ຊາວໜຸ່ມຕະລຸມບອນ ຮ່ວມໃຈຊ່ວຍເຫຼືອຜູ້ປະສົບໄພນ້ຳຖ້ວມ

237 16 ກ.ຍ. 2019 ຂ່າວໜ້າ​ໜຶ່ງ
ຊາວໜຸ່ມຕະລຸມບອນ ຮ່ວມໃຈຊ່ວຍເຫຼືອຜູ້ປະສົບໄພນ້ຳຖ້ວມ

    ວັນ​ທີ 7-11 ກັນ­ຍາ 2019 ທ່ານ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ສະ­ມາ­ຊິກ​ສະ­ພາ​ແຫ່ງ​ຊາດ ຊຸດ​ທີ 8 ພ້ອມ​ດ້ວຍ​ຄະ­ນະ ໄດ້​ນຳ​ເອົາ​ວັດ­ຖຸ​ປັດ​ໄຈ​ຈຳ­ນວນ​ໜຶ່ງ ປະ­ກອບ​ມີ ເຂົ້າ­ສານ 6 ໂຕນ ເຮືອ 6 ລຳ ນ້ຳ​ດື່ມ ໝີ່ ປ໋ອງ​ປາ ເສື້ອ​ຊູ­ຊີບ ເຄື່ອງ­ນຸ່ງ​ຫົ່ມ ເຄື່ອງ­ໃຊ້​ທີ່​ຈຳ­ເປັນ ແລະ ເງິນ 18 ລ້ານ​ກີບ ລວມ​ມູນ​ຄ່າ​ທັງ​ໝົດ 108 ລ້ານ​ກີບ ພ້ອມ​ດ້ວຍ​ກຳ­ລັງ​ອາ­ສາ​ສະ­ໝັກ​ຊາວ​ໜຸ່ມ​ຕະ­ລຸມ­ບອນ 10.554 ຄົນ ໃນ​ນັ້ນ ອາ­ສາ​ສະ­ໝັກ​ຊາວ​ໜຸ່ມ​ຕະ­ລຸມ­ບອນ​ແຂວງ​ຄຳ​ມ່ວນ 3.892 ຄົນ ສະ­ຫວັນ​ນະ​ເຂດ 1.050 ຄົນ ສາ­ລະ​ວັນ 2.286 ຄົນ ເຊ​ກອງ 595 ຄົນ ອັດ​ຕະ​ປື 931 ຄົນ ແລະ ແຂວງ​ຈຳ­ປາ​ສັກ 1.800 ຄົນ ນອກ​ນັ້ນ ຍັງ​ມີ​ອາ­ສາ​ສະ­ໝັກ​ຊາວ​ໜຸ່ມ​ຕະ­ລຸມ­ບອນ​ທີ່​ຈາກ​ບັນ­ດາ​ຂົງ­ເຂດ​ກຳ­ລັງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ບັນ­ດາ​ກະ ຊວງ ອົງ­ການ ຕະ­ຫຼອດ​ຮອດ​ຊາວ​ໜຸ່ມ​ທີ່­ຢູ່​ສູນ​ກາງ​ຊາວ​ໜຸ່ມ ແລະ ຢູ່​ຕາມ​ໜ່ວຍ​ງານ​ກອງ​ອາ­ສາ​ສະ­ໝັກ​ທາງ​ສັງ­ຄົມ ທຸກ​ຂົງ­ເຂດ​ສາ­ຂາ​ຂະ­ແໜງ­ການ​ຕ່າງໆ​ໄດ້​ສຸມ​ກຳ­ລັງ​ເຂົ້າ​ໃສ່​ໃນ​ຂະ​ບວນ​ດັ່ງ­ກ່າວ.

    ທ່ານ ອາ​ລຸນ​ໄຊ ສູນ​ນະ­ລາດ ໃນ​ນາມ​ຫົວ­ໜ້າ​ຄະ­ນະ​ຕ້ານ​ໄພ­ພິ­ບັດ​ຂອງ​ຄະ­ນະ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ກ່າວ​ວ່າ: ຊາວ​ໜຸ່ມ​ລາວ​ພາຍ​ໃຕ້​ຄຳ​ຂວັນ​ທີ່​ວ່າ “ຊາວ​ໜຸ່ມ​ຕະ­ລຸມ­ບອນ​ຮ່ວມ​ໃຈ​ຊ່ວຍ­ເຫຼືອ​ປະ­ຊາ­ຊົນ​ຜູ້​ປະ­ສົບ​ໄພ ນ້ຳ​ຖ້ວມ” ພາຍ­ຫຼັງ​ທີ່​ໄດ້​ຮັບ​ຊາບ​ໄດ້​ມີ​ຂໍ້​ມູນ​ຂ່າວ­ສານ​ຢ່າງ​ເປັນ​ທາງ​ການ​ຈາກ​ພາກ­ສ່ວນ​ທີ່​ກ່ຽວ­ຂ້ອງ ຄະ­ນະ​ເລ­ຂາ​ທິ ການ​ສູນ​ກາງ​ຊາວ​ໜຸ່ມ​ໄດ້​ຮີບ​ຮ້ອນ​ປະ­ຊຸມ ແລະ ພ້ອມ​ກັນ​ໄດ້​ເປັນ​ເອ­ກະ​ພາບ ແລະ ພ້ອມ​ກັນ​ອອກ​ເດີນ­ທາງ​ມາ​ຢ່າງ​ຮີບ​ດ່ວນ​ລົງ​ມາ​ບັນ­ດາ​ແຂວງ​ພາກ​ກາງ ແລະ ພາກ​ໃຕ້ ລວມ​ທັງ​ໝົດ 6 ແຂວງ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ຄັ້ງ​ນີ້ ແລະ ກິດ­ຈະ­ກຳ​ຄັ້ງ​ນີ້​ເປັນ​ການ​ໃຫ້​ກຳ­ລັງ​ໃຈ​ຕໍ່​ການ­ຈັດ­ຕັ້ງ​ລວມ​ເຖິງ​ກຳ­ລັງ​ອາ­ສາ​ສະ­ໝັກ​ຊາວ​ໜຸ່ມ ທີ່​ພວມ​ປະ­ຕິ­ບັດ​ໜ້າ­ທີ່​ອັນ​ມີ​ກຽດ​ຂອງ​ຕົນ​ເອງ ເພື່ອ​ຊ່ວຍ­ເຫຼືອ​ປະ­ຊາ­ຊົນ​ຜູ້​ທີ່​ພວມ​ປະ​ເຊີນ​ບັນ­ຫາ​ໃນ​ຂະ­ນະ​ນີ້ ທັງ​ຍັງ​ໄດ້​ນຳ​ເອົາ​ປັດ​ຈຸ​ປັດ​ໄຈ​ມາ​ໂດຍ​ກົງ​ທີ່​ປຸກ­ລະ­ດົມ​ມາ​ດ້ວຍ​ຄວາມ​ຮີບ​ດ່ວນ​ຈາກ​ທຸກ​ພາກ­ສ່ວນ​ໃນ​ເວ­ລາ​ທີ່​ຈຳ­ກັດ ເຖິງ​ວ່າ​ວັດ­ຖຸ​ສິ່ງ​ຂອງ​ມັນ​ຈະ​ບໍ່​ຫຼວງ­ຫຼາຍ ບໍ່​ສາ­ມາດ​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ປະ­ຊາ­ຊົນ​ກໍ​ຕາມ ການ​ມາ​ຊຸດ​ນີ້​ເຊື່ອ​ໝັ້ນ​ວ່າ​ຈະ​ເປັນ​ການ​ປະ­ກອບ­ສ່ວນ​ອັນ​ສຳ­ຄັນ ໃຫ້​ແກ່​ການ​ປຸກ­ລະ­ດົມ​ກຳ­ລັງ​ອາ­ສາ​ສະ­ໝັກ​ຊາວ​ໜຸ່ມ​ໃຫ້​ຍິ່ງ​ຂຶ້ນ ຕ້ອງ​ໄດ້​ບຸກ​ບືນ ພ້ອມ​ກັນ​ກ້າວ­ໜ້າ​ພັດ­ທະ­ນາ​ຂອງ​ລະ­ບົບ​ກອງ​ອາ­ສາ​ສະ­ໝັກ ນັບ​ແຕ່​ການ​ປຸ້ມ­ລຸມ​ປຸກ­ລະ­ດົມ ແບບ­ແຜນ​ກຽມ­ພ້ອມ​ຮັບ​ໃຊ້​ທຸກ​ສະ­ຖາ­ນະ​ການ​ທີ່​ເກີດ​ຂຶ້ນ ພ້ອມ​ດຽວ​ດັນ​ນີ້ ກໍ​ຈະ​ເປັນ​ການ​ຊຸກ­ຍູ້​ຂະ​ບວນ​ການ​ກະ­ກຽມ​ໃກ້​ແກ່​ກອງ​ປະ­ຊຸມ​ໃຫຍ່​ຂອງ​ຄະ­ນະ​ຊາວ​ໜຸ່ມ​ແຕ່​ລະ​ຂັ້ນ ເຊື່ອ​ໝັ້ນ​ວ່າ­ການ​ປະ­ກອບ­ສ່ວນ​ຄັ້ງ​ນີ້​ຈະ​ເປັນ​ການ​ແບ່ງ​ເບົາ​ທາງ​ດ້ານ​ຈິດ­ໃຈ ແລະ ວັດ­ຖຸ​ໃຫ້​ປະ­ຊາ­ຊົນ ກໍ​ຄື ການ­ຈັດ­ຕັ້ງ​ທຸກ​ພາກ­ສ່ວນ​ຈົ່ງ​ປະ­ຕິ­ບັດ​ໜ້າ­ທີ່​ດ້ວຍ​ຄວາມ​ປອດ​ໄພ ແລະ ໄດ້​ຮຽກ­ຮ້ອງ​ມາ​ຍັງ​ທຸກ​ຄົນ​ທີ່­ຢູ່​ໃນ​ສັງ­ຄົມ​ທຸກ​ພາກ­ສ່ວນ ຈົ່ງ​ຮ່ວມ​ແຮງ​ຮ່ວມ​ໃຈ​ສາ­ມັກ­ຄີ​ກັນ​ໃຫ້​ເປັນ​ຈິດ​ໜຶ່ງ​ໃຈ​ດຽວ ບິ​ແບ່ງ​ນ້ຳ​ຈິດ ນ້ຳ­ໃຈ ອູ້ມ­ຊູ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ພ້ອມ​ກັນ​ຜ່ານ​ຜ່າ​ອຸ­ປະ­ສັກ​ທີ່​ເກີດ​ຂຶ້ນ​ຄັ້ງ​ນີ້​ໃຫ້​ຜ່ານ​ໄປ​ດ້ວຍ​ດີ.

ຂ່າວທີ່ກ່ຽວຂ້ອງ