ອາ​ຣາ​ບີ ຊາ​ອຸ​ດິດ ງົດ​ການ​ຜະລິດ​ນ້ຳມັນ​ເປັນ​ການ​ຊົ່ວຄາວ​ ຢູ່​ໃນ​ບັນດາ​ພື້ນຖານ​ທີ່​ຖືກ​ໂຈມ​ຕີ

   ອາ​ຣາ​ບີ ຊາ​ອຸ​ດິດ ແຈ້ງ​ໃຫ້​ຮູ້ເມື່ອ​ວັນ​ທີ 14 ກັນຍາ​ທີ່​ຜ່ານ​ມາ ກ່ຽວ​ກັບ​ການ​ງົດ​ການ​ຜະລິດ​ນ້ຳມັນ​ເປັນ​ການ​ຊົ່ວຄາວ ຢູ່​ໃນ​ພື້ນຖານ​ການ​ຜະລິດ​ນ້ຳມັນ 2 ແຫ່ງ ຂອງ ອາ​ຣາມ​ໂກ (Aramco) ທີ່​ຖືກ​ກອງ​ກຳລັງ​ມື​ປືນ ຮູ​ຕີ ໂຈມ​ຕີ.

    ສຳນັກ​ຂ່າວສານ SPA ອ້າງ​ຕາມ​ຖະແຫຼງການ​ຂອງ​ທ່ານ ອັບ​ດູນ​ລາ​ຊິ​​ສ ບິນ ຊານ​ມານ ລັດຖະມົນຕີ​ພະລັງງານ​ຂອງ​ອາ​ຣາ​ບີ ຊາ​ອຸ​ດິດ ໃຫ້​ຮູ້​ວ່າ ການ​ໂຈມ​ຕີ​ດັ່ງກ່າວ ໄດ້​ເຮັດ​ໃຫ້ການ​ຜະລິດ​ຢູ່​ໃນ​ໂຮງງານ​ໃນ​ນະຄອນ Abqaia ແລະ Khurais ຕ້ອງ​ໄດ້​ງົດ​ເປັນ​ການ​ຊົ່ວຄາວ ສົ່ງ​ຜົນ​ໃຫ້​ປະລິມານ​ການ​ຜະລິດ​ນ້ຳມັນ​ຂອງ Aramco ຫຼຸດ​ລົງ​ໄປ 50%. ໃນ​ຂະນະ​ດຽວ​ກັນ ແຈ້ງ​ການ​ທີ່​ມີ​ອອກ​ມາ​ຫຼັງ​ຈາກ​ນັ້ນ Aramco ກໍ​ໄດ້​ຢັ້ງຢືນ​ວ່າ ປະລິມານ​ການ​ຜະລິດ​ນ້ຳມັນ​ດິບ​ຂອງ​ບໍລິສັດ​ນີ້ ຫຼຸດ​ລົງ 5,7 ລ້ານ​ບາ​ເຣນ/ວັນ.

    ກ່ອນ​ໜ້າ​ນັ້ນ ໃນ​ວັນ​ດຽວ​ກັນ ກຸ່ມ​ມື​ປືນ ຮູ​ຕີ (Houthi) ຢູ່​ໃນ​ປະເທດ​ເຢ​ແມນ ໄດ້​ກ່າວ​ຍອມຮັບ​ວ່າ​ເປັນ​ຝ່າຍ​ໂຈມ​ຕີ ໂດຍ​ໃຊ້​ເຮືອບິນ​ແບບ​ບໍ່​ມີ​ຄົນ​ຂັບ ແນໃສ່​ໂຮງງານ 2 ແຫ່ງ ຂອງ Aramco ຢູ່​ໃນ​ນະຄອນ ອັບ​ກາ​ຢາ ແລະ ກູ​ຣາຍ​​ສ ຂອງ​ອາ​ຣາ​ບີ ຊາ​ອຸ​ດິດ. ໂທລະພາບ​ຊ່ອງ​ດາວ​ທຽມ Al-Masirah ຂອງ​ຮູ​ຕີ ໃຫ້​ຮູ້​ວ່າ ກອງ​ກຳລັງ​ຂອງ​ຕົນ​ໄດ້​ເປີດ​ບັ້ນ​ໂຈມ​ຕີ​ຂະໜາດ​ໃຫຍ່ ປະກອບ​ມີ​ເຮືອບິນ​ແບບ​ບໍ່​ມີ​ຄົນ​ຂັບ 10 ລຳ ໂດຍ​ແນໃສ່​ພື້ນຖານ​ການ​ຜະລິດ​ນ້ຳມັນ 2 ແຫ່ງ​ດັ່ງກ່າວ.

    ໃນ​ຂະນະ​ດຽວ​ກັນ ທ່ານ ອັບ​ດູນ​ລາ​ຊິ​​ສ ບິນ ຊານ​ມານ ແຈ້ງ​ໃຫ້​ຮູ້ເມື່ອ​ວັນ​ທີ 15 ກັນຍາ​ນີ້ ວ່າ ອາ​ຣາ​ບີ ຊາ​ອຸ​ດິດ ຈະ​ນຳ​ໃຊ້​ສາງ​ນ້ຳມັນ​ສຳຮອງ ເພື່ອ​ທົດ​ແທນ​ໃຫ້​ແກ່​ການເຄື່ອນໄຫວ​ຜະລິດ​ທີ່​ຖືກ​ຂາດ​ໄລຍະ​ໄປ ຫຼັງ​ເກີດ​ການ​ໂຈມ​ຕີ​ໃສ່​ໂຮງງານ​ກັ່ນ​ນ້ຳມັນ​ສອງ​ແຫ່ງ​ດັ່ງກ່າວ ເຮັດ​ໃຫ້​ປະລິມານ​ການ​ຜະລິດ​ນ້ຳມັນ​ຫຼຸດ​ລົງ 50%. 

    ອາ​ຣາ​ບີ ຊາ​ອຸ​ດິດ ໄດ້​ກໍ່ສ້າງ​ພື້ນຖານ​ສະ​ສົມ​ນ້ຳມັນ​ໃຕ້​ດິນ 5 ແຫ່ງ ຢູ່​ໃນ​ຫຼາຍ​ເຂດ​ທີ່​ແຕກ​ຕ່າງ​ກັນ​ໃນ​ທົ່ວ​ປະເທດ ໂດຍ​ສາມາດ​ບັນຈຸ​ນ້ຳມັນ​ສຳເລັດ​ຮູບ​ຊະນິດ​ຕ່າງໆ​ໄດ້​ຫຼາຍ​ສິບ​ລ້ານ​ບາ​ເຣນ ເພື່ອ​ນຳ​ໃຊ້​ໃນ​ກໍລະນີ​ເກີດ​ວິ​ກິດ​ການ. ພື້ນຖານ​ສະ​ສົມ​ນ້ຳມັນ​ດັ່ງກ່າວ ໄດ້​ຮັບ​ການ​ກໍ່ສ້າງ​ແຕ່​ປີ 1988 ຮອດ​ປີ 2009 ດ້ວຍ​ມູນ​ຄ່າ​ການ​ກໍ່ສ້າງ​ຫຼາຍ​ສິບ​ຕື້​ໂດ​ລາ​ສະຫະລັດ.