ສະຫຼອງວັນສະຖາປະນາ ສປ ຈີນ ຄົບຮອບ 70 ປີ

259 16 ກ.ຍ. 2019 ຂ່າວໜ້າ​ໜຶ່ງ
ສະຫຼອງວັນສະຖາປະນາ ສປ ຈີນ ຄົບຮອບ 70 ປີ

    ສະມາຄົມ​ລວມ​ຈີນ​ດຽວ​ດ້ວຍ​ສັນຕິ ສະມາຄົມ​ການ​ຄ້າ​ຈີນ ແລະ ສະພາ​ການ​ຄ້າ​ຊາວ​ຈີນ​ຕ່າງ​ດ້າວ ປະຈຳ ​ສປປ ລາວ ຮ່ວມ​ກັບ​ສະມາຄົມ​ຊາວ​ຈີນ​ພົ້ນ​ທະເລ ແລະ ຄະນະ​ນັກທຸລະກິດ​ຈີນ ປະຈຳ ​ສປປ ລາວ ຈັດ​ງານ​ລ້ຽງ​ສະເຫຼີມສະຫຼອງ​ວັນ​ສະຖາປະນາ ​ສປ ຈີນ ຄົບຮອບ 70 ປີ ແລະ ບຸນ​ປະເພນີ​ໄຫວ້​ພະຈັນ​ຂອງ​ຈີນ ຂຶ້ນ​ວັນ​ທີ 12 ກັນຍາ 2019 ຢູ່​ໂຮງແຮມ​ແລນ​ມາກ ໂດຍ​ມີ​ທ່ານ ໄຊ​ສົມ​ພອນ ພົມວິຫານ ປະທານ​ສູນ​ກາງ​ແນວ​ລາວ​ສ້າງ​ຊາດ ທ່ານ ແສງ​ນວນ ໄຊ​ຍະ​ລາດ ຮອງ​ປະທານ​ສະພາ​ແຫ່ງ​ຊາດ ທ່ານ ຈ່ຽງ ຈ້າຍ​ຕົງ ເອກ​ອັກ​ຄະ​ລັດ​ຖະ​ທູດ ​ສປ ຈີນ ປະຈຳ ​ສປປ ລາວ ພ້ອມ​ດ້ວຍ​ການ​ນຳ​ພັກ-ລັດ ແລະ ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ ເລັ່ງ ສະຫວັນ​ວາລີ ປະທານ​ສະມາຄົມ​ລວມ​ຈີນ​ດຽວ​ດ້ວຍ​ສັນຕິ ກ່າວ​ວ່າ: 70 ປີ​ກ່ອນ​ໜ້າ​ນີ້ ພັກ​ກອມ​ມູ​ນິດ​ຈີນ ໄດ້​ນຳພາ​ນັກ​ປະຕິວັດ​ຊົນ​ຊັ້ນ​ກຳມະກອນ​ຮຸ່ນ​ກ່ອນ ແລະ ປະຊາຊົນ​ຈີນ​ທັງ​ຊາດ​ຜາບ​ແພ້​ລັດທິ​ຈັກກະພັດ​ຜູ້​ຮຸກ​ຮານ ໂຄ່ນ​ລົ້ມ​ການ​ກົດ​ຂີ່​ຂູດ​ຮີດ​ຂອງ​ລັດທິ​ຈັກກະພັດ​ທຶນ​ນິຍົມ ລັດທິ​ສັກ​ດີ​ນາ ແລະ ລັດທິ​ຂຸນ​ເສິກ​ທຶນ​ນິຍົມ ຍາດ​ໄດ້​ໄຊຊະນະ​ແຫ່ງ​ການ​ປະຕິວັດ ແລະ ສ້າງສາ​ປະເທດ​ຈີນ​ໃໝ່ ໃນ​ຊາກ​ຫັກ​ພັງ​ຫຼັງ​ສົງຄາມ ເຮັດ​ໃຫ້​ປະຊາຊົນ​ຈີນ​ໄດ້​ເປັນ​ເຈົ້າ​ຂອງ​ປະເທດ​ຊາດ​ຢ່າງ​ແທ້​ຈິງ ແລະ ສ້າງ​ໂລກ​ໃໝ່​ແຫ່ງ​ສັງຄົມ​ນິຍົມ 70 ປີ ຜ່ານ​ມາ​ຊົນ​ຊາດ​ຈີນ​ໄດ້​ປ່ຽນ​ຈາກ​ຄວາມ​ອ່ອນແອ ກ້າວ​ສູ່​ຄວາມ​ເຂັ້ມແຂງ ຮັ່ງມີ ການ​ພັດທະນາ​ປະເທດ​ໄດ້​ມີ​ການ​ປ່ຽນແປງ​ແບບ​ພິກ​ຟ້າ​ປີ້ນ​ແຜ່ນດິນ ຫຼຸດ​ພົ້ນ​ອອກ​ຈາກ​ຄວາມ​ດ້ອຍ​ພັດທະນາ ໂດຍ​ສະເພາະ 40 ປີ​ຫຼັງ​ການ​ປະຕິ​ຮູບ ແລະ ເປີດ​ປະຕູ​ສູ່​ພາຍ​ນອກ ຈີນ​ໄດ້​ກາຍເປັນ​ປະເທດ​ທີ່​ມີ​ເສດຖະກິດ​ໃຫຍ່​ອັນ​ດັບ​ທີ 2 ຂອງ​ໂລກ ພາຍຫຼັງ​ກອງ​ປະຊຸມ​ໃຫຍ່ ຄັ້ງ​ທີ 18 ຂອງ​ພັກ​ກອມ​ມູ​ນິດ​ຈີນ​ເປັນຕົ້ນ​ມາ ພາຍ​ໃຕ້​ການ​ຊີ້​ນຳ-ນຳພາ​ຢ່າງ​ເຂັ້ມແຂງ​ຂອງ​ສູນ​ກາງ​ພັກ​ກອມ​ມູ​ນິດ​ຈີນ ເຊິ່ງ​ມີ​ປະທານ ສີ ຈິ້ນ​ຜິງ ເປັນ​ແກນ​ນຳ ລະດັບ​ການເມືອງ ເສດຖະກິດ ການ​ປ້ອງ​ກັນ​ຊາດ ວິທະຍາສາດ-ເຕັກນິກ ແລະ ວັດທະນະທຳ​ຂອງ​ຈີນ ກໍ​ຄື ພາບ​ພົດ-ຈິດໃຈ​ຂອງ​ຊາວ​ຈີນ​ລ້ວນ​ແຕ່​ໄດ້​ຮັບ​ການ​ພັດທະນາ​ດີ​ຂຶ້ນ ກຳລັງ​ແຮງ​ຂອງ​ຊາດ​ໄດ້​ຮັບ​ການ​ຍົກ​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ ຍຸດ​ທະ​ສາດ “ໜຶ່ງ​ແລວ ໜຶ່ງ​ເສັ້ນທາງ” ໄດ້​ຮັບ​ໝາກຜົນ​ຢ່າງ​ໂດດ​ເດັ່ນ ປະເທດ​ຈີນ​ເປັນ​ປະເທດ​ໃຫຍ່​ທີ່​ມີ   ຄວາມ​ຮັບຜິດຊອບ​ກວ່າ​ໝູ່​ໃນ​ໂລກ ແລະ ໄດ້​ປະກອບສ່ວນ​ສຳຄັນ​ໃນ​ການ​ສ້າງ​ຄູ່​ຮ່ວມ​ຊະ​ຕາ​ກຳ​ຂອງ​ມວນ​ມະນຸດ.

    ລາວ ແລະ ຈີນ ມີ​ສາຍ​ນ້ຳ ແລະ ພູຜາ​ຕິດ​ຈອດ​ກັນ ໃນ​ຊຸມ​ປີຜ່ານມາ​ພາຍ​ໃຕ້​ການ​ຊຸກຍູ້​ຂອງ​ການ​ນຳ​ທັງ​ສອງ​ປະເທດ ການ​ຮ່ວມ​ມື​ດ້ານ​ເສດຖະກິດ-ການ​ຄ້າ ການ​ລົງທຶນ ການ​ສຶກ​ສາ ວັດທະນະທຳ ແລະ ການ​ທ່ອງ ທ່ຽວ ລະຫວ່າງ​ສອງ​ປະເທດ​ໄດ້​ຮັບ​ການ​ພັດທະນາ​ຢ່າງ​ບໍ່​ຢຸດ​ຢັ້ງ ການ​ແລກປ່ຽນ​ສອງ​ຝ່າຍ​ໄດ້​ເພີ່ມ​ຂຶ້ນ​ຢ່າງ​ວ່ອງໄວ ການ​ພົວພັນ​ລາວ-ຈີນ ໄດ້​ເຂົ້າ​ສູ່​ຍຸກ​ທີ່​ດີ​ທີ່​ສຸດ​ໃນ​ປະຫວັດສາດ ລາວ-ຈີນ ໄດ້​ເປັນ​ຄູ່​ຮ່ວມ​ຊະ​ຕາ​ກຳ​ແບບ “ເພື່ອນ​ບ້ານ​ທີ່​ດີ ເພື່ອນ​ມິດ​ທີ່​ດີ ສະຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ” ຢ່າງ​ແທ້​ຈິງ 1 ປີຜ່ານມາ​ພາຍ​ໃຕ້​ການ​ຊີ້​ນຳ-ນຳພາ​ອັນ​ປີ​ຊາ​ສາມາດ​ຂອງ​ພັກ ແລະ ລັດຖະບານ​ລາວ ໂດຍ​ການ​ສະໜັບສະໜູນ ແລະ ອຳນວຍ​ຄວາມ​ສະດວກ​ຂອງ​ພາກສ່ວນ​ກ່ຽວຂ້ອງ ຊາວ​ຈີນ​ພວກ​ເຮົາ​ໄດ້​ຢຶດ​ໝັ້ນ ເຄົາລົບ ແລະ ປະຕິບັດ​ລະບຽບ​ກົດ ໝາຍ ແລະ ຮີດຄອງ​ປະເພນີ​ລາວ ເປັນ​ເຈົ້າ​ການ​ເຂົ້າ​ຮ່ວມ​ການ​ສ້າງສາ​ພັດທະນາ​ເສດຖະກິດ-ສັງຄົມ​ຂອງ​ລາວ ເຊິ່ງ​ການ​ລົງທຶນ ແລະ ດຳເນີນ​ທຸລະ​ກິດ​ຂອງ​ພວກ​ເຮົາ ສາມາດ​ສ້າງ​ວຽກ​ເຮັດ​ງານ​ທຳ​ໃຫ້​ປະຊາຊົນ​ທ້ອງຖິ່ນ ປະກອບສ່ວນ​ອັນ​ແນ່ນອນ​ໃນ​ການ​ພັດທະນາ​ເສດຖະກິດ​ແຫ່ງ​ຊາດ​ລາວ ໃຫ້​ຈະເລີນ​ຮຸ່ງເຮືອງ ນອກ​ນີ້ ຍັງ​ໄດ້​ເປັນ​ເຈົ້າ​ການ​ເຂົ້າ​ຮ່ວມ​ພັດທະນາ​ວຽກ​ງານ​ສຶກ​ສາ ສະຫວັດດີ​ການ-ສັງຄົມ ແລະ ການ​ກຸສົນ.

ຂ່າວທີ່ກ່ຽວຂ້ອງ