ຈຸດຈົບຢູ່ຜາຖີ່-ນັກສູ້ແຫ່ງລຸ່ມນ້ຳຂອງ ໄດ້ຮັບລາງວັນ ວັນນະກຳແມ່ນ້ຳຂອງ

225 17 ກ.ຍ. 2019 ຂ່າວໜ້າ​ໜຶ່ງ
ຈຸດຈົບຢູ່ຜາຖີ່-ນັກສູ້ແຫ່ງລຸ່ມນ້ຳຂອງ ໄດ້ຮັບລາງວັນ ວັນນະກຳແມ່ນ້ຳຂອງ

    ສະ­ມາ­ຄົມ​ນັກ​ປະ­ພັນ​ລາວ ຈັດ​ຖະ­ແຫຼງ​ຂ່າວ​ຜົນ​ການ​ຕັດ­ສິນ​ລາ­ງວັນ ວັນ­ນະ­ກຳ​ແມ່­ນ້ຳ​ຂອງ ປະ­ຈຳ​ປີ 2019 ຂຶ້ນ​ວັນ​ທີ 13 ກັນ­ຍາ 2019 ຢູ່​ຄະ­ນະ​ອັກ­ສອນ­ສາດ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ໂດຍ​ການ​ຖະ­ແຫຼງ​ຂ່າວ​ຂອງ​ທ່ານ ທອງ​ໃບ ໂພ­ທິ​ສານ ປະ­ທານ​ສະ­ມາ­ຄົມ​ນັກ​ປະ­ພັນ​ລາວ ຫົວ­ໜ້າ​ກົມ​ມໍ­ລະ­ດົກ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ມີ​ທ່ານ​ນາງ ບົວ​ໄຂ ເພັງ​ພະ­ຈັນ ຫົວ­ໜ້າ​ກົມ​ພິມ​ຈຳ­ໜ່າຍ ທ່ານ​ນາງ ດາ­ລາ ກັນ­ລະ­ຍາ ສິ­ລະ​ປິນ​ແຫ່ງ​ຊາດ ນັກ​ປະ­ພັນ​ອາ­ວຸ­ໂສ ພ້ອມ​ດ້ວຍ​ສະ ມາ​ຊິກ​ສະ­ມາ­ຄົມ​ນັກ​ປະ­ພັນ​ລາວ ຄູ-ອາ­ຈານ ແລະ ນັກ​ສຶກ​ສາ ເຂົ້າ​ຮ່ວມ.

    ທ່ານ ທອງ​ໃບ ໂພ­ທິ​ສານ ກ່າວ​ວ່າ: ລາ­ງວັນ ວັນ­ນະ­ກຳ​ແມ່­ນ້ຳ​ຂອງ ໄດ້​ສ້າງ­ຕັ້ງ​ຂຶ້ນ​ປີ 2007 ໂດຍ​ການ​ລິ​ເລີ່ມ​ຂອງ​ສະ­ມາ­ຄົມ​ນັກ​ປະ­ພັນ ຫວຽດ­ນາມ ລາວ ແລະ ກຳ­ປູ­ເຈຍ ເຊິ່ງ​ມອບ​ລາ­ງວັນ​ຄັ້ງ​ທຳ​ອິດ​ປີ 2008 ເພື່ອ​ເສີມ​ສ້າງ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ຂອງ​ນັກ​ປະ­ພັນ ນັກ​ກະ­ວີ​ລະ ຫວ່າງ​ປະ­ເທດ​ທີ່​ມີ​ຊາຍ​ແດນ​ຕິດ​ແມ່­ນ້ຳ​ຂອງ ດ້ວຍ​ການ​ມອບ​ລາ­ງວັນ ວັນ­ນະ­ກຳ​ສ້າງ­ສັນ​ດີ­ເດັ່ນ ແລະ ສຳ​ມະ​ນາ​ວິ­ຊາ​ການ ເພື່ອ​ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ ປັດ­ຈຸ­ບັນ​ມີ​ນັກ​ປະ­ພັນ ນັກ​ກະ­ວີ ເຂົ້າ​ຮ່ວມ​ເປັນ​ສະ­ມາ­ຊິກ 6 ປະ­ເທດ ຄື: ລາວ ຫວຽດ­ນາມ ກຳ­ປູ­ເຈຍ ໄທ ມຽນ​ມາ ແລະ ສປ ຈີນ ລາ­ງວັນ​ນີ້​ຍັງ​ເປັນ​ລາ­ງວັນ​ໜຶ່ງ​ທີ່​ມີ​ຄວາມ​ສຳ­ຄັນ​ໃນ​ການ​ເສີມ​ສ້າງ​ສັນ­ຕິ­ພາບ ມິດ­ຕະ­ພາບ ແລະ ການ​ຮ່ວມ​ມື​ດ້ານ​ການ​ປະ­ພັນ​ວັນ­ນະ­ຄະ­ດີ​ໃນ​ຂົງ­ເຂດ ພ້ອມ​ທັງ​ເສີມ​ສ້າງ​ອາ​ລິ​ຍະ​ທຳ​ດ້ານ​ຈິດ­ໃຈ ຄວາມ​ຮັ່ງ­ມີ​ດ້ານ​ສິ­ລະ​ປະ-ວັນ­ນະ­ຄະ­ດີ ໃຫ້​ປະ­ຊາ­ຊົນ​ບັນ­ດາ­ເຜົ່າ​ຢູ່​ໃນ​ແຕ່​ລະ​ປະ­ເທດ ໃຫ້​ນັບ​ມື້​ອຸ­ດົມ­ສົມ­ບູນ.

    ປີ 2019 ສປປ ລາວ ມີ​ບົດ​ນະ­ວະ​ນິ­ຍາຍ ກະ­ວີ ເລື່ອງ­ສັ້ນ ບົດ​ບັນ­ທຶກ ສົ່ງ​ເຂົ້າ​ຄັດ​ເລືອກ 18 ບົດ ຜ່ານ​ການ​ກວດ​ສອບ​ຂອງ​ຄະ­ນະ​ກຳ­ມະ­ການ​ຕັດ­ສິນ​ລາ­ງວັນ​ດັ່ງ­ກ່າວ ບົດ​ນະ­ວະ​ນິ­ຍາຍ “ຈຸດ​ຈົບ​ຢູ່​ຜາ​ຖີ່” ຂຽນ​ໂດຍ​ທ່ານ ແສງ​ຈັນ ສຸ​ຂະ​ເສມ ແລະ ບົດ​ກະ­ວີ “ນັກ​ສູ້​ແຫ່ງ​ລຸ່ມ​ນ້ຳ­ຂອງ” ຂຽນ​ໂດຍ​ທ່ານ​ແສງ​ພູ­ໄຊ ອິນ​ທະ­ວີ​ຄຳ ມີ​ຄົບ​ເງື່ອນ­ໄຂ ມາດ­ຕະ­ຖານ ຈຶ່ງ​ສາ­ມາດ​ຮັບ­ຮອງ​ເອົາ​ເປັນ​ບົດ​ຊະ­ນະ​ເລີດ​ລາ­ງວັນ​ແມ່­ນ້ຳ​ຂອງ​ປີ 2019 ໂດຍ​ການ​ມອບ-ຮັບ ຈະ​ຈັດ​ຂຶ້ນ​ຢູ່​ປະ­ເທດ​ມຽນ​ມາ ໃນ​ເດືອນ​ຕຸ­ລາ 2019.

ຂ່າວທີ່ກ່ຽວຂ້ອງ