ນັກກີລາດຶງເຊືອກລາວ ໄດ້ທີ 3-4 ຊີງແຊັມອາຊີ

502 17 ກ.ຍ. 2019 ວົງຈອນກີລາ
ນັກກີລາດຶງເຊືອກລາວ ໄດ້ທີ 3-4 ຊີງແຊັມອາຊີ

    ນັກ­ກີ­ລາ​ດຶງ­ເຊືອກ​ທີມ​ຊາດ​ລາວ ປະ­ເພດ​ຍິງ-ຊາຍ ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ ໃນ​ການ​ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ດຶງ­ເຊືອກ ຊີງ​ແຊັມ​ອາ­ຊີ ຄັ້ງ​ທີ 14 ຫຼື 14 th Asian Tug of War Indoor Championship 2019 ຢູ່​ແຂວງ​ນະ­ຄອນ​ສີ​ອາ​ຢຸດ​ທະ​ຍາ ປະ­ເທດ​ໄທ ລະ­ຫວ່າງ​ວັນ​ທີ 13-16 ກັນ­ຍາ​ນີ້.

    ການ​ແຂ່ງ­ຂັນ​ຄັ້ງ​ນີ້ ມີ 10 ປະ­ເທດ ຄື:ບຣູ​ໄນ ໃຕ້​ຫວັນ ກຳ­ປູ­ເຈຍ ລາວ ມຽນ​ມາ ມາ​ເກົາ ເນ​ປານ ສີ​ລັງ­ກາ ອິນ​ເດຍ ແລະ ໄທ ເຈົ້າ­ພາບ ໃນ​ນັ້ນ ທີມ​ຊາຍ ມີ 9 ຄະ­ນະ ແລະ ທີມ​ຍິງ ມີ 6 ຄະ­ນະ ເຊິ່ງ​ທັງ 2 ປະ­ເພດ ແມ່ນ​ແຂ່ງ­ຂັນ​ແບບ​ພົບ​ກັນ​ໝົດ ແລ້ວ​ຄັດ​ເອົາ​ທີມ​ທີ່​ມີ​ຄະ­ແນນ​ດີ​ທີ່​ສຸດ (ທີມ​ອັນ​ດັບ​ທີ 1-4 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຮອງ​ຊະ­ນະ​ເລີດ ຫຼື ຮອບ 4 ທີມ​ສຸດ​ທ້າຍ).

    ການ​ແຂ່ງ­ຂັນ​ຜົນ​ປາ­ກົດ​ວ່າ: ປະ­ເພດ​ຊາຍ (ນັກ­ກີ­ລາ​ຈຳ­ນວນ 8 ຄົນ ນ້ຳ­ໜັກ​ບໍ່​ເກີນ 600 ກິ​ໂລ) ທີມ​ຊາດ​ຊາຍ​ລາວ ລົງ​ແຂ່ງ­ຂັນ​ຮອບ​ຄັດ​ເລືອກ 8 ຄັ້ງ ນັດ​ທຳ​ອິດ ຊະ­ນະ ກຳ­ປູ­ເຈຍ ນັດ​ທີ​ສອງ ຊະ­ນະ ມຽນ​ມາ ນັດ​ທີ​ສາມ ຊະ­ນະ ເນ​ປານ ນັດ​ທີ​ສີ່ ເສຍ​ໃຫ້ ໃຕ້​ຫວັນ ນັດ​ທີ​ຫ້າ ຊະ­ນະ ສີ​ລັງ­ກາ ນັດ​ທີ​ຫົກ ສະ­ເໝີ ມາ​ເກົາ ນັດ​ທີ​ເຈັດ ສະ­ເໝີ ບຣູ​ໄນ ແລະ ນັດ​ສຸດ​ທ້າຍ ເສຍ​ໃຫ້ ໄທ ແຕ່​ກໍ​ຍັງ​ຜ່ານ​ເຂົ້າ​ຮອບ​ຮອງ​ຊະ­ນະ​ເລີດ.

    ສຳ­ລັບ​ຮອບ 4 ທີມ ທີມ​ຊາດ​ລາວ ພົບ​ກັບ ໃຕ້​ຫວັນ ທີມ​ອັນ​ດັບ 1 ຂອງ​ໂລກ ແຕ່​ກໍ​ບໍ່​ສາ­ມາດ​ຜ່ານ​ທີມ​ແຊັມ​ໂລກ​ໄປ​ໄດ້ ຈື່ງ​ເຮັດ​ໃຫ້​ເຂົ້າ​ໄປ​ຊີງ​ອັນ​ດັບ 3 ກັບ ທີມ ມາ​ເກົາ ແລະ ເປັນ​ທີມ​ຊາດ​ລາວ ສາ­ມາດ​ເອົາ​ຊະ­ນະ ມາ​ເກົາ ໄດ້​ອັນ​ດັບ 3 ໄປ​ຄອງ ອັນ​ດັບ 1 ໃຕ້​ຫວັນ ແລະ ອັນ​ດັບ 2 ໄທ ເຈົ້າ­ພາບ.

    ສ່ວນ​ປະ­ເພດ​ຍິງ (ນັກ­ກີ­ລາ​ຈຳ­ນວນ 8 ຄົນ ນ້ຳ­ໜັກ​ບໍ່​ເກີນ 500 ກິ​ໂລ) ທີມ​ຊາດ​ຍິງ​ລາວ ລົງ​ແຂ່ງ­ຂັນ​ໃນ​ຮອບ​ຄັດ​ເລືອກ 5 ຄັ້ງ ນັດ​ທຳ​ອິດ ຊະ­ນະ ອິນ​ເດຍ ນັດ​ທີ​ສອງ ຊະ­ນະ ກຳ­ປູ­ເຈຍ ນັດ​ທີ​ສາມ ສະ­ເໝີ ສີ​ລັງ­ກາ ແລະ​ນັດ​ສຸດ​ທ້າຍ​ເສຍ​ໃຫ້ ໄທ ໄດ້​ຜ່ານ​ເຂົ້າ​ຮອບ 4 ທີມ​ສຸດ​ທ້າຍ ເຊັ່ນ​ດຽວ​ກັນ​ໃນ ຮອບ 4 ທີມ​ສຸດ​ທ້າຍ ທີມ​ສາວ​ລາວ ເສຍ​ໃຫ້​ກັບ ທີມ​ຊາດ​ໄທ ໄດ້​ເຂົ້າ​ໄປ​ຊີງ​ອັນ​ດັບ 3 ກັບ​ທີມ​ຊາດ​ສີ​ລັງ­ກາ ແລະ ເປັນ​ທີມ​ສີ​ລັງ­ກາ ເຮັດ​ໄດ້​ດີ​ກວ່າ ເອົາ​ຊະ­ນະ ສາວ​ລາວ​ໄປ​ໄດ້ ເຮັດ​ໃຫ້ ສາວ​ລາວ ໄດ້​ອັນ​ດັບ 4 ສ່ວນ​ອັນ​ດັບ 1 ໃຕ້​ຫວັນ ແລະ ອັນ​ດັບ 2 ໄທ ເຈົ້າ­ພາບ.

    ນອກ­ຈາກ​ນີ້ ຝ່າຍ​ຈັດ­ການ​ແຂ່ງ­ຂັນ ຍັງ​ໄດ້​ຈັດ​ອັນ​ດັບ​ໃນ​ລະ­ດັບ​ປະ­ເທດ​ອາ​ຊຽນ ອັນ​ດັບ 1 ໄທ ອັນ​ດັບ 2 ສປປ ລາວ​ແລະ ອັນ​ດັບ 3 ບຣູ​ໄນ ສ່ວນ​ປະ­ເພດ​ຍິງ ອັນ​ດັບ 1 ໄທ ອັນ​ດັບ 2 ສປປ ລາວ ແລະ ອັນ​ດັບ 3 ກຳ­ປູ­ເຈຍ.

ຂ່າວທີ່ກ່ຽວຂ້ອງ