ອິນ​ເດຍ ​ໃຊ້​ເງິນ​ເກືອບ 10 ຕື້​ໂດ​ລາ ​ເພື່ອ​ຊຸກຍູ້​ຄວາມ​ເຕີບ​ໂຕ​ເສດຖະກິດ

    ທ່ານ​ນາງ ນີ​ມາລາ ຊີ​ທາ​ຣາ​ມານ ລັດຖະມົນຕີ​ກະຊວງ​ການ​ເງິນ​ອິນ​ເດຍ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ ເມື່ອ​ວັນ​ທີ 14 ກັນຍາ​ນີ້ ໂດຍ​ໄດ້​ປະກາດ​ບ້ວງ​ການ​ເງິນ 700 ຕື້​ຣູ​ປີ (ເທົ່າ​ກັບ​ເກືອບ 10 ຕື້​ໂດ​ລາ​ສະຫະລັດ) ເພື່ອ​ຊຸກຍູ້​ໃຫ້​ພື້ນຖານ​ເສດຖະກິດ ພົ້ນ​ຈາກ​ຈັງຫວະ​ຄວາມ​ເຕີບ​ໂຕ​ຕ່ຳ​ທີ່​ສຸດ​ໃນ​ຮອບ 6 ປີ​ທີ່​ຜ່ານ​ມາ.

    ທ່ານ​ນາງ ນີ​ມາລາ ຊີ​ທາ​ຣາ​ມານ ເວົ້າ​ວ່າ ບ້ວງ​ການ​ເງິນ​ດັ່ງກ່າວ ຈະ​ໄດ້​ຈັດ​ສັນ​ໃຫ້​ແກ່​ຂົງເຂດ​ການ​​ຂ​ສົ່ງ​ອອກ​ສິນຄ້າ ແລະ​ອະສັງຫາລິມະ​ຊັບ. ກອງ​ທຶນ​ໜຶ່ງ​ທີ່​ມີ​ມູນ​ຄ່າ 200 ຕື້​ຣູ​ປີ ຈະ​ໄດ້​ຮັບ​ການ​ສ້າງຕັ້ງ ດ້ວຍ​ການ​ທີ່​ລັດຖະບານ​ປະກອບສ່ວນ 50% ເພື່ອ​ສະໜອງ​ທຶນ​ໃຫ້​ແກ່​ບັນດາ​ໂຄງການ​ດ້ານ​ເຮືອນ​ຢູ່ ຖ້າ​ຫາກ​ບໍ່​ຕິດ​ພັນ​ກັບ​ໜີ້​ດ້ອຍ​ຄຸນ​ນະ​ພາບ ຫຼື​ພວມ​ຖືກ​ສານ​ພິຈາລະນາ​ກ່ຽວ​ກັບ​ການ​ຫຼົ້ມ​ລະລາຍ. ກອງ​ທຶນ​ດັ່ງກ່າວ ຈະ​ນຳ​ມາ​ຊຶ່ງ​ຜົນ​ປະໂຫຍດ​ໃຫ້​ແກ່​ຜູ້​ທີ່​ຊື້​ເຮືອນ​ຢູ່​ປະມານ 350.000 ຄົນ.

    ສຳລັບ​ຂົງເຂດ​ການ​ສົ່ງ​ອອກ​ສິນຄ້າ​ນັ້ນ ໂຄງການ​ໃໝ່​ໃນ​ການ​ສົ່ງ​ຄືນ​ພາສີ ທີ່່​ເອີ້ນ​ວ່າ “ຍົກເລີກ​ພັນທະ​ຕໍ່​ສິນຄ້າ​ສົ່ງ​ອອກ” (RoDTEP) ຈະ​ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 1 ມັງກອນ ປີ 2020 ເປັນຕົ້ນ​ໄປ. ໂຄງການ RoDTEP ມີ​ມູນ​ຄ່າ​ປະມານ 500 ຕື້​ຣູ​ປີ ຈະ​ເປັນ​ການ​ສົ່ງເສີມ​ບັນດາ​ຜູ້​ປະກອບ​ການ​ສົ່ງ​ອອກ​ຫຼາຍ​ກວ່າ​ທຸກໆ​ໂຄງການ​ໃນ​ປັດຈຸບັນ​ບວກ​ເຂົ້າກັນ. ບັນດາ​ໂຄງການ​ສົ່ງ​ຄືນ​ພາສີ​ຂອງ​ອິນ​ເດຍ​ໃນ​ປັດຈຸບັນ ມີ​ມູນ​ຄ່າ​ປະມານ 400-450 ຕື້​ຣູ​ປີ.

    ຄຽງ​ຄູ່​ກັນ​ນັ້ນ ລັດຖະບານ​ອິນ​ເດຍ ກໍ​ສະໜອງ​ບ້ວງ​ການ​ເງິນ​ປະຈຳ​ປີ ມູນ​ຄ່າ 17 ຕື້​ຣູ​ປີ ເພື່ອ​ໃຫ້​ບໍລິສັດ​ຄ້ຳປະກັນ​ສິນ​ເຊື່ອ​ການ​ສົ່ງ​ອອກ (ECGC) ສະໜອງ​ການ​ປະກັນ​ໄພ​ທີ່​ສູງ​ກວ່າ ໃຫ້​ແກ່​ບັນດາ​ທະນາຄານ​ທີ່​ປ່ອຍ​ເງິນ​ກູ້​ທຶນ​ຮັບ​ໃຊ້​ໃຫ້​ແກ່​ການ​ສົ່ງ​ອອກ​ສິນຄ້າ.

    ທ່ານ​ນາງ ນີ​ມາລາ ຊີ​ທາ​ຣາ​ມານ ເວົ້າ​ວ່າ ມາດ​ຕະການ​ໃນ​ເທື່ອ​ນີ້ ພ້ອມ​ດ້ວຍ​ບັນດາ​ມາດ​ຕະການ​ທີ່​ໄດ້​ປະກາດ​ໄປ​ໃນ​ສອງ​ເທື່ອ​ທີ່​ຜ່ານ​ມາ ຈະ​ເປັນ​ການ​ຊ່ວຍ​ຊຸກຍູ້​ພື້ນຖານ​ເສດຖະກິດ ແລະ​ຈັງຫວະ​ຄວາມ​ເຕີບ​ໂຕ​ເສດຖະກິດ ທີ່​ຈະ​ໄດ້​ຮັບ​ການ​ແກ້​ໄຂ​ໃນ​ໄຕ​ມາດ​ທີ 2 ຂອງ​ສົກ​ການ​ເງິນ  2019-2020 (ສົກ​ການ​ເງິນ​ຂອງ​ອິນ​ເດຍ ເລີ່ມ​ແຕ່​ວັນ​ທີ 1 ເມສາ ເປັນຕົ້ນ​ໄປ).

    ຄວາມ​ເຕີບ​ໂຕ​ຂອງ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ອິນ​ເດຍ ໄດ້​ຫຼຸດ​ລົງ​ເປັນ​ໄຕ​ມາດ​ທີ​ຫ້າ​ຕິດຕໍ່​ກັນ ໂດຍ​ລົງ​ໄປ​ຍັງ​ເຫຼືອ 5% ໃນ​ໄຕ​ມາດ​ແຕ່​ເດືອນ​ເມສາ ຫາ​ເດືອນ​ມິຖຸນາ ປີ 2019 ຊຶ່ງ​ນັບ​ວ່າ​ເປັນ​ລະດັບ​ຕ່ຳ​ສຸດ​ໃນ​ຮອບ 6 ປີ​ທີ່​ຜ່ານ​ມາ.