ຂ່າວຫຼ້າສຸດ

ເຮືອບິນ​ຂອງ​ບໍລິສັດ​ການບິນ Lion Air ຕ້ອງ​ປ່ຽນ​ທິດ​ທາງ​ບິນ​ຍ້ອນ​ຄວັນ​ໄຟ​ໜາ​ຕຶບ

187 17 ກ.ຍ. 2019 ຂ່າວຕ່າງປະເທດ
ເຮືອບິນ​ຂອງ​ບໍລິສັດ​ການບິນ Lion Air ຕ້ອງ​ປ່ຽນ​ທິດ​ທາງ​ບິນ​ຍ້ອນ​ຄວັນ​ໄຟ​ໜາ​ຕຶບ

    ຖ້ຽວ​ບິນ​ໝາຍ​ເລກ JT 626 ຂອງ Lion Air ທີ່​ເປັນ​ບໍລິສັດ​ການບິນ​ຂອງ​ພາກ​ເອກະ​ຊົນ​ໃຫຍ່​ສຸດ​ໃນ​ອິນ​ໂດ​ເນ​ເຊຍ ບໍ່​ສາມາດ​ບິນ​ລົງ​ຈອດ​ທີ່​ສະໜາມ​ບິນ​ສາກົນ ຈູ​ວາຕາ (Juwata) ໃນ​ແຂວງ​ກາລີ​ມັນ​ຕັນ​ເໜືອ ຂອງ​ອິນ​ໂດ​ເນ​ເຊຍ ໃນ​ວັນ​ທີ 15 ກັນຍາ​ນີ້ ຍ້ອນ​ເກີດ​ມີ​ສະພາບ​ຄວັນ​ໄຟ​ໜາ​ຕຶບ ເຮັດ​ໃຫ້​ເກີດ​ຜົນ​ກະທົບ​ຕໍ່​ທັດສະນະ​ວິໄສ. ນັກ​ບິນ​ທີ່​ບັງຄັບ​ເຮືອບິນ​ຖ້ຽວ​ດັ່ງກ່າວ ຕ້ອງ​ໄດ້​ຕັດສິນ​ປ່ຽນ​ທິດ​ທາງ​ບິນ ໄປ​ບິນ​ລົງ​ຈອດ​ທີ່​ສະໜາມ​ບິນ​ສາກົນ ເຊ​ປິງ​ການ (Sepinggan) ໃນ ກາລີ​ມັນ​ຕັນ​ຕາເວັນ​ອອກ.

    ໃນ​ຫຼາຍ​ອາທິດ​ທີ່​ຜ່ານ​ມາ ສ່ວນ​ໜຶ່ງ​ຂອງ​ພື້ນ​ທີ່​ເກາະ ສຸ​ມາ​ຕຣາ ແລະ  ກາລີ​ມັນ​ຕັນ ຂອງ​ອິນ​ໂດ​ເນ​ເຊຍ ໄດ້​ຮັບ​ຜົນ​ກະທົບ​ຈາກ​ຝຸ່ນ​ຄວັນ ທີ່​ເກີດ​ຈາກ​ໄຟ​ໄໝ້​ປ່າ. ຝຸ່ນ​ຄັວນ​ໜາ​ຕຶບ ເກີດ​ຈາກ​ໄຟ​ໄໝ້​ປ່າ ກໍ​ເຮັດ​ໃຫ້​ເປັນ​ຜົນ​ສະທ້ອນ​ຕໍ່​ການບິນ ທີ່​ປະກອບ​ມີ​ລວມ​ເຖິງ​ບັນດາ​ຖ້ຽວ​ບິນ​ຈາກ ປາ​ລັງກາ ຣາ​ຢາ ໄປ​ຍັງ​ນະຄອນ​ຕ່າງໆ ເຊັ່ນ ຈາ​ກາ​ຕາ ສຸ​ຣາ​ບາ​ຢາ ຢອກ​ຈາກ​ກາ​ຕາ ແລະ  ໂຊ​ໂລ. ຈາກ​ສະພາບ​ການ​ດັ່ງກ່າວ ກະຊວງ​ສັງຄົມ ຂອງ​ອິນ​ໂດ​ເນ​ເຊຍ ໄດ້​ກະກຽມ​ເຮືອນ​ຢູ່​ສາທາລະນະ​ຈຳນວນ​ໜຶ່ງ ແລະ ບ່ອນ​ອາໄສ​ທີ່​ປອດ​ໄພ ໃຫ້​ແກ່​ປະຊາຊົນ ໂດຍ​ສະເພາະ​ກໍ​ແມ່ນ​ຜູ້​ເຖົ້າ ແລະ ເດັກນ້ອຍ.

    ຂໍ້​ມູນ​ຈາກ​ອົງການ​ອຸຕຸນິຍົມ ອາກາດ ແລະ ພູມ​ສາດ ຟີ​ຊິກ (BMKG) ຂອງ​ອິນ​ໂດ​ເນ​ເຊຍ ໃຫ້​ຮູ້​ວ່າ ໄລ່​ມາ​ຮອດ​ເວລາ​ນີ້ ໄດ້​ກວດ​ພົບ​ມີ​ໄຟ​ໄໝ້​ປ່າ  1.231 ຈຸດ ຢູ່​ເທິງ​ເກາະ ສຸ​ມາ​ຕຣາ ແລະ   1.865 ຈຸດ ຢູ່​ເທິງ​ເກາະ ກາລີ​ມັນ​ຕັນ ຂອງ​ອິນ​ໂດ​ເນ​ເຊຍ ໃນ​ຂະນະ​ທີ່​ມີ 412 ຈຸດ ຢູ່​ເທິງ​ແຫຼມ​ມາ​ເລ​ເຊຍ ແລະ  216 ຈຸດ ຢູ່ ເຊ​ຣາ​ວັກ ແລະ ຊາ​ບາ ຂອງ​ມາ​ເລ​ເຊຍ.

ຂ່າວທີ່ກ່ຽວຂ້ອງ