ເບິ່ງບ້ານເຂົາເອົາບົດຮຽນ 17-09-2019

187 17 ກ.ຍ. 2019 ຫົວຂໍ້ຂ່າວອື່ນໆ

    ສອງ​ເລື່ອງ​ປະ­ຈຳ​ບົດ​ສຳ­ລັບ​ວັນ​ນີ້ ມີ​ຂ່າວ​ກ່ຽວ​ກັບ​ທາງ​ການ​ຈີນ​ຂຶ້ນ​ແຜນ​ປັບ­ປຸງ​ກົດ­ໝາຍ​ວ່າ​ດ້ວຍ​ການ​ມອບ​ຊາກ​ສົບ ເພື່ອ​ນຳ​ໃຊ້​ທາງ​ການ​ແພດ ຂ່າວ​ກ່ຽວ​ກັບ​ມາດ​ຕະ­ການ​ລົງ­ໂທດ​ໂຊ​ເຟີ​ລົດ​ບໍ­ລິ­ການ​ປະ­ເພດ ແທັກ​ຊີ ທີ່​ປະ­ຕິ­ເສດ​ລູກ​ຄ້າ​ຢູ່​ປະ­ເທດ​ໄທ ແລະ ເລື່ອງ​ການ​ເກັບ​ພາ­ສີ​ທ່ອງ​ທ່ຽວ ທີ່​ມາ​ເລ​ເຊຍ.

    ທີ່ ສປ ຈີນ: ມີ​ຂ່າວ​ໃນ​ທ້າຍ​ເດືອນ​ສິງ­ຫາ​ປີ​ນີ້​ວ່າ ທາງ​ການ ສປ ຈີນ ໄດ້​ມີ​ແຜນ​ປັບ­ປຸງ​ກົດ­ໝາຍ​ອາ­ຍາ ໃນ​ສ່ວນ​ທີ່​ກຳ­ນົດ​ກ່ຽວ​ກັບ​ການ​ບໍ­ລິ­ຈາກ​ຊາກ​ສົບ​ຄົນ ເພື່ອ​ນຳ​ໃຊ້​ອະ​ໄວ​ຍະ​ວະ​ທີ່​ຈຳ­ເປັນ ຫຼື ເພື່ອ​ການ​ຄົ້ນ­ຄວ້າ​ທາງ​ການ​ແພດ ແນ­ໃສ່​ແກ້​ໄຂ​ບັນ­ຫາ​ຂາດ­ແຄນ​ອະ​ໄວ​ຍະ​ວະ​ມະ­ນຸດ ເພື່ອ​ສະ­ໜອງ​ກັບ​ຄວາມ​ຕ້ອງ­ການ ກໍ​ຄື ເພື່ອ​ນຳ​ໃຊ້​ຊາກ​ສົບ​ທາງ​ການ​ແພດ ຕາມ​ກົດ­ໝາຍ​ທີ່​ປະ­ຕິ­ບັດ​ກັນ​ຢູ່ ໃນ​ປັດ­ຈຸ­ບັນ​ນີ້ ການ​ບໍ­ລິ­ຈາກ​ຊາກ​ສົບ​ນັ້ນ ຕ້ອງ​ໄດ້​ຮັບ​ການ​ເຫັນ​ດີ​ຈາກ​ເຈົ້າ​ຂອງ​ຮ່າງ­ກາຍ​ກ່ອນ​ຜູ້­ກ່ຽວ​ເສຍ​ຊີ­ວິດ​ລົງ ຖ້າ​ບໍ່​ເຫັນ​ດີ ແມ່ນ​ບໍ່​ສາ­ມາດ​ເຮັດ​ຫຍັງ​ກັບ​ຊາກ​ສົບ​ນັ້ນ​ໄດ້​ຢ່າງ​ເດັດ­ຂາດ ເພື່ອ​ແກ້​ໄຂ​ບັນ­ຫາ​ຂາດ­ແຄນ​ອະ​ໄວ​ຍະ​ວະ ແລະ ຊາກ​ສົບ​ເພື່ອ​ນຳ​ໃຊ້​ໃນ​ທາງ​ການ​ແພດ ຈຶ່ງ​ມີ​ຄວາມ​ຈຳ­ເປັນ​ຕ້ອງ​ໄດ້​ປັບ­ປຸງ​ກົດ­ໝາຍ​ທີ່​ກ່ຽວ­ຂ້ອງ ໂດຍ​ຈະ​ມີ​ການ​ກຳ­ນົດ​ໃຫ້​ສິດ​ພີ່­ນ້ອງ​ໃກ້­ຊິດ ຜູ້​ເສຍ​ຊີ­ວິດ ໃນ​ການ​ຕັດ­ສິນ​ມອບ​ຊາກ​ສົບ​ຂອງ​ຜູ້​ເສຍ​ຊີ­ວິດ​ໃຫ້​ທາງ​ການ​ແພດ ຄຳ​ວ່າ​ພີ່­ນ້ອງ​ໃກ້­ຊິດ​ໃນ​ກົດ­ໝາຍ​ທີ່​ຈະ​ປັບ­ປຸງ​ໃໝ່​ນີ້ ກວມ​ເອົາ ຜົວ-ເມຍ ພໍ່​ແມ່ ແລະ ບັນ­ດາ​ຜູ້​ເປັນ​ລູກໆ​ທີ່­ຢູ່​ໃນ​ເກນ​ອາ­ຍຸ​ຜູ້​ໃຫຍ່​ແລ້ວ​ຂອງ​ຜູ້​ເສຍ​ຊີ­ວິດ.

    ທີ່ ປະ­ເທດ​ໄທ: ໜັງ­ສື­ພິມ​ວຽງ​ຈັນ​ທາມ (26 ມິ­ຖຸ­ນາ 2019) ໄດ້​ເວົ້າ​ກ່ຽວ​ກັບ​ມາດ​ຕະ­ການ​ລົງ­ໂທດ ໂຊ​ເຟີ ລົດ​ບໍ­ລິ­ການ​ໂດຍ­ສານ​ປະ­ເພດ​ແທັກ​ຊີ (Taxi) ທີ່​ປະ­ຕິ­ເສດ​ລູກ​ຄ້າ ລວມ​ທັງ​ຜູ້​ປະ­ກອບ​ການ​ທີ່​ເປັນ​ເຈົ້າ​ຂອງ​ລົດ​ແທັກ​ຊີ​ຄັນ​ດັ່ງ­ກ່າວ​ອີກ​ດ້ວຍ ຂໍ້​ກຳ­ນົດ​ໂທດ​ໂຊ​ເຟີ ແລະ ເຈົ້າ​ຂອງ​ລົດ​ແທັກ​ຊີ​ໄດ້​ກຳ­ນົດ​ໄວ້ ກົດ­ໝາຍ​ສະ­ບັບ​ປັບ­ປຸງ​ທີ່​ໂຮມ​ເອົາ​ກົດ­ໝາຍ​ວ່າ​ດ້ວຍ​ຍານ­ພາ­ຫະ­ນະ​ທີ 1979 ແລະ ກົດ­ໝາຍ​ການ​ຂົນ­ສົ່ງ​ທາງ­ບົກ ປີ 1979 ເຂົ້າ­ກັນ ຂ່າວ​ບອກ​ວ່າ ກົດ­ໝາຍ​ສະ­ບັບ​ປັບ­ປຸງ​ນີ້ ຍັງ​ຮັກ­ສາ​ບົດ​ລົງ­ໂທດ​ຕໍ່​ຄວາມ​ຜິດ​ຖານ​ປະ­ຕິ­ເສດ​ຜູ້­ໂດຍ­ສານ​ໄວ້​ຄື­ເກົ່າ ແຕ່​ໄດ້​ເພີ່ມ​ມູນ​ຄ່າ​ເງິນ​ປັບ​ໃໝ​ຂຶ້ນ​ຈາກ​ລະ­ດັບ​ສູງ​ສຸດ 2.000 ບາດ ຕາມ​ກົດ­ໝາຍ​ເກົ່າ ມາ​ເປັນ 5.000 ບາດ ການ​ເພີ່ມ​ຄ່າ​ປັບ​ໃໝ​ສຳ­ລັບ​ລົດ​ແທັກ​ຊີ​ທີ່​ປະ­ຕິ­ເສດ​ຜູ້­ໂດຍ­ສານ​ໃນ​ອັດ­ຕາ​ດັ່ງ­ກ່າວ ແມ່ນ​ເພື່ອ​ໃຫ້​ສອດ­ຄ່ອງ​ກັບ​ລະ­ດັບ​ການ​ປັບ​ໃໝ​ລົດ​ໂດຍ­ສານ​ປະ­ເພດ​ອື່ນໆ ເຊັ່ນ: ລົດ​ບັດ​ທົວ ແລະ ລົດ​ຕູ້​ໂດຍ­ສານ​ທາ​ລະ­ນະ ນອກ­ຈາກ​ການ​ໃໝ​ຕໍ່​ຄວາມ​ຜິດ​ຍ້ອນ​ໄດ້​ປະ­ຕິ­ເສດ​ຜູ້­ໂດຍ­ສານ​ແລ້ວ ເຈົ້າ​ໜ້າ­ທີ່​ຍັງ​ມີ​ສິດ​ຢຶດ​ໃບ​ຂັບ​ຂີ່​ໂຊ​ເຟີ​ຜູ້​ກໍ່​ເຫດ​ໄວ້​ເປັນ​ເວ­ລາ 15-30 ວັນ ແລະ ສັ່ງ​ໃຫ້​ຜູ້​ມີ​ຄວາມ​ຜິດ​ເຂົ້າ​ຮັບ​ການ​ອົບ­ຮົມ​ເປັນ​ເວ­ລາ 3 ຊົ່ວ­ໂມງ ກ່ຽວ​ກັບ​ການ​ໃຫ້​ບໍ­ລິ­ການ​ລູກ​ຄ້າ​ອີກ​ດ້ວຍ.

    ທີ່ ມາ​ເລ​ເຊຍ: ມີ​ຂ່າວ​ຈາກ​ມາ​ເລ​ເຊຍ​ວ່າ ນັບ​ແຕ່​ວັນ​ທີ 1 ສິງ­ຫາ ປີ 2017 ເປັນ­ຕົ້ນ​ມາ ນັກ​ທ່ອງ​ທ່ຽວ​ພາຍ​ໃນ ແລະ ນັກ​ທ່ອງ​ທ່ຽວ​ຕ່າງ­ປະ­ເທດ​ໃນ​ມາ​ເລ​ເຊຍ ຕ້ອງ​ໄດ້​ເສຍ​ພາ­ສີ​ການ­ທ່ອງ­ທ່ຽວ (TTx) ຊຶ່ງ​ເກັບ​ຕາມ​ລະ­ດັບ​ໂຮງ­ແຮມ​ທີ່​ນັກ​ທ່ອງ​ທ່ຽວ​ພັກ​ເຊົາ ເຊັ່ນ: ຖ້າ​ເປັນ​ໂຮງ­ແຮມ​ລະ­ດັບ 5 ດາວ ກໍ​ຈະ​ເກັບ 20 ຣິງ​ກິດ​ຕໍ່​ຄືນ 10 ຣິງ​ກິດ ສຳ­ລັບ​ໂຮງ­ແຮມ 4 ດາວ 5 ຣິງ​ກິດ ສຳ­ລັບ​ໂຮງ­ແຮມ​ແຕ່ 1-3 ດາວ ໄດ້​ເປັນ​ຫ້ອງ​ພັກ​ທຳ​ມະ​ດາ (ບໍ່​ມີ​ດາວ) ກໍ​ຈະ​ເກັບ​ພຽງ 2-5 ຣິງ​ກິດ/ຄືນ ໃນ​ກໍ­ລະ­ນີ​ນັກ​ທ່ອງ​ທ່ຽວ​ເລືອກ​ພັກ​ຕາມ​ເຮືອນ​ສ່ວນ​ບຸກ­ຄົນ​ນັ້ນ ຈະ​ຖືກ​ຍົກ­ເວັ້ນ​ການ​ເກັບ​ພາ­ສີ ແຕ່​ມີ​ເງື່ອນ­ໄຂ​ວ່າ ເຮືອນ​ດັ່ງ­ກ່າວ​ຕ້ອງ​ໄດ້​ຂຶ້ນ​ທະ­ບຽນ​ກັບ​ກະ­ຊວງ​ທ່ອງ​ທ່ຽວ ແລະ ວັດ­ທະ­ນະ­ທຳ​ມາ​ເລ​ເຊຍ ເທົ່າ​ນັ້ນ.

ຂ່າວທີ່ກ່ຽວຂ້ອງ