ຫຼາຍທະນາຄານ ເຂົ້າຮ່ວມໂຄງການເງິນກູ້ເພື່ອສົ່ງເສີມ SMEs

327 17 ກ.ຍ. 2019 ຂ່າວໜ້າ​ໜຶ່ງ
ຫຼາຍທະນາຄານ ເຂົ້າຮ່ວມໂຄງການເງິນກູ້ເພື່ອສົ່ງເສີມ SMEs

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ເຂົ້າ​ຮ່ວມ​ໂຄງ­ການ​ເງິນ​ກູ້​ຈາກ​ທະ­ນາ­ຄານ​ພັດ­ທະ­ນາ​ແຫ່ງ​ຊາດ​ຈີນ (CDB) ບ້ວງ 300 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 2.500 ຕື້​ກີບ ເພື່ອ​ສົ່ງ­ເສີມ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ (SMEs) ຈັດ​ຂຶ້ນ​ວັນ​ທີ 13 ກັນ­ຍາ 2019 ຢູ່​ນະ­ຄອນ­ຫຼວງ​ວຽງ​ຈັນ ລະ­ຫວ່າງ ທ່ານ ຄຳ​ແກ້ວ ວີ​ສີ​ສົມ­ບັດ ວ່າ­ການ​ຫົວ­ໜ້າ​ກົມ​ບໍ­ລິ­ການ​ທະ­ນາ­ຄານ ທະ­ນາ­ຄານ​ແຫ່ງ ສປປ ລາວ (ທຫລ) ແລະ ຕາງ­ໜ້າ​ທະ­ນາ­ຄານ​ທຸ­ລະ​ກິດ ຄື: ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ ທະ­ນາ­ຄານ​ພັດ­ທະ­ນາ​ລາວ ທະ­ນາ­ຄານ​ສົ່ງ­ເສີມ​ກະ­ສິ­ກຳ ທະ­ນາ­ຄານ​ມາ​ຣູ​ຮານ ເຈ​ແປນ​ລາວ ຈຳ­ກັດ ທະ­ນາ­ຄານ​ຮ່ວມ​ພັດ­ທະ­ນາ ທະ­ນາ­ຄານ​ລາວ-ຈີນ ຈຳ­ກັດ ທະ­ນາ­ຄານ​ຮ່ວມ​ທຸ­ລະ​ກິດ ລາວ-ຫວຽດ ທະ­ນາ­ຄານ​ເອັສ​ທີ ຈຳ­ກັດ ທະ­ນາ­ຄານ​ຫຸ້ນ​ສ່ວນ​ການ​ຄ້າ​ທະ­ຫານ​ສາ­ຂາ​ລາວ ແລະ ທະ­ນາ­ຄານ​ໄຊ​ງ່ອນ​ເທືອງ​ຕິນ​ລາວ ຈຳ­ກັດ ໂດຍ​ມີ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ ທຫລ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ເຂົ້າ​ຮ່ວມ​ໂຄງ­ການ​ດັ່ງ­ກ່າວ ເພື່ອ​ເປັນ​ການ​ປະ­ກອບ­ສ່ວນ​ໃນ​ການ­ຈັດ­ຕັ້ງ​ປະ­ຕິ­ບັດ ເປົ້າ​ໝາຍ​ພັດ­ທະ­ນາ​ແບບ​ຍືນ​ຍົງ​ຂອງ​ລັດ­ຖະ­ບານ ກໍ​ຄື ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ໃຫ້​ເຕີບ​ໃຫຍ່ ເຂັ້ມ­ແຂງ ດ້ວຍ​ການ​ສົ່ງ­ເສີມ​ການ​ພັດ­ທະ­ນາ SMEs ທີ່​ຂະ­ແໜງ­ການ​ທະ­ນາ­ຄານ​ໄດ້​ຮັບ​ມອບ​ໝາຍ​ຈາກ​ລັດ­ຖະ­ບານ​ໃນ​ການ​ຮັບ​ເອົາ​ເງິນ​ກູ້​ຈາກ CDB ເຊິ່ງ​ທະ­ນາ­ຄານ​ທຸ­ລະ​ກິດ​ຕ້ອງ​ມີ​ຄົບ​ບາງ​ເງື່ອນ­ໄຂ ເປັນ­ຕົ້ນ ອັດ­ຕາ​ສ່ວນ​ໜີ້​ທວງ​ຍາກ​ຕໍ່​ສິນ​ເຊື່ອ​ທັງ​ໝົດ ຕ້ອງ​ຕ່ຳ​ກວ່າ 5% ອັດ­ຕາ​ສ່ວນ​ພຽງ­ພໍ​ຂອງ​ທຶນ​ຕ້ອງ​ສູງ​ກວ່າ 8% ຜົນ​ຕອບ​ແທນ​ຕໍ່​ທຶນ ຕ້ອງ​ບໍ່​ຕ່ຳ​ກວ່າ 10% ຜ່ານ​ການ​ພິ­ຈາ­ລະ­ນາ ແລະ ຄົ້ນ­ຄວ້າ​ແມ່ນ​ມີ 16 ທະ­ນາ­ຄານ​ທຸ­ລະ​ກິດ​ທີ່​ມີ​ເງື່ອນ­ໄຂ​ຄົບ​ຖ້ວນ​ສະ­ໝັກ​ເຂົ້າ​ໂຄງ­ການ ແຕ່​ຕົວ​ຈິງ​ມີ 10 ທະ­ນາ­ຄານ ທີ່​ແຈ້ງ​ເຈດ​ຈຳ­ນົງ​ເຂົ້າ​ຮ່ວມ.

    ສຳ­ລັບ​ເງິນ​ກູ້​ບ້ວງ​ດັ່ງ­ກ່າວ ເພື່ອ​ສົ່ງ­ເສີມ SMEs ໃນ​ລາວ​ໄດ້​ອອກ​ເປັນ 3 ງວດ ງວດ​ລະ 100 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 880 ຕື້​ກີບ ໃນ​ວັນ​ທີ 9 ກໍ­ລະ­ກົດ 2019 ທຫລ ໄດ້​ລົງ​ນາມ​ສັນ­ຍາ​ເງິນ​ກູ້​ງວດ​ທີ 1 ຈຳ­ນວນ 100 ໂດ​ລາ​ສະ­ຫະ­ລັດ ໄລ­ຍະ​ກູ້​ຢືມ 5 ປີ ໃນ​ນີ້ ປອດ​ໜີ້​ຕົ້ນ​ທຶນ 3 ປີ ດ້ວຍ​ເງື່ອນ­ໄຂ​ທີ່ ທຫລ ບໍ­ລິ­ຫານ ແລະ ຄຸ້ມ​ຄອງ​ໃນ​ຮູບ​ແບບ​ປ່ອຍ​ຜ່ານ​ທະ­ນາ­ຄານ​ທຸ­ລະ​ກິດ ທີ່​ມີ​ຄວາມ​ເຂັ້ມ­ແຂງ ແລະ ທະ­ນາ­ຄານ​ທຸ­ລະ​ກິດ​ລັດ​ຈຳ­ນວນ​ໜຶ່ງ ຕາມ​ການ​ມອບ​ໝາຍ​ຂອງ ທຫລ ເພື່ອ​ປ່ອຍ​ກູ້​ໃຫ້ SMEs ໃນ​ລາວ.

ຂ່າວທີ່ກ່ຽວຂ້ອງ