ຂ່າວຫຼ້າສຸດ

ໂຮງງານ​ໄຟຟ້າ​ນີວ​ເຄຼຍ​ລອຍ​ແຫ່ງ​ທຳ​ອິດ​ໃນ​ໂລກ​ສິ້ນ​ສຸດ​ການ​ເດີນທາງ​ 5.000 ​ກມ

271 17 ກ.ຍ. 2019 ຂ່າວຕ່າງປະເທດ
ໂຮງງານ​ໄຟຟ້າ​ນີວ​ເຄຼຍ​ລອຍ​ແຫ່ງ​ທຳ​ອິດ​ໃນ​ໂລກ​ສິ້ນ​ສຸດ​ການ​ເດີນທາງ​ 5.000 ​ກມ

    ແຈ້ງ​ການ​ຂອງ​ອົງການ​ພະລັງງານ​ນີວ​ເຄຼຍ​ແຫ່ງ​ລັດ​ຣັດ​ເຊຍ (Rosatom) ໃຫ້​ຮູ້​ວ່າ ໂຮງງານ​ໄຟຟ້າ​ນີວ​ນີວ​ເຄຼຍ​ລອຍ ອາ​ກາ​ເດ​ມິກ ໂລ​ໂມ​ໂນ​ຊອບ (Akademik Lomonosov) ຂອງ​ຣັດ​ເຊຍ ຊຶ່ງ​ເປັນ​ໂຮງງານ​ໄຟຟ້າ​ນີວ​ເຄຼຍ​ລອຍ​ແຫ່ງ​ທຳ​ອິດ​ໃນ​ໂລກ​ນັ້ນ ໄດ້​ເດີນທາງ​ໄປ​ຮອດ​ທ່າ​ກຳປັ່ນ ເປ​ເວັກ (Pevek) ຢູ່​ໃນ​ເຂດ​ຕາເວັນ​ອອກ​ໄກ ທາງ​ທິດຕາເວັນອອກ​ສ່ຽງ​ເໜືອ​ຣັດ​ເຊຍ ເມື່ອ​ວັນ​ທີ 14 ກັນຍາ​ນີ້ ຫຼັງ​ຈາກ​ທີ່​ໄດ້​ເຄື່ອນ​ຕົວ​ອອກ​ຈາກ​ທ່າ​ກຳປັ່ນ ມວກ​ມານ​​ສກ໌ (Murmansk) ໃນ​ເຂດ​ຂົ້ວ​ໂລກ​ເໜືອ ອັນ​ເປັນ​ການ​ສຳເລັດ​ການ​ເດີນທາງ​ຍາວ 5.000​ກມ. ຈາກ​ນັ້ນ ໂຮງງານ​ໄຟຟ້າ​ລອຍ​ດັ່ງກ່າວ ກໍ​ຈະ​ເລີ່ມ ການເຄື່ອນໄຫວ​ພາຍ​ໃນ​ທ້າຍ​ປີ​ນີ້ ຫຼັງ​ຈາກ​ທີ່​ໄດ້​ເຊື່ອມ​ຈອດ​ກັບ​ຕາ​ນ່າງ​ໄຟຟ້າ​ພາຍ​ໃນ​ເຂດ.

    Rosatom ໃຫ້​ຮູ້​ວ່າ ໂຮງງານ​ໄຟຟ້າ​ນີວ​ເຄຼຍ​ລອຍ ອາ​ກາ​ເດ​ມິກ ໂລ​ໂມ​ໂນ​ຊອບ ເປັນ​ວິທີ​ການ​ແກ້​ໄຂ​ແທນ​ທີ່​ທີ່​ງ່າຍດາຍ​ກວ່າ​ການ​ສ້າງ​ໂຮງງານ​ໄຟຟ້າ​ແບບ​ດັ້ງເດີມ​ຢູ່​ເທິງ​ໜ້າດິນ ທີ່​ຖືກ​ປົກ​ຄຸມ​ດ້ວຍ​ນ້ຳ​ແຂງ​ຕະຫຼອດ​ປີ ແລະ​ຄາດ​ວ່າ​ຈະ​ສົ່ງ​ອອກ​ເຕົາ​ປະຕິ​ກອນ​ນີວ​ເຄຼຍ​ຄື​ແນວ​ນັ້ນ ໂດຍ​ທີ່​ເຕົາ​ປະຕິ​ກອນ​ນີວ​ເຄຼຍ​ລອຍ​ນັ້ນ ສາມາດ​ຫຼີກເວັ້ນ​ສຶ​ນາ​ມິ ແລະ​ໄພພິບັດ​ທຳ​ມະ​ຊາດ​ໄດ້.

   ໂຮງງານ​ໄຟຟ້າ​ນີວ​ເຄຼຍ​ລອຍ​ດັ່ງກ່າວ ໄດ້​ຮັບ​ການ​ຕັ້ງ​ຕາມ​ຊື່​ຂອງ​ບັນດິດ ມີ​ຄາ​ອິນ ວາ​ຊີ​ລີ​ເອວິກ ໂລ​ໂມ​ໂນ​ຊອບ (Mikhail Vasilyevich Lomonosov) ເປັນ​ອຸປະກອນ​ກຳເນີດ​ໄຟຟ້າ​ທີ່​ເປັນ​ເອກະລາດ ໄດ້​ຮັບ​ການ​ຜະລິດ​ຄື​ກັບ​ວ່າ​ເປັນ​ກຳປັ່ນ​ລຳ​ໜຶ່ງ ທີ່​ມີ​ຄວາມ​ຍາວ 140 ແມັດ ກວ້າງ 30 ແມັດ ແລະ​ສູງ 10 ແມັດ. Akademik Lomonosov ກໍ​ຍັງ​ສາມາດ​ນຳ​ໃຊ້​ຄື​ກັບ​ວ່າ​ເປັນ​ໂຮງງານ​ແຍກ​ເກືອ ດ້ວຍ​ກຳລັງ​ການ​ຜະລິດ​ນ້ຳ​ຈືດ​ໄດ້ 240.000ມ3/ວັນ.

    ໂຮງງານ​ດັ່ງກ່າວ ຈະ​ເຄື່ອນ​ໄຫວ​ຢູ່​ໃນ​ເຂດ​ເໜືອ​ໄກ ແລະ​ຕາເວັນ​ອອກ​ໄກ ຂອງ​ຣັດ​ເຊຍ ຊຶ່ງ​ເປົ້າ​ໝາຍ​ຕົ້ນຕໍ​ກໍ​ແມ່ນ ສະໜອງ​ໄຟຟ້າ​ໃຫ້​ແກ່​ບັນດາ​ວິ​ສາ​ຫະ​ກິດ ເຂດ​ອຸດສາຫະກຳ​ທີ່​ຕັ້ງ​ຢູ່​ໃນ​ເຂດ​ຫ່າງ​ໄກ​ບັນດາ​ນະຄອນ​ທ່າ​ກຳປັ່ນ ກໍ​ຄື​ບັນດາ​ຖານ​ເຈາະ​ນ້ຳມັນ-ແກ​​ັສ ຢູ່​ນອກ​ຝັ່ງ​ທະເລ. ຄາດ​ວ່າ Akademik Lomonosov ຈະ​ສະໜອງ​ໄຟຟ້າ​ຢ່າງ​ພຽງພໍ ໃຫ້​ແກ່​ປະມານ 100.000 ຄົນ ເປັນ​ການ​ຊ່ວຍ​ປະຢັດ​ຖ່ານ​ຫີນ 200.000 ໂຕນ ແລະ​ເຊື້ອ​ໄຟ 100.000 ໂຕນ ໃນ​ແຕ່​ລະ​ປີ. ການເຄື່ອນໄຫວ​ຂອງ Akademik Lomonosov ຢູ່​ທີ່​ປະມານ 40 ປີ.

ຂ່າວທີ່ກ່ຽວຂ້ອງ