ຂ່າວຫຼ້າສຸດ

...ສຸກກ່ອນເຫີ່ມ...

2.856 16 ກ.ຍ. 2019 ນານາສາລະ

    ສຸກ​ກ່ອນ​ເຫີ່ມ ຫຼື ຫົວ­ລ້ານ​ລື່ນ​ຄູ ຄົນ​ບູ­ຮານ​ສອນ​ວ່າ​ບໍ່​ດີ ຖ້າ​ທຽບ­ໃສ່​ໝາກ​ໄມ້ ໃຜ​ກະ​ວ່າ​ບໍ່​ແຊບ ຖ້າ­ວ່າ​ສຸກ​ກ່ອນ​ເຫີ່ມ ຖ້າ​ທຽບ­ໃສ່​ຄົນ ຖ້າ­ວ່າ​ຫົວ­ລ້ານ​ລື່ນ​ຄູ ຄົງ​ຊິ​ບໍ່​ມີ​ໃຜ​ມັກ ເພາະ​ອັນ​ໃດ​ເພິ່ນ​ກະ​ອວດ​ຮູ້​ອວດ​ເຫັນ​ໝົດ​ສູ່​ແນວ ບາງ​ຄົນ​ຈົນ​ບໍ່​ມີ​ໃຜ​ຢາກ​ຄົບ ອາ­ການ​ສຸກ​ກ່ອນ​ເຫີ່ມ​ໃນ​ສັງ­ຄົມ​ປັດ­ຈຸ­ບັນ​ນີ້​ປາ­ກົດ​ມີ​ນຳ​ຄົນ​ປະ­ເພດ​ອວດ​ສະ­ຫຼາດ​ສ້າງ​ພາບ​ພົດ ຍົກ​ຕົວ­ຢ່າງ: ເປັນ​ເດັກ ນ້ອຍ​ມື້­ວານ​ຊືນ​ກໍ​ທ່ຽວ​ສອນ​ຄົນ​ອື່ນ.

   ສຸກ​ກ່ອນ​ເຫີ່ມ​ຍັງ​ປາ­ກົດ​ໃນ​ພວກ​ຢາກ​ດັງ​ທາງ​ລັດ ຈົນ​ຫຼົງ​ຕົນ​ເອງ ເຖິງ​ແມ່ນ​ວ່າ​ຕົນ​ເອງ​ຍັງ​ຢູ່​ຫ້ອງ​ເຊົ່າ​ເຂົ້າ​ຊື້​ກໍ​ສ້າງ​ເຟດ ຫຼື ເພດ (Pape)... ຂຶ້ນ​ມາ​ສອນ​ວິ­ທີ​ລວຍ​ຮ້ອຍ​ລ້ານ ແລ້ວ​ໃຜ​ເດ​ຊິ​ເຊື່ອ ເພາະ​ຜູ້​ສອນ​ຍັງ​ກິນ​ໝີ່​ໄວ​ໄວ​ກັບ​ປາ​ກະ­ປ່ອງ​ຢູ່ ເຊິ່ງ​ບໍ່​ຕ່າງ​ຫຍັງ​ກັບ​ຄົນ​ຫົວ­ລ້ານ​ທ່ຽວ​ບອກ​ຢາ​ປູກ​ຜົມ ຫຼື ແມ່­ຮ້າງ​ບອກ​ຢາ​ສະ​ເໜ່ ຈິງ​ຢູ່​ວ່າ: “ໂລກ​ອອນ​ລາຍ” ໃຜ​ກະ​ມີ​ອິດ­ສະ­ຫຼະ​ສະ­ແດງ​ໄດ້ ແຕ່​ການ­ສະ­ແດງ​ອັນ​ໃດ​ອອກ​ກໍ​ຕາມ ຖ້າ​ຕົນ​ເອງ​ຍັງ​ບໍ່​ສາ­ມາດ​ສຳ­ເລັດ​ໄດ້ ຫຼື ເຮັດ​ໄດ້​ຈະ​ຫວັງ​ໃຫ້​ຄົນ​ອື່ນ​ເຊື່ອ​ນັ້ນ​ຍາກ

   ຫາກ​ເວົ້າ​ເຖິງ​ການ­ສະ­ແດງ​ຄວາມ​ຮູ້ ພະ­ພຸດ­ທະ­ເຈົ້າ​ເຄີຍ​ຫ້າມ​ພະ­ສົງ​ບໍ່​ໃຫ້​ທ່ຽວ​ອວດ​ສະ­ແດງ​ຄຸນ​ບໍ່​ມີ​ໃນ​ຕົນ ເຊັ່ນ: ບໍ່​ຮູ້​ກໍ​ອວດ​ວ່າ​ຮູ້ ບໍ່​ມີ​ລິດ​ກໍ​ອວດ​ວ່າ​ມີ ສິນ​ຂໍ້​ນີ້​ຮ້າຍ​ແຮງ​ເຖິງ​ຂັ້ນ​ປັບ​ລົງ­ໂທດ​ຂາດ​ຈາກ​ຄວາມ​ເປັນ​ພະ ນີ້​ຄື​ບົດ­ຮຽນ​ທີ່​ສອນ​ເຮົາ​ໃຫ້​ຮູ້​ວ່າ ການ​ອວດ­ອົ່ງ​ທະ​ນົງ​ຕົນ​ນັ້ນ​ມີ​ແຕ່​ທາງ​ເສຍ ບໍ່​ມີ​ທາງ​ໄດ້ ບາງ​ຄົນ​ຫຼົງ​ເຮັດ​ໄປ​ຍ້ອນ​ບໍ່​ຮູ້​ເທົ່າ​ເຖິງ​ການ ແຕ່​ຄົນ​ອື່ນ​ເຕືອນ​ກະ​ບໍ່​ຍອມ​ຟັງ ເຊິ່ງ​ບໍ່​ຕ່າງ​ກັບ​ອື່ງ​ທີ່​ເບັ່ງ​ລົມ​ໂຕ​ປຸ້ງ​ຂຶ້ນ ແລ້ວ​ກໍ​ຮ້ອງ​ສຽງ​ດັງ...

   ອາ­ການ​ສຸກ​ກ່ອນ​ເຫີ່ມ​ນັ້ນ ໃຜ​ມີ​ລູກ​ຫຼານ​ກໍ​ຄວນ​ບອກ­ສອນ ເພາະ​ມັນ​ເປັນ​ທາງ​ເຮັດ​ໃຫ້​ຄົນ​ຫຼົງ​ໂຕ​ເອງ ແລະ ກົງ­ກັນ­ຂ້າມ​ກັບ​ປັດ​ຊະ​ຍາ​ລາວ​ບູ­ຮານ​ສອນ​ໄວ້​ວ່າ: ຍິ່ງ​ແກ່​ຍິ່ງ​ກົ້ມ​ຄື​ເຂົ້າ​ໃນ​ນາ ບາງ​ຄົນ​ຫຼົງ​ໂຕ​ເອງ​ຄິດ​ວ່າ​ມີ​ຄວາມ​ຮູ້​ເຕັມ​ກະ­ຕ່າ ແລ້ວ​ບາດ​ຂຶ້ນ​ເວ­ທີ​ຄົນ​ເກ່ງ​ແທ້​ເຂົາ​ຜັດ​ເຕັມ​ກະ­ບຸງ ຫຼື ບາງ​ຄົນ​ຫຼົງ​ຕົນ​ເອງ​ຄິດ​ວ່າ​ຕົນ​ມີ​ຄວາມ​ຮູ້​ເຕັມ​ກະ­ບຸງ ແຕ່​ຄົນ​ອື່ນ​ເຂົາ​ຜັດ​ເຕັມ​ກະ­ເຊີ ບາງ​ຄົນ​ຫຼິ້ນ​ເຟດ ຫຼື ເພດ ເພື່ອ​ຫວັງ​ສ້າງ​ພາບ​ຢາກ​ດັງ ໄດ້​ຮັບ​ຍອດ​ກົດ​ໄລ​ຫຼວງ­ຫຼາຍ ແຕ່​ໃນ​ຊີ­ວິດ​ຈິງ​ບໍ່​ມີ​ເພື່ອນ​ລົມ​ນຳ ເຮັດ​ໃຫ້​ຮູ້­ສຶກ​ເຫງົາ​ຫງອຍ ໂດດ­ດ່ຽວ ຕ່າງ​ກັບ​ອີກ​ບາງ​ຄົນ​ທີ່​ໃຊ້​ຊີ­ວິດ​ບໍ່​ເຫີ່​ຫຼົງ​ໂລກ ແຕ່​ຊີ­ວິດ​ຈິງ​ມີ​ຄວາມ­ສຸກ​ຫຼາຍ​ລົ້ນ !.

ໂດຍ: ດັ້ນ​ກີບ​ເມກ

ຂ່າວທີ່ກ່ຽວຂ້ອງ