ເຊີນຊວນຮ່ວມບໍລິຈາກເລືອດ ໃນຫົວຂໍ້ ຄົນລາວບໍ່ຖິ້ມກັນ

160 16 ກ.ຍ. 2019 ຂ່າວໜ້າ​ໜຶ່ງ

    ສູນ​ເລືອດ​ແຫ່ງ​ຊາດ​ ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ວຽກ​ງານ​ຈັດ​ກິດ­ຈະ­ກຳ​ຮັບ​ບໍ­ລິ­ຈາກ​ເລືອດ ເພື່ອ​ຊ່ວຍ­ເຫຼືອ​ສັງ­ຄົມ​ຂຶ້ນ ວັນ​ທີ 12 ກັນ­ຍາ 2019 ຢູ່​ສູນ ເລືອດ​ແຫ່ງ​ຊາດ ອົງ­ການ​ກາ­ແດງ​ລາວ ເປັນ​ປະ­ທານ​ຂອງ​ທ່ານ ຈັນ­ທະ​ລາ ສຸກ​ສາ­ຄອນ ຫົວ­ໜ້າ​ສູນ​ເລືອດ​ແຫ່ງ​ຊາດ ອົງ­ການ​ກາ­ແດງ​ລາວ ມີ​ຜູ້​ບໍ­ລິ­ຫານ​ການ​ສຶກ​ສາ​ຈາກ​ສະ​ຖາ​ບັນ​ການ​ສຶກ​ສາ ແລະ ຜູ້​ປະ­ສານ​ງານ​ການ​ບໍ­ລິ­ຈາກ​ເລືອດ​ຈາກ​ພາກ­ສ່ວນ​ຕ່າງໆ ເຂົ້າ​ຮ່ວມ.

    ກອງ​ປະ­ຊຸມ ທ່ານ ແພງ​ທອງ ບານ​ຈັນ­ທະ​ວົງ ຮອງ​ຫົວ­ໜ້າ​ສູນ​ເລືອດ​ແຫ່ງ​ຊາດ ໄດ້​ຍົກ​ໃຫ້​ເຫັນ​ການ​ປະ­ກອບ­ສ່ວນ​ຂອງ​ສັງ­ຄົມ ແລະ ບຸກ­ຄົນ ໃນ​ການ​ບໍ­ລິ­ຈາກ​ເລືອດ​ໄລ­ຍະ​ຜ່ານ​ມາ ໂດຍ​ສະ­ເພາະ ບົດ­ຮຽນ​ການ​ຈັດ​ກິດ­ຈະ­ກຳ​ຮັບ​ບໍ­ລິ­ຈາກ​ເລືອດ​ເດືອນ​ກຸມ­ພາ 2019 ສະ­ເພາະ​ການ​ປະ­ກອບ­ສ່ວນ​ຂອງ ພາກ­ສ່ວນ​ພະ­ນັກ­ງານ​ຄູ-ອາ ຈານ ແລະ ຊາວ​ໜຸ່ມ​ນັກ­ຮຽນ 24 ແຫ່ງ ຂອງ​ນະ­ຄອນ­ຫຼວງ​ວຽງ​ຈັນ ມີ​ຜູ້​ເຂົ້າ​ຮ່ວມ 662 ຄົນ ແຕ່​ຜູ້​ສາ­ມາດ​ປະ­ກອບ­ສ່ວນ​ບໍ­ລິ­ຈາກ​ເລືອດ 438 ຄົນ ສະ­ເພາະ​ກິດ­ຈະ­ກຳ​ພິ­ເສດ​ທີ່​ຈະ​ຈັດ​ຂຶ້ນ​ຄັ້ງ​ນີ້​ເພື່ອ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ແລະ ພະ­ຍາດ​ໄຂ້­ເລືອດ­ອອກ ລວມ​ທັງ​ປະ­ກອບ­ສ່ວນ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ສຳ­ຄັນ​ຕ່າງໆ​ຂອງ​ຊາດ ເປົ້າ​ໝາຍ​ເຊີນ​ເຂົ້າ​ຮ່ວມ 10 ພາກ­ສ່ວນ​ຄື: ພາກ­ສ່ວນ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ບັນ­ດາ​ກະ­ຊວງ​ອ້ອມ​ຂ້າງ​ສູນ​ກາງ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ​ສຸ­ຂະ­ພາບ ວິ­ທະ­ຍາ­ໄລ​ຕ່າງໆ ໂຮງ­ຮຽນ​ມັດ­ທະ­ຍົມ​ພາຍ​ໃນ​ນະ­ຄອນ­ຫຼວງ ຫົວ­ໜ່ວຍ​ທຸ­ລະ​ກິດ ພາກ­ສ່ວນ​ນະ­ຄອນ­ຫຼວງ ແລະ ພາກ­ສ່ວນ​ອື່ນໆ ຄາດ​ວ່າ​ຈະ​ມີ​ຜູ້​ເຂົ້າ​ຮ່ວມ 1.761 ຄົນ ແລະ ຈະ​ສູ້​ຊົນ​ໃຫ້​ມີ​ຜູ້​ບໍ­ລິ­ຈາກ​ເລືອດ 1.553 ຄົນ.

    ທ່ານ ຈັນ­ທະ​ລາ ສຸກ​ສາ­ຄອນ ກ່າວ​ວ່າ: ໄລ­ຍະ​ຜ່ານ​ມາ​ເຖິງ​ວ່າ ການ​ປະ­ກອບ­ສ່ວນ​ບໍ­ລິ­ຈາກ​ເລືອດ​ມີ​ທ່າ​ກ້າວ​ດີ​ຂຶ້ນ​ຫຼາຍ​ຄົນ​ໃຫ້​ຄວາມ​ສຳ­ຄັນ ແຕ່​ເນື່ອງ​ຈາກ​ປັດ­ຈຸ­ບັນ​ພວກ​ເຮົາ​ພົບ​ກັບ​ບັນ­ຫາ​ພະ­ຍາດ​ໄຂ້­ເລືອດ­ອອກ ແລະ ໄພ ນ້ຳ​ຖວ້ມ​ຢູ່​ແຂວງ​ພາກ​ໃຕ້ ເຮັດ​ໃຫ້​ຄວາມ​ຕ້ອງ­ການ​ເລືອດ​ຍິ່ງ​ເພີ່ມ​ຂຶ່ນ ດັ່ງ­ນັ້ນ ຈຳ­ເປັນ​ຈຶ່ງ​ຕ້ອງ​ມີ​ການ​ປຸກ­ລະ­ດົມ​ຜູ້​ບໍ­ລິ­ຈາກ​ເລືອດ​ຈາກ​ສັງ­ຄົມ​ໃຫ້​ຫຼາຍ​ຂຶ້ນ ເພື່ອ​ເປັນ​ການ​ກຽມ​ຄວາມ​ພ້ອມ​ໃນ​ການ​ສະ­ໜອງ​ເລືອດ​ໃຫ້​ພຽງ­ພໍ ສູນ​ເລືອດ​ແຫ່ງ​ຊາດ​ຈຶ່ງ​ຈັດ​ກອງ​ປະ­ຊຸມ​ຄັ້ງ​ນີ້​ຂຶ້ນ​ກຽມ​ກິດ­ຈະ­ກຳ​ຮັບ​ບໍ­ລິ­ຈາກ​ເລືອດ​ທີ່​ຈະ​ຈັດ​ຂຶ້ນ​ວັນ​ທີ 19 ກັນ­ຍາ 2019 ທີ່​ສູນ​ການ​ຄ້າ​ລາວ-ໄອ​ເຕັກ ຫ້ອງ B2 ເລີ່ມ​ແຕ່​ເວ­ລາ 8:30-15:30 ໂມງ ໃນ​ຫົວ­ຂໍ້: “ຄົນ​ລາວ​ບໍ່​ຖິ້ມ​ກັນ” ໂອ­ກາດ​ນີ້ ຂໍ​ເຊີນ­ຊວນ​ທຸກ​ພາກ­ສ່ວນ​ໃນ​ສັງ­ຄົມ​ຈົ່ງ​ພ້ອມ​ກັນ​ເຂົ້າ​ຮ່ວມ​ກິດ­ຈະ­ກຳ​ຄັ້ງ​ນີ້​ຢ່າງ​ທົ່ວ​ເຖິງ ເພື່ອ​ຊ່ວຍ​ກອບ​ກູ້​ເອົາ​ຊີ­ວິດ​ເພື່ອນ​ມະ­ນຸດ​ດ້ວຍ​ກັນ.

ຂ່າວທີ່ກ່ຽວຂ້ອງ