ປະທານປະເທດ ຕ້ອນຮັບທູດເຂົ້າຍື່ນສານຕາຕັ້ງ ແລະ ມອບສານແຕ່ງຕັ້ງໃຫ້ທູດລາວ

547 16 ກ.ຍ. 2019 ຂ່າວໜ້າ​ໜຶ່ງ
ປະທານປະເທດ ຕ້ອນຮັບທູດເຂົ້າຍື່ນສານຕາຕັ້ງ ແລະ ມອບສານແຕ່ງຕັ້ງໃຫ້ທູດລາວ

    ວັນ​ທີ 13 ກັນ­ຍາ 2019 ທີ່​ທຳ​ນຽບ​ປະ­ທານ​ປະ­ເທດ ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ໄດ້​ຕ້ອນ­ຮັບບັນ­ດາ​ທູດ​ປະ­ເທດ​ເພື່ອນ​ມິດ​ເຂົ້າ​ຍື່ນ​ສານ​ຕາ​ຕັ້ງ ແລະ ມອບ​ສານ​ແຕ່ງ­ຕັ້ງ​ໃຫ້​ທູດ​ລາວ​ໄປ​ປະ­ຈຳ​ຢູ່​ຕ່າງ­ປະ­ເທດ​ດັ່ງ­ນີ້:

    ເວ­ລາ 8:30 ໂມງ ໄດ້​ຕ້ອນ­ຮັບ​ທ່ານ​ນາງ Leow Siu Lin  ເຂົ້າ​ຍື່ນ​ສານ​ຕາ​ຕັ້ງ​ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ​ແຫ່ງ​ສາ­ທາ­ລະ­ນະ​ລັດ​ສິງ­ກະ­ໂປ ປະ­ຈຳ​ລາວ ມີ​ສຳ­ນັກ­ງານ​ສະ­ຖານ­ທູດ​ຕັ້ງ​ຢູ່​ນະ­ຄອນ­ຫຼວງ​ວຽງ​ຈັນ ລາວ-ສິງ­ກະ­ໂປ ໄດ້​ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 2 ທັນ­ວາ 1974 ກ່ອນ​ມາ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ​ໄດ້​ດຳ­ລົງ​ຕຳ­ແໜ່ງ​ເປັນ​ກົງ­ສຸນ​ໃຫຍ່​ທີ່​ສະ­ຖານ​ກົງ­ສຸນ​ສິງ­ກະ­ໂປ ມີ​ສຳ­ນັກ­ງານ​ໃຫຍ່​ຕັ້ງ​ຢູ່​ນະ­ຄອນ​ໂຮ່​ຈີ​ມິງ ສສ ຫວຽດ­ນາມ.

    ເວ­ລາ 9:00 ໂມງ ໄດ້​ຕ້ອນ­ຮັບ​ທ່ານ John Pearsou ເຂົ້າ​ຍື່ນ​ສານ​ຕາ​ຕັ້ງ​ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ຣາ​ຊະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ​ແຫ່ງ​ຣາ​ຊະ​ອາ­ນາ­ຈັກ​ອັງ­ກິດ ປະ­ຈຳ​ລາວ ມີ​ສະ­ຖານ­ທູດ​ຕັ້ງ​ຢູ່​ນະ­ຄອນ­ຫຼວງ​ວຽງ​ຈັນ ລາວ-ອັງ­ກິດ ໄດ້​ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 5 ກັນ­ຍາ 1955 ກ່ອນ​ມາ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ​ໄດ້​ດຳ­ລົງ​ຕຳ­ແໜ່ງ​ເປັນ​ຮອງ​ຫົວ­ໜ້າ​ກົມ​ອາ­ຊີ​ຕາ­ເວັນ​ອອກ​ສຳ­ນັກ­ງານ​ຕ່າງ­ປະ­ເທດ ແລະ ເຄືອ​ຈັກ­ກະ​ພົບ (FCO).

ເວ­ລາ 9:30 ໂມງ ໄດ້​ຕ້ອນ­ຮັບ​ທ່ານ Keiz໐ TaKewaka ເຂົ້າ​ຍື່ນ​ສານ​ຕາ​ຕັ້ງ​ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ຣາ​ຊະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ​ແຫ່ງ​ຍີ່­ປຸ່ນ ປະ­ຈຳ​ລາວ ມີ​ສຳ­ນັກ­ງານ​ສະ­ຖານ­ທູດ​ຕັ້ງ​ຢູ່​ນະ­ຄອນ­ຫຼວງ​ວຽງ​ຈັນ ລາວ-ຍີ່­ປຸ່ນ ໄດ້​ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 5 ມີ­ນາ 1955 ກ່ອນ​ມາ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ​ໄດ້​ດຳ­ລົງ​ຕຳ­ແໜ່ງ​ເປັນ​ກົງ­ສຸນ​ໃຫຍ່​ສະ­ຖານ​ກົງ­ສຸນ​ໃຫຍ່​ຍີ່­ປຸ່ນ​ທີ່ Sydney ປະ­ເທດ​ອົດ​ສະ​ຕຣາ​ລີ.

    ເວ­ລາ 10:00 ໂມງ ໄດ້​ຕ້ອນ­ຮັບ​ທ່ານ Jean-Paul Senninger ເຂົ້າ​ຍື່ນ​ສານ​ຕາ​ຕັ້ງ​ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ຣາ​ຊະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ​ແຫ່ງ​ຣາ​ຊະ​ອາ­ນາ­ຈັກ​ລຸກ​ຊຳ​ບວກ ປະ­ຈຳ​ລາວ ມີ​ສຳ­ນັກ­ງານ​ສະ ຖານ​ທູດ​ຕັ້ງ​ຢູ່​ບາງ­ກອກ ປະ­ເທດ​ໄທ ລາວ-ລຸກ​ຊຳ​ບວກ ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 25 ກັນ­ຍາ 1997 ກ່ອນ​ມາ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ​ດຳ­ລົງ​ຕຳ­ແໜ່ງ​ເປັນ​ເລ­ຂາ­ທິ­ການ​ໃຫຍ່​ຂອງ​ລັດ­ຖະ­ບານ.

    ເວ­ລາ 10:30 ໂມງ ໄດ້​ມອບ​ສານ​ແຕ່ງ­ຕັ້ງ​ໃຫ້​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ ຕ່າງ­ປະ­ເທດ ເປັນ​ເອກ​ອັກ​ຄະ​ລັດ​ຖະ​ທູດ​ລາວ​ປະ­ຈຳ ສສ ຫວຽດ­ນາມ ທ່ານ​ນາງ ຄຳ​ເພົາ ເອີນ​ທະ​ວັນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ເປັນ​ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ ສປ ຈີນ ທ່ານ ພົມ­ມາ ສິດ​ເສ­ນາ ຫົວ­ໜ້າ​ກົມ​ເອີ​ຣົບ-ອາ​ເມ​ຣິ​ກາ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ເປັນ​ເອກ​ອັກ​ຄະ​ລັດ​ຖະ​ທູດ​ລາວ​ປະ­ຈຳ​ອິນ​ໂດ​ເນ​ເຊຍ ທ່ານ ອາ­ນຸ­ພາບ ວົງ​ໜໍ່​ແກ້ວ ຫົວ­ໜ້າ​ກົມ​ອົງ​ການ­ຈັດ­ຕັ້ງ​ສາ­ກົນ ເປັນ​ເອກ​ອັກ​ຄະ​ລັດ​ຖະ​ທູດ​ຜູ້­ຕາງ­ໜ້າ​ຖາ­ວອນ​ແຫ່ງ ສປປ ລາວ ປະ­ຈຳ​ສະ­ຫະ​ປະ­ຊາ​ຊາດ ທີ່​ນິວ​ຢອກ ປະ­ເທດ​ສະ­ຫະ­ລັດ​ອາ​ເມ​ຣິ​ກາ ແລະ ທ່ານ ບຸນ​ລຽບ ຮຸ່ງ​ວົງ​ສອນ ຮອງ​ຫົວ­ໜ້າ​ກົມ​ອາ­ຊີ​ປາ​ຊີ​ຟິກ ແລະ ອາ​ຟຣິ​ກາ ກະ­ຊວງ​ການ​ຕ່າງ­ປະ­ເທດ ເປັນ​ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ​ຊູ​ແອດ.

    ໂອ­ກາດ​ນີ້ ທ່ານ​ປະ­ທານ​ປະ­ເທດ​ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ ແລະ ຕີ​ລາ­ຄາ​ສູງ​ຕໍ່​ບັນ­ດາ​ທູດ​ປະ­ເທດ​ເພື່ອນ​ມິດ​ຕ່າງໆ​ ທີ່​ໄດ້​ຖືກ​ແຕ່ງ­ຕັ້ງ​ມາ​ດຳ­ລົງ​ຕຳ­ແໜ່ງ​ເປັນ​ທູດ​ຄົນ​ໃໝ່​ປະ­ຈຳ​ລາວ​ຄັ້ງ​ນີ້ ພ້ອມ​ທັງ​ໄດ້​ແຈ້ງ​ສະ­ພາບ​ການ​ພັດ ທະ​ນາ​ພື້ນ­ຖານ​ໂຄງ​ລ່າງ​ຕ່າງໆ​ຂອງ​ລາວ​ໃຫ້​ທ່ານ​ທູດ​ຊາບ ແລະ ຫວັງ​ວ່າ​ຕະ­ຫຼອດ​ໄລ­ຍະ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ​ທູດ​ຈະ​ປະ­ກອບ­ສ່ວນ​ເສີມ​ສ້າງ​ສາຍ​ພົວ­ພັນ​ຮ່ວມ​ມື ​ທີ່​ມີ​ໃຫ້​ນັບ​ມື້​ຂະ­ຫຍາຍ­ຕົວ​ຂຶ້ນ​ໄປ​ເລື້ອຍໆ ລັດ­ຖະ­ບານ ແລະ ປະ­ຊາ­ຊົນ​ລາວ​ພ້ອມ​ແລ້ວ​ທີ່​ຈະ​ອຳ­ນວຍ​ຄວາມ​ສະ­ດວກ​ ໃຫ້​ບັນ­ດາ​ທູດ​ໃນ​ການ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ​ໃຫ້​ປະ­ສົບ​ຜົນ­ສຳ­ເລັດ ​ເພື່ອ​ເພີ່ມ​ພູນ​ຄູນ​ສ້າງ​ສາຍ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ປະ­ເທດ ​ໃຫ້​ແໜ້ນ​ແຟ້ນ​ຍິ່ງ​ຂຶ້ນ ພ້ອມ​ທັງ​ອວຍ­ພອນ​ໃຫ້​ທູດ​ຈົ່ງ​ປະ­ສົບ​ຜົນ­ສຳ­ເລັດ​ໃນ​ການ​ປະ­ຕິ­ບັດ​ໜ້າ­ທີ່​ອັນ​ມີ​ກຽດ​ຢູ່​ລາວ​ຄັ້ງ​ນີ້​ຕື່ມ​ອີກ.

ຂ່າວທີ່ກ່ຽວຂ້ອງ