໂນ​ໂລ​ຊີ​ທີ່​ກ້າວ­ໜ້າ ທັນ​ສະ­ໄໝ ແລະ ເໝາະ​ສົມ ເພື່ອ​ດຶງ​ດູດ​ການ​ລົງ­ທຶນ​ເຂົ້າ​ໃນ​ການ​ພັດ ທະ​ນາ​ພື້ນ­ຖານ​ໂຄງ​ລ່າງ​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ໃຫ້​ເປັນ​ລະ­ບົບ​ຄົບ​ຊຸດ ເປັນ­ຕົ້ນ ການ​ຄົ້ນ­ຄວ້າ ແລະ ພັດ­ທະ­ນາ​ເຜີຍ­ແຜ່ ສົ່ງ­ເສີມ​ການ​ນຳ​ໃຊ້​ຜົນ​ການ​ຄົ້ນ­ຄວ້າ​ວິ­ທະ­ຍາ­ສາດ ການ​ພັດ­ທະ­ນາ​ອຸດ­ສາ­ຫະ­ກຳ ການ​ຜະ­ລິດ ການ​ບໍ­ລິ­ການ ຕິດ​ພັນ​ກັບ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ເຊິ່ງ​ຄາດ​ວ່າ​ຈະ​ມີ​ມະ­ຫາ­ວິ­ທະ­ຍາ­ໄລ ສະ​ຖາ​ບັນ​ຄົ້ນ­ຄວ້າ ກະ­ຊວງ ຂະ­ແໜງ­ການ​ຕ່າງໆ​ຈາກ​ປະ­ເທດ ສປ ຈີນ ແລະ ໄທ ເຂົ້າ​ຮ່ວມ 100 ຮ້ານ ໂດຍ​ຈະ​ມີ​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ​ໃນ​ຍຸກ​ການ​ພັດ­ທະ­ນາ​ເຕັກ​ໂນ​ໂລ​ຊີ 4.0 (ອຸດ­ສາ­ຫະ­ກຳ 4.0) ນອກ​ນີ້ ຍັງ​ເປັນ​ເວ­ທີ​ແລກ­ປ່ຽນ​ການ​ຮ່ວມ​ມື​ດ້ານ​ການ​ຄົ້ນ­ຄວ້າ ແລະ ການ​ລົງ­ທຶນ​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ລະ­ຫວ່າງ ພາກ​ລັດ ແລະ ເອ­ກະ​ຊົນ ສະ​ຖາ​ບັນ​ຄົ້ນ­ຄວ້າ ມະ­ຫາ­ວິ­ທະ­ຍາ­ໄລ ພາກ​ທຸ­ລະ​ກິດ ແລະ ຜູ້​ປະ­ກອບ​ການ ທັງ​ພາຍ​ໃນ ແລະ ຕ່າງ­ປະ­ເທດ​ຕື່ມ​ອີກ.

ຂ່າວທີ່ກ່ຽວຂ້ອງ